នាយករដ្ឋមន្ត្រីថៃលោក Prayuth Chan-ocha បានអំពាវនាវឲ្យរក្សាការស្ងប់ស្ងៀមនៅថ្ងៃច័ន្ទនេះ ហើយបាននិយាយថា មិនមានផែនការបន្ទាន់ដើម្បីពង្រីកការបិទសកម្មភាពសង្គម បន្ទាប់ពីការឆ្លងវីរុសកូរ៉ូណាថ្មីចំនួន៣៨២ករណី បានត្រូវបានគេរកឃើញនោះ។ នេះតាមសេចក្តីរាយការណ៍របស់ទីភ្នាក់ងារព័ត៌មាន Reuters។
៣៦០ករណីនៃករណីថ្មីទាំងអស់នោះ បានឆ្លងទៅពួកកម្មករចំណាកស្រុក ដែលភាគច្រើនមកពីប្រទេសមីយ៉ាន់ម៉ា ដែលបានទាក់ទិនទៅនឹងការផ្ទុះរាតត្បាតនៅមជ្ឈមណ្ឌលគ្រឿងសមុទ្រមួយនៅខេត្ត Samut Sakhon ជិតរាជធានីបាងកក ដោយអាជ្ញាធរបានបិទសកម្មភាពសង្គមនៅទីនោះ ហើយការធ្វើតេស្តមនុស្សរាប់ពាន់នាក់ បានត្រូវធ្វើឡើងដើម្បីរាំងខ្ទប់និងតាមដានការរាតត្បាតនេះ។
លោក Prayuth Chan-ocha បាននិយាយថា រដ្ឋាភិបាលនឹងឃ្លាំមើលស្ថានការណ៍នេះ រយៈពេលមួយសប្តាហ៍មុនពេលចាត់វិធានការបន្ថែមទៀត។
លោកនាយករដ្ឋមន្ត្រីថៃ បានប្រាប់ពួកអ្នកយកព័ត៌មានថា៖ «សូមកុំភ័យស្លន់ស្លោ។ យើងសង្ឃឹមយ៉ាងខ្លាំងថា អ្វីៗនឹងស្ងប់ស្ងាត់ក្នុងរយៈពេល៧ថ្ងៃទៀត។ ខ្ញុំមិនចង់បិទសកម្មភាពសង្គមឆាប់រហ័សពេកដូចជាប្រទេសដទៃទេ។ ការរាតដាលនេះ អាចតាមដានរកឃើញបាន»។
មន្ត្រីសុខាភិបាល បាននិយាយថា ការឆ្លងជាប់ទាក់ទិននឹងមជ្ឈមណ្ឌលគ្រឿងសមុទ្រនេះបានកើនឡើងដល់៨២១ករណី ដែលភាគច្រើននៃអ្នកឆ្លងទាំងនោះមិនចេញរោគសញ្ញា។ មនុស្សរហូតដល់៤០.០០០នាក់ នឹងត្រូវធ្វើតេស្តនៅខាងក្នុងនិងជុំវិញខេត្ត Samut Sakhon។
កន្លងមកប្រទេសថៃ ទប់ស្កាត់បានការរាតត្បាតនៃជំងឺកូវីដ១៩ ដោយគិតមកត្រឹមមុនការផ្ទុះថ្មីនៅចុងសប្តាហ៍កន្លងទៅនេះ ប្រទេសមានរកឃើញករណីឆ្លងតែ៤.៣០០ករណីប៉ុណ្ណោះ និងអ្នកស្លាប់ត្រឹម៦០នាក់ ដែលនេះជាតួលេខតិចតួចបំផុតមួយក្នុងពិភពលោក៕
