នៅប្រទេសថៃ ក្រុមបាតុករប្រឆាំងរដ្ឋាភិបាលរាប់ពាន់នាក់បានប្រមូលផ្តុំគ្នានៅទីក្រុងបាងកក ដើម្បីរំឭកខួបមួយឆ្នាំនៃការបង្ក្រាបដ៏មរណៈដោយយោធា ដែលបានបញ្ចប់បាតុកម្មរយៈពេល២ខែ។ បាតុករបានទាមទាររកយុត្តិធម៌ឲ្យមនុស្ស៩១នាក់ ដែលត្រូវបានសម្លាប់នៅក្នុងការប៉ះទង្គិចគ្នានៅតាមផ្លូវ។ នោះជាការប៉ះទង្គិចដ៏អាក្រក់បំផុតក្នុងពេលប៉ុន្មានទសវត្សរ៍ចុងក្រោយនេះ។
កាលពីថ្ងៃព្រហស្បតិ៍នេះ ក្រុមបាតុករអាវក្រហមនៃប្រទេសថៃបានវិលត្រឡប់មកសង្កាត់ពាណិជ្ជកម្មដ៏មមាញឹក ដែលពួកគេបានកាន់កាប់កាលពីជាងមួយឆ្នាំមុន។
ក៏ប៉ុន្តែ មិនដូចបាតុកម្មដែលចាប់ផ្តើមកាលពីខែមិនាដល់ខែឧសភាកាលពីឆ្នាំមុននោះទេ ក្រុមបាតុករអាវក្រហមរាប់ពាន់នាក់និយាយថា ពួកគេនឹងប្រមូលផ្តុំគ្នាតែមួយថ្ងៃប៉ុណ្ណោះ។
កាលពីឆ្នាំមុន ក្រុមបាតុករបានទាមទារឲ្យមានការបោះឆ្នោតជាថ្មី និងឲ្យផ្តល់សិទ្ធិស្មើគ្នាសម្រាប់មេដឹកនាំរបស់ពួកគេ។ ក៏ប៉ុន្តែក្រោយពីការធ្វើបាតុកម្មអស់ជាច្រើនសប្តាហ៍ នៅកណ្តាលទីក្រុងបាងកក កងយោធាបានចាត់វិធានការបញ្ចប់ការធ្វើបាតុកម្មទាំងនោះ និងការប្រយុទ្ធដ៏ខ្លាំងក្លាជាមួយនឹងក្រុមប្រដាប់អាវុធដែលគាំទ្រពួកអាវក្រហម។
លោក វីស្ហ៊ី អ៊ុន (Wichien) អាយុ ៣០ឆ្នាំជាវិស្វករម្នាក់នៅទីក្រុងបាងកក។ លោកបានថ្លែងថា លោកស្ថិតនៅក្នុងចំណោមបាតុករដែលបានជ្រកកោននៅក្នុងវត្តដើម្បីគេចចេញពីការវាយប្រយុទ្ធគ្នា។ លោកថ្លែងថា លោកបានឃើញទាហានបាញ់កាំភ្លើងចូលក្នុងវត្ត សម្លាប់ពលរដ្ឋមួយចំនួនដែលគ្មានអាវុធ។
លោកថ្លែងថា ឃាតករគួរតែត្រូវបានចាប់ខ្លួន ហើយបញ្ជូនទៅពន្ធនាគារដើម្បីរកយុត្តិធម៌ឲ្យអ្នកដែលស្លាប់ទាំង៩១នាក់នោះ។ ក៏ប៉ុន្តែ លោកថ្លែងថា រហូតមកដល់ពេលនេះមិនទាន់មានឃាតករណាម្នាក់ត្រូវបានចាប់ខ្លួននៅឡើយទេ។
ប៉ូលិសបាននិយាយថា ក្នុងចំណោមអ្នកស្លាប់ទាំងនោះមានមួយចំនួនជាសមាជិកកងសន្តិសុខ ហើយជនរងគ្រោះផ្សេងទៀតបានស្លាប់ដោយសារការផ្ទុះអាវុធដែលបង្កឡើងដោយក្រុមអាវក្រហម ដែលធ្វើបាតុកម្មរយៈពេល២ខែ។
រដ្ឋាភិបាលថៃឲ្យដឹងថា ខ្លួនកំពុងតែស៊ើបអង្កេតអំពីការស្លាប់ ហើយនឹងដាក់ទោសអ្នកទាំងឡាយណាដែលបានប្រព្រឹត្តអំពើឃាតកម្មទាំងនោះ។ ក៏ប៉ុន្តែ ក្រុមអ្នកការពារសិទ្ធិមនុស្សថ្លែងថា អាជ្ញាធរដែលព្យាយាមស៊ើបអង្កេតបញ្ហានេះកំពុងត្រូវបានទប់ស្កាត់ដោយយោធា។
នៅខែនេះ អង្គការឃ្លាំមើលសិទ្ធិមនុស្ស (Human Right Watch) បានរាយការណ៍ថា ថ្វីបើមានភស្តុតាងបង្ហាញថា នៅក្នុងករណីខ្លះ ទាហានបានបាញ់សំដៅពលរដ្ឋ និងបានបាញ់មិនរើសមុខទៅលើហ្វូងមនុស្សក៏ដោយ ក៏ពួកគេមិនត្រូវបានចោទប្រកាន់ឡើយ៕
ប្រែសម្រួលដោយ លី ម៉ូរីវ៉ាន់
