នាយករដ្ឋមន្ត្រីនៃរបបយោធាថៃ លោកឧត្តមសេនីយ៍ប្រាយុទ្ធ ចាន់អូចា (Prayuth Chan-ocha) បានចាប់ផ្តើមដំណើរទស្សនកិច្ចជាផ្លូវការនៅប្រទេសកម្ពុជានៅថ្ងៃព្រហស្បតិ៍ គឺជាទស្សនកិច្ចរយៈពេលពីរថ្ងៃដើម្បីពង្រឹងកិច្ចសហប្រតិបត្តិការផ្នែកនយោបាយ និងជំរុញផ្នែកសេដ្ឋកិច្ច។ នេះបើយោងតាមក្រុមមន្ត្រីកម្ពុជា។
នៅក្នុងដំណើរទស្សនកិច្ចនេះ ប្រទេសទាំងពីរគ្រោងនឹងចុះហត្ថលេខាលើឯកសារចំនួនបី ដូចជាការចុះហត្ថលេខាលើអនុស្សរណៈនៃការយោគយល់គ្នា ស្តីពីកិច្ចសហប្រតិបត្តិការទេសចរណ៍ អនុស្សរណៈនៃការយោគយល់គ្នា ស្តីពីកិច្ចសហប្រតិបត្តិការទ្វេភាគី ដើម្បីលុបបំបាត់ការជួញដូរមនុស្ស និងជួយដល់ជនរងគ្រោះដោយសារការជួញដូរ និងទី៣គឺចុះហត្ថលេខាលើអនុស្សរណៈនៃការយោគយល់គ្នាស្តីពីការតភ្ជាប់ផ្លូវដែក។
លោកអ៊ាង សុផល្លែត ជំនួយការលោកនាយករដ្ឋមន្ត្រីខ្មែរហ៊ុន សែន បានថ្លែងប្រាប់អ្នកសារព័ត៌មានក្រោយពីជំនួបរវាងលោកប្រមុខរដ្ឋាភិបាលខ្មែរជាមួយនឹងលោកឧត្តមសេនីយ៍ប្រាយុទ្ធ ចាន់អូចាថា លោកនាយករដ្ឋមន្ត្រីរបបយោធាថៃបានស្នើឲ្យប្រទេសកម្ពុជាបោះបង់ចោលនូវជម្លោះអតីតកាល ហើយចាប់យកកិច្ចសហការផ្នែកសេដ្ឋកិច្ច។
«ឯកឧត្តមប្រាយុទ្ធ ចាន់អូចាបានមានប្រសាសន៍ថា ប្រទេសទាំងពីរមានប្រវត្តិសាស្ត្រជាយូរលង់ណាស់មកហើយ ហើយគប្បីជម្រុះជម្លោះកន្លងមកដើម្បីធ្វើយ៉ាងណាឈានឆ្ពោះទៅរកកិច្ចអភិវឌ្ឍនៃប្រទេសយើងទាំងពីរ។ ឯកឧត្តមក៏បានជំរុញឲ្យមានកិច្ចសហប្រតិបត្តិការផ្នែកសេដ្ឋកិច្ច និងវិនិយោគផងដែរ។ ការបង្កើតតំបន់សេដ្ឋកិច្ចពិសេសនៅតាមព្រំដែន និងការអភិវឌ្ឍនៅតាមព្រំដែន»។
ផ្នែកតាមអ្នកនាំពាក្យនៃជំនួបដដែលនេះឲ្យដឹងថា ថៃត្រៀមវិនិយោគលើផ្សារភាគហ៊ុននៅកម្ពុជា ថៃជំរុញកិច្ចសហការផ្នែកហេដ្ឋារចនាសម្ព័ន្ធ ផ្នែកប្រយុទ្ធនឹងការជួញដូរមនុស្ស កិច្ចសហការលើសុខាភិបាល និងជំរុញកិច្ចអភិវឌ្ឍន៍វិស័យទេសចរណ៍ រួមទាំងស្នើសុំឲ្យកម្ពុជាផ្តល់ការអនុគ្រោះដល់រថយន្តដឹកទំនិញធុនធំរបស់ថៃចូលដឹកទំនិញផ្ទាល់ក្នុងប្រទេសកម្ពុជាពីចំនួន៤០គ្រឿងដល់ចំនួន៥០០គ្រឿងក្នុងមួយថ្ងៃ។
យោងតាមលោកអ៊ាង សុផល្លែតឲ្យដឹងថា លោកនាយករដ្ឋមន្ត្រីហ៊ុន សែនបានជំរុញឲ្យមានកិច្ចសហការល្អរវាងប្រទេសទាំងពីរ ឲ្យមានការដោះស្រាយជាបន្តបន្ទាប់នូវបញ្ហារួមរបស់ប្រទេសទាំងពីរ និងជំរុញកិច្ចសហប្រតិបត្តិការសេដ្ឋកិច្ច ការប្រឆាំងភេរវកម្ម ព្រមទាំងកិច្ចសហការប្រឆាំងការជួញដូរគ្រឿងញៀនជាដើម។
«សម្តេចនាយករដ្ឋមន្ត្រីហ៊ុន សែនមានប្រសាសន៍ថា យើងគប្បីជំរុញការផ្លាស់ប្តូរលើវិស័យពាណិជ្ជកម្ម និងសេដ្ឋកិច្ច»។
លោកប្រាយុទ្ធ ចាន់អូចាបានដឹកនាំរដ្ឋប្រហារយោធានៅប្រទេសថៃកាលពីខែឧសភា ឆ្នាំ២០១៤នេះ ដោយបានទម្លាក់លោកស្រីនាយករដ្ឋមន្ត្រីយីងឡាក់ ស៊ីណាវ៉ាត់ចេញពីតំណែង។ ហើយលោកបានឡើងកាន់តំណែងជានាយករដ្ឋមន្ត្រីកាលពីខែសីហា។
យោងតាមសារព័ត៌មាននានារបស់ប្រទេសថៃឲ្យដឹងថា លោកនាយករដ្ឋមន្ត្រីនៃរបបយោធាថៃបានថ្លែងប្រាប់អ្នកកាសែតមុននឹងចាប់ផ្តើមដំណើរទស្សនកិច្ចនៅកម្ពុជាថា លោកនឹងត្រូវជជែកជាមួយសមភាគីកម្ពុជារបស់លោកលើវិស័យពាណិជ្ជកម្ម វិនិយោគ ទេសចរណ៍និងការកាប់ឈើខុសច្បាប់នៅតាមបណ្តោយព្រំដែន។ ក៏ប៉ុន្តែនឹងមិនមានកិច្ចពិភាក្សាស្តីពីសំណុំរឿងចម្រូងចម្រាស់ទាក់ទងនឹងប្រាសាទព្រះវិហារនោះទេ។
ដោយឡែក ក្នុងអំឡុងពេលទស្សនកិច្ចនេះដែរ លោកឧត្តមសេនីយ៍ថាណៈសាក់ ប៉ាទិម៉ាប្រាកន រដ្ឋមន្ត្រីការបរទេសថៃក៏បានជួបពិភាក្សាជាមួយសមភាគីកម្ពុជាគឺលោកឧបនាយករដ្ឋមន្ត្រីហោ ណាំហុងផងដែរ។
ប្រមុខការទូតទាំងពីរក៏បានផ្តោតលើការដោះស្រាយជម្លោះនៅតាមព្រំដែននិងការបើកច្រកព្រំដែនចំនួន៤ ដូចជាច្រកអានសេះ ច្រកភ្នំដី ច្រកថ្មដា និងច្រកជប់គគីរ។
នៅក្នុងនោះដែរ លោកហោ ណាំហុងក៏បានស្នើសុំឲ្យប្រទេសថៃឈប់បាញ់សម្លាប់ពលរដ្ឋកម្ពុជាដែលឆ្លងព្រំដែនខុសច្បាប់ទៅកាប់ឈើក្នុងទឹកដីថៃ។ ក៏ប៉ុន្តែប្រមុខការទូតខ្មែរស្នើឲ្យប្រទេសថៃចាត់វិធានការតាមផ្លូវច្បាប់ចំពោះពួកគេវិញ។ នេះបើយោងតាមលោកកុយ គួង អ្នកនាំពាក្យក្រសួងការបរទេសកម្ពុជា។
សូមបញ្ជាក់ថា នៅក្នុងដំណើរទស្សនកិច្ចនេះ លោកឧត្តមសេនីយ៍ប្រាយុទ្ធ ចាន់អូចានឹងចូលថ្វាយបង្គំគាល់ព្រះមហាក្សត្រសម្តេចព្រះនរោត្តមសីហមុនី និងអញ្ជើញគោរពព្រះវិញ្ញាណក្ខន្ធ អតីតព្រះមហាក្សត្រសម្តេចព្រះនរោត្តម សីហនុ ផងដែរ៕
