ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

គណបក្ស​ប្រឆាំង​ថៃ​ឈ្នះ​បាន​អាសនៈ​ភាគ​ច្រើន​នៅ​ក្នុង​ការ​បោះឆ្នោត


លោក Pita Limjaroenrat មេដឹកនាំ​និង​ជា​បេក្ខជន​នាយករដ្ឋមន្ត្រី​របស់​គណបក្ស Move Forward ប្រកាស​ពី​ជ័យជម្នះ មួយ​ថ្ងៃ​ក្រោយ​ថ្ងៃ​បោះឆ្នោត នៅ​​ទី​ស្នាក់ការ​គណបក្ស​នៅ​រាជធានី​បាងកក កាល​ពី​ថ្ងៃ​ទី​១៥ ខែឧសភា ឆ្នាំ​២០២៣។
លោក Pita Limjaroenrat មេដឹកនាំ​និង​ជា​បេក្ខជន​នាយករដ្ឋមន្ត្រី​របស់​គណបក្ស Move Forward ប្រកាស​ពី​ជ័យជម្នះ មួយ​ថ្ងៃ​ក្រោយ​ថ្ងៃ​បោះឆ្នោត នៅ​​ទី​ស្នាក់ការ​គណបក្ស​នៅ​រាជធានី​បាងកក កាល​ពី​ថ្ងៃ​ទី​១៥ ខែឧសភា ឆ្នាំ​២០២៣។

នៅ​ថ្ងៃ​ចន្ទ​នេះ គណបក្ស Move Forward ​ដែល​គាំទ្រ​ដោយ​អ្នក​បោះឆ្នោត​ដែល​ជា​យុវជន​ជា​ច្រើន​លាន​នាក់ ​បាន​ឈ្នះ​បាន​អាសនៈ​ច្រើន​ជាង​គេ​បំផុត​នៅ​ក្នុង​ការ​បោះឆ្នោត​នៅ​ប្រទេស​ថៃ។

ការ​ស្ទង់​មតិ​មុន​ការ​បោះឆ្នោត​បាន​បង្ហាញ​ថា គណបក្ស Pheu Thai នឹង​ឈ្នះ​បាន​អាសនៈ​ច្រើន​ជាង​គេ​បំផុត ​ប៉ុន្តែ​ជាក់ស្ដែង ​លទ្ធផល​ដ៏​គួរ​ឱ្យ​ភ្ញាក់ផ្អើល​សម្រាប់​ការ​បោះឆ្នោត​កាលពី​ថ្ងៃ​អាទិត្យ​គឺ​ថា គណបក្ស ​Move Forward ​នឹង​ឈ្នះ​បាន​អាសនៈ​ចំនួន ១៥១ បើ​ប្រៀប​ជាមួយ​នឹង​គណបក្ស Pheu Thai ដែល​ឈ្នះ​បាន​អាសនៈ​ចំនួន ១៤១។

មេដឹកនាំ​គណបក្ស Move Forward លោក Pita Limjaroenrat បាន​និយាយ​នៅ​ថ្ងៃ​ចន្ទ​នេះ​ថា គណបក្ស​របស់​លោក​ត្រៀម​លក្ខណៈ​រួចរាល់​នៅ​ក្នុង​ការ​ដឹកនាំ​រដ្ឋាភិបាល​ថ្មី​របស់​ប្រទេស​ថៃ ហើយ​លោក​ត្រៀម​ខ្លួន​រួចរាល់​នៅ​ក្នុង​ការ​ធ្វើ​ជា​នាយករដ្ឋមន្ត្រី​ថ្មី។

លោក Pita បាន​ប្រាប់​អ្នក​យក​ព័ត៌មាន​នៅ​ក្នុង​ទីក្រុង​បាងកក​ថា ​លោក​បាន​និយាយ​រួច​ហើយ​ជាមួយ​នឹង​គណបក្ស Pheu Thai ​និង​គណបក្ស​នយោបាយ​ផ្សេង​ទៀត​អំពី​ការ​បង្កើត​រដ្ឋាភិបាល​ចម្រុះ​ដែល​នឹង​មាន​អាសនៈ​ជាង​ ៣០០។

ប្រសិន​បើ​ករណី​នេះ​កើតឡើង នោះ​វា​អាស្រ័យ​លើ​ព្រឹទ្ធសភា​ថៃ ​ដែល​មាន​សមាជិក ២៥០ ​នាក់​ដែល​តែងតាំង​ដោយ​យោធា​ក្នុង​ពេល​កន្លង​មក នៅ​ក្នុង​ការ​សម្រេច​លើ​អ្វី​ដែល​នឹង​កើតឡើង​បន្ទាប់​និង​លើ​ថា​តើ​ពួកគេ​គាំទ្រ​រដ្ឋាភិបាល​ចម្រុះ​និង​បេក្ខភាព​នាយករដ្ឋមន្ត្រី​ថ្មី​ដែរ​ឬ​ក៏​យ៉ាង​ណា​នោះ។

មូលហេតុ​ចម្បង​មួយ​ដែល​យុវជន​ថៃ​បាន​គាំទ្រ​គណបក្ស Move Forward គឺ​ដោយសារ​ការ​សន្យា​របស់​គណបក្ស​នេះ​នៅ​ក្នុង​ការ​ព្យាយាម​កែ​ទម្រង់​របប​រាជាធិបតេយ្យ​របស់​ប្រទេស​ថៃ ​និង​កែ​ទម្រង់​ច្បាប់​ប្រមាថ​ព្រះ​មហាក្សត្រ​របស់​ប្រទេស​ថៃ ដែល​ច្បាប់​នេះ​ហាម​ឃាត់​ការ​រិះគន់​ណា​មួយ​លើ​សមាជិក​រាជវង្សានុវង្ស​និង​ដាក់​ទោស​ជាប់​ពន្ធនាគារ​ធ្ងន់ធ្ងរ​ចំពោះ​អ្នក​ដែល​ប្រព្រឹត្ត​ខុស។ គណបក្ស Move Forward ក៏​បាន​សន្យា​ផង​ដែរ​ឱ្យ​មាន​ការ​បង្កើន​ប្រាក់​បៀវត្សរ៍​ប្រចាំ​ឆ្នាំ​និង​ការ​កែ​ទម្រង់​ការ​អប់រំ​និង​កម្មវិធី​សិក្សា។

បេក្ខជននាយករដ្ឋមន្ត្រីរបស់គណបក្ស Pheu Thai អ្នកស្រី Paetongtarn Shinawatra កូនស្រីរបស់អតីតនាយករដ្ឋមន្ត្រីថៃលោក Thaksin Shinawatra ជួបអ្នកគាំទ្រ មុនថ្ងៃបោះឆ្នោត នៅទីក្រុងបាងកក ប្រទេសថៃ កាលពីថ្ងៃទី ១២ ខែឧសភា ឆ្នាំ ២០២៣។
បេក្ខជននាយករដ្ឋមន្ត្រីរបស់គណបក្ស Pheu Thai អ្នកស្រី Paetongtarn Shinawatra កូនស្រីរបស់អតីតនាយករដ្ឋមន្ត្រីថៃលោក Thaksin Shinawatra ជួបអ្នកគាំទ្រ មុនថ្ងៃបោះឆ្នោត នៅទីក្រុងបាងកក ប្រទេសថៃ កាលពីថ្ងៃទី ១២ ខែឧសភា ឆ្នាំ ២០២៣។

មេដឹកនាំ​គណបក្ស Pheu Thai ​អ្នកស្រី Paetongtarn Shinawatra ​បាន​អបអរសាទរ​គណបក្ស Move Forward ​ចំពោះ​ជ័យជម្នះ​របស់​គណបក្ស​នេះ ​និង​បាន​និយាយ​ថា៖​ «យើង​អាច​ធ្វើការ​ជាមួយ​គ្នា​បាន»។

គណៈកម្មការ​រៀបចំ​ការ​បោះឆ្នោត​របស់​ថៃ​មាន​រយៈពេល​ ៦០​ ថ្ងៃ​នៅ​ក្នុង​ការ​ប្រកាស​លទ្ធផល​ជា​ផ្លូវការ។

ការ​បោះឆ្នោត​ថ្នាក់​ជាតិ​លើក​នេះ​គឺ​ជា​ការ​បោះឆ្នោត​ថ្នាក់​ជាតិ​លើក​ដំបូង​បង្អស់​នៅ​ក្នុង​ប្រទេស​ថៃ​តាំងពី​ឆ្នាំ ២០១៩ មក ​ហើយ​ចំនួន​អ្នក​ចេញ​មក​បោះឆ្នោត​គឺ​មាន​ចំនួន​ប្រហែល ​៣៩,៥ លាន​នាក់ ​ឬ​ក៏ ​៧៥% នៃ​អ្នក​ដែល​បាន​ចុះ​ឈ្មោះ​បោះឆ្នោត​ចំនួន​ជាង ៥២ ​លាន​នាក់។

ព័ត៌មាន​ខ្លះ​សម្រាប់​សេចក្ដី​រាយការណ៍​នេះ​ត្រូវ​បាន​ដកស្រង់​មកពី​ទីភ្នាក់ងារ​សារព័ត៌មាន AP, Reuters និង​ AFP។

XS
SM
MD
LG