ការស្ទង់មតិមួយដែលបានចេញផ្សាយកាលពីថ្ងៃអាទិត្យបានបង្ហាញថា ពលរដ្ឋថៃជាង ៦០% ចង់ឱ្យរដ្ឋាភិបាលរំលាយសភានិងរៀបចំការបោះឆ្នោតមុនកាលកំណត់ ស្របពេលដែលតុលាការធម្មនុញ្ញរបស់ប្រទេសថៃកំពុងពិចារណាអំពីអនាគតរបស់លោក Prayuth Chan-ocha ដែលត្រូវបានផ្អាកពីតំណែងជានាយករដ្ឋមន្ត្រី។ នេះបើយោងតាមទីភ្នាក់ងារព័ត៌មាន Reuters។
លោក Prayuth អាយុ ៦៨ ឆ្នាំ ត្រូវបានតុលាការធម្មនុញ្ញផ្អាកពីតំណែងកាលពីខែមុនដើម្បីពិចារណាលើញត្តិទាមទាររបស់គណបក្ស Pheu Thai ដែលជាគណបក្សចម្បងបំផុត ដែលបានអះអាងថា រយៈពេលនៃការកាន់អំណាចរបស់លោក Prayuth ជាប្រមុខដឹកនាំរបបយោធានៅក្រោយរដ្ឋប្រហារឆ្នាំ ២០១៤ គួរតែរាប់បញ្ចូលទៅក្នុងរយៈពេលកាន់តំណែងរបស់លោកជានាយករដ្ឋមន្ត្រីចំនួន ៨ ឆ្នាំដែលកំណត់ដោយរដ្ឋធម្មនុញ្ញ។
បន្ទាប់ពីលោក Prayuth ត្រូវបានផ្អាកពីតំណែង លោកឧបនាយករដ្ឋមន្ត្រី Prawit Wongsuwan បានឡើងកាន់តំណែងជានាយករដ្ឋមន្ត្រីចាំផ្ទះ ហើយលោក Prayuth ធ្វើជារដ្ឋមន្ត្រីក្រសួងការពារជាតិ។
ការស្ទង់មតិលើពលរដ្ឋថៃចំនួន ១.៣១២ នាក់ដែលវិទ្យាស្ថានជាតិរដ្ឋបាលអភិវឌ្ឍន៍ (National Institute of Development Administration (NIDA)) បានធ្វើឡើងពីថ្ងៃទី ៥ ដល់ថ្ងៃទី ៧ ខែកញ្ញាកន្លងទៅនេះ បានរកឃើញថា អ្នកចូលរួមនៅក្នុងការស្ទង់មតិចំនួន ៦៣,៨០% បានយល់ស្របយ៉ាងខ្លាំងថា លោក Prawit គួរតែរំលាយសភានិងរៀបចំការបោះឆ្នោតមុនកាលកំណត់។ ចំណែកឯអ្នកចូលរួមនៅក្នុងការស្ទង់មតិនេះចំនួន ១៣,៩៥% វិញ ជំទាស់ខ្លាំងក្លាចំពោះការធ្វើដូច្នេះ។
អ្នកនាំពាក្យរដ្ឋាភិបាលមិនបានឆ្លើយតបចំពោះសំណើរបស់ទីភ្នាក់ងារព័ត៌មាន Reuters ដែលស្នើសុំការអធិប្បាយជុំវិញការរកឃើញនៃការស្ទង់មតិនេះទេ។
បើយោងតាមរដ្ឋធម្មនុញ្ញរបស់ប្រទេសថៃ ការបោះឆ្នោតថ្នាក់ជាតិបន្ទាប់នឹងធ្វើឡើងនៅខែឧសភា ឆ្នាំ ២០២៣ ខាងមុខ ប៉ុន្តែការបោះឆ្នោតនេះអាចធ្វើឡើងមុនកាលកំណត់ ប្រសិនបើមានការរំលាយសភា៕
