ភ្ជាប់​ទៅ​គេហទំព័រ​ទាក់ទង

ការ​បោះឆ្នោត​នៅ​ថៃ​នាំ​មក​នូវ​ចំណាត់ការ​ថ្មី​ក្នុង​ការ​ដោះស្រាយ​អំពើ​ហិង្សា​របស់​ជនជាតិ​អ៊ីស្លាម​នៅ​ប៉ែក​ខាងត្បូង


បុគ្គលិក​សន្តិសុខ​គ្រប​សាកសព​ព្រះ​សង្ឃ​មួយ​អង្គ​ ខណៈ​ពេល​ដែល​ពួក​គេ​កំពុង​​ធ្វើ​ការ​ស៊ើប​អង្កេត​នៅ​នឹង​កន្លែង​កើត​ការ​ផ្ទុះ​គ្រាប់​បែក​នៅ​ខេត្ត​យ៉ាឡា (Yala) ភាគ​ខាង​ត្បូង​ប្រទេស​ថៃ​ដ៏​មាន​បញ្ហា កាល​ពី​ថ្ងៃ​ទី​១៦​ខែ​ឧសភា​​ឆ្នាំ​២០១១​កន្លង​ទៅ​នេះ។

ការ​ផ្ទុះ​គ្រាប់បែក​នៅ​លើ​ផ្លូវ​មួយ​នៅ​ភាគ​ខាងត្បូង​ខេត្ត​យ៉ាឡា​នៃ​ប្រទេស​ថៃ​បាន​សម្លាប់​ព្រះសង្ឃ​យ៉ាង​ហោចណាស់​២អង្គ​ កាល​ពី​ថ្ងៃ​ច័ន្ទ​នេះ។ តំបន់​នេះ​បាន​ក្លាយ​ជា​ទីតាំង​ធ្វើ​កុបកម្ម​ជា​បន្តបន្ទាប់​ចាប់​តាំង​ពី​ឆ្នាំ​២០០៤​ ដែល​បាន​សម្លាប់​មនុស្ស​អស់​រាប់ពាន់​នាក់។​ អំពើ​ហិង្សា​បាន​កើន​ឡើង​នៅ​ប៉ុន្មាន​ខែ​កន្លងទៅ​នេះ។​ នៅពេល​ដែល​ប្រទេសថៃ​កំពុង​តែ​រៀបចំ​ការបោះឆ្នោត​ប្រកប​ដោយ​ការ​ប្រណាំង​ប្រជែង​យ៉ាង​ប្រកិត​នៅ​ខែកក្កដា​ អ្នក​នយោបាយ​ជាច្រើន​កំពុង​គិត​ជម្រើស​ជាច្រើន​ ដែល​ជាទូទៅ​មាន​បំណង​ចង់​បន្ធូរ​បន្ថយ​ភាព​តានតឹង​ និង​ឈ្នះ​ឆ្នោត​ផងដែរ។

ខេត្ត ប៉ាតានី ​(Pattani) នារាធីវ៉ាត់ (Narathiwat)​ សុងខ្លា ​(Songkhla) និង​ យ៉ាឡា​ (Yala) គឺ​ជា​ចំណុច​ផ្តោត​អារម្មណ៍​របស់​អ្នក​ធ្វើ​កុបកម្ម​ ដែល​ចាប់​តាំង​ពី​ឆ្នាំ​២០០៤​ បាន​សម្លាប់​មនុស្ស​ជាង​ ៤.៥០០​នាក់។

ការ​វាយ​ប្រហារ​របស់​កង​ជីវពល​នៅ​ប៉ុន្មាន​ខែ​មក​នេះ ​កាន់​តែ​មាន​ធ្ងន់ធ្ងរ​ទៅៗ​ មាន​ទាំង​ការ​ដាក់​គ្រាប់បែក​ក្នុង​ឡាន​ជាច្រើន​នៅ​តាមមូលដ្ឋាន​យោធា​ និង ​ទីតាំង​ជួរមុខ​នានានិង​ការ​បាញ់​សម្លាប់​មន្រ្តី​រាជការ​ជាច្រើន​នាក់។​ រដ្ឋាភិបាល​យោធា​ និង​ រដ្ឋាភិបាល​ស៊ីវីល​របស់​ប្រទេសថៃ​មាន​ការ​លំបាក​ក្នុង​ការ​ដោះ​ស្រាយ​អំពើ​ហឹង្សា​ទោះ​ជា​មាន​ការ​ដាក់​ពង្រាយ​កម្លាំង​ទប់ស្កាត់​កុបកម្ម​ និង​ ពង្រឹង​សន្តិសុខ​ថែមទៀត​ក៏ដោយ។

អ៊ីមទីយាស​ យូសុស​ (Imtiyaz Yusuf) ជា​សាស្រ្តាចារ្យ​សិក្សា​ខាង​អ៊ីស្លាម​ និង​ សាសនា​ នៅ​សាកលវិទ្យាល័យ​អាសាំស្ហិន​ (Assumption University)​ និយាយ​ថា​ អំពើ​ហិង្សា​នេះ​ បាន​នាំឲ្យ​មាន​សេចក្តីអំពាវនាវ​រក​ដំណោះស្រាយ​នយោបាយ​មួយ​នៅ​ក្នុង​តំបន់។

«មាន​ការជជែក​ពិភាក្សា​មួយ​ដែល​កំពុង​តែបន្ត​នៅ​សហគមន៍​អ្នក​នយោបាយ​ថៃ​ ដែល​ថា​ ជម្រើស​តែ​មួយ​គត់​សម្រាប់​ដោះស្រាយ​បញ្ហា​នានា​នៅ​ភាគ​ខាងត្បូង​ប្រទេស​ថៃ​គឺ​ចាត់​វិធានការ​ផ្សេងៗ​ លើ​ការគ្រប់គ្រង​ដោយ​ខ្លួន​ឯង។​ វា​នឹង​ក្លាយជា​ប្រដាប់​ទប់ទល់​មួយ​ដើម្បី​បន្ថយ​ការ​ភ័យខ្លាច ​និង ​ការទាមទារ​ផ្សេងៗ​ ដែល​កំពុង​តែ​បន្ត​នៅ​ប៉ែក​ខាងត្បូង​។ វា​នឹង​អាច​ជួយ​ ប៉ុនែ្ត​មិន​អាច​ជួយ​បាន​រយៈពេល​យូរ​ទេ»។

ខណៈពេល​ដែល​ប្រជារាស្រ្ត​ថៃ​ភាគច្រើន​ជា​អ្នក​កាន់​ព្រះពុទ្ធ​សាសនា​ ប្រជាជន​ដែល​រស់​នៅ​ខេត្ត​ទាំងនេះ​ភាគច្រើន​ជា​ម៉ាឡេ​កាន់​សាសនា​អ៊ីស្លាម​ ដែល​ពួកគេ​គិត​ថា​ ពួក​គេ​ត្រូវ​បាន​ព្រងើយ​កន្តើយ​មិន​យក​ចិត្ត​ទុក​ដាក់​ពី​សំណាក់​រដ្ឋាភិបាល​កណ្តាល​ទីក្រុង​បាងកក។​ ក្រុម​អ្នក​កុបកម្ម​ នៅ​ប៉ែក​ខាងជើង​មិន​ដែល​បង្ហាញ​ពី​អត្តសញ្ញាណ​ផ្ទាល់​ខ្លួន​ និង​ គោលបំណង​របស់​ពួកគេ​ទេ។​ ទោះជា​យ៉ាងនេះក្តី​ ពួក​គេ​តែងតែ​វាយប្រហារ​ប្រជាពលរដ្ឋ​ដែល​គេ​គិត​ថា​ជា​អ្នក​តំណាង​នៃ ពុទ្ឋសាសនា​របស់​រដ្ឋ​ និង​អ្នក​ដើរ​តាម​ទាំងនោះ។

តំបន់​នេះ​នៅ​តែ​ឋិត​នៅ​ក្រោម​ការ​គ្រប់គ្រង​យ៉ាង​តឹងរឹង​ដោយ​មាន​ក្រុមទាហាន​ច្រើន​ជាង​៣ម៉ឺន​នាក់​ និង​ ២ម៉ឺន​នាក់ និង​ប៉ុស្តិ៍​ប៉ូលីស​នៅទូទាំង​៤​ខេត្តនោះ។ អ្នក​រិះគន់​បាន​ចោទ​ពួកទាហាន​ពី​បទ​ប្រើ​អំពើ​ហិង្សា​ប្រឆាំងនឹង​ប្រជារាស្រ្ត​ក្នុង​តំបន់។

ប៉ុនែ្ត​ ការបោះឆ្នោត​ដែល​នឹង​ធ្វើ​ឡើង​នៅ​ថៃ្ង​ទី៣​កក្កដា​ខាងមុខ​នេះ​ ទាំង​គណបក្ស​ប្រជាធិបតេយ្យ​កាន់​អំណាច​ និង​គណបក្ស​ភឿ​ថៃ​ សង្ឃឹម​ថា​ នឹង​អាច​ទាក់ទាញ​បាន​នូវ​សន្លឹក​ឆ្នោត​នៅ​ក្នុង​តំបន់​នេះ។

កាល​ពី​សប្តាហ៍​មុន​ លោក​នាយក​រដ្ឋមន្រ្តី​ អភិសិទ​ វិចាជីវា​ (Abhisit Vejjajiva)​ ដែល​ជា​មេដឹកនាំ​គណបក្ស​ប្រជាធិបតេយ្យ​ បាន​ដាក់​ចេញ​នូវ​នយោបាយ​នានា​ ដើម្បី​ជំរុញ​ការ​អភិវឌ្ឍ​ជាពិសេស​នៅតំបន់​ទាំងនោះ។​ ប៉ុនែ្ត​ លោក​ ប៉ានីតាន់​ វាតានាយ៉ាកន​ (Panitan Wattanayagorn)​ អ្នកនាំពាក្យ​រដ្ឋាភិបាល​ និយាយថា​ ការ​កែទម្រង់​នោះ​មិន​ និយាយ​អំពី​តំបន់​ស្វ័យភាព​ទេ។

«មាន​ក្រុម​អ្នកសិក្សា​ជាច្រើន​កំពុងតែ​ធ្វើការ​ដោះស្រាយ​បញ្ហា​ទាំងនោះ​ ជាមួយ​នឹង​ការបង្កើត​ជា​តំបន់​ពិសេស​សម្រាប់​តម្រូវការ​របស់​ប្រជាពលរដ្ឋ​ក្នុង​តំបន់​ដោយ​យោង​ទៅតាម​រដ្ឋធម្មនុញ្ញ​សព្វថ្ងៃ។​ រដ្ឋធម្មនុញ្ញ​មិន​អនុញ្ញាត​ឲ្យ​មាន​ការ​បែងចែក​តំបន់​របៀប​នេះ​ដែល​អាច​នឹង​បន្ថយ​អធិបតេយ្យភាព​ ឬ ​ការ​រួបរួម​នៃ​ប្រទេស»។

ក្នុង​កិច្ច​ប្រឹងប្រែង​ដើម្បី​ឈ្នះ​ឆ្នោត​នៅ​ក្នុង​តំបន់​ដែល​ដើមឡើង​គ្រប់គ្រង​ដោយ​ក្រុម​អ្នក​ប្រជាធិបតេយ្យ​ គណបក្ស​ភឿថៃ​ចង់​ឲ្យ​មាន​ទម្រង់​វិមជ្ឈការ​ ប៉ុន្តែ​មិន​មែនលក្ខណៈ​ស្វ័យភាព​ពេញលេញ​អំពាវនាវ​ដោយក្រុម​កុបកម្ម​ទេ។​ កូដេប ​សៃក្រាចាង​ គឺ​អ្នកគាំទ្រ​គណបក្ស​ភឿថៃ​ និង​ អតីត​អ្នកនាំពាក្យ​របស់​គណបក្ស​នេះ។

«យើង​ជឿ​ថា​ លក្ខណៈ​ស្វ័យភាព​សម្រាប់​ខេត្ត​ទាំងនោះ​អាច​នឹង​អនុវត្ត​ទៅ​បាន។​ ប៉ុន្តែ​ វា​មិនមែន​ន័យថា​ ឲ្យ​មាន​សិទ្ធិ​អំណាច​ទាំងស្រុង​ទៅ​គ្រប់គ្រង​ខេត្ត​ទំាងនោះ​ទេ។ យើង​អាច​នឹង​អនុវត្ត​វិមជ្ឈការ​បន្ថែមទៀត​សម្រាប់​ប្រជាពលរដ្ឋ​នៅ​ទីនោះ។​ ហើយ​ ខ្ញុំ​គិត​ថា​ នេះ​ជា​គំរូ​មួយ​សម្រាប់​ប្រជាពលរដ្ឋ​នៅ​ប៉ែក​ខាងត្បូង។ ខ្ញុំ​ជឿជាក់​ថា​ នយោបាយ​មួយ​នឹង​នៅតែ​មាន​នៅ​ក្នុង​គណបក្ស​នេះ​»។

យោធា​ថៃ​ទប់ទល់​នឹង​ចលនា​តស៊ូ​នានា​ ក្រោម​បញ្ជា​របស់​រដ្ឋាភិបាល​ ក្នុង​ការ​គ្រប់គ្រង​ជន​ស៊ីវិល​ច្រើន​ដែល​នៅតែ​ជា​តំបន់​ឋិត​ក្រោម​ការ​គ្រប់គ្រង​យ៉ាង​តឹងរឹង។​ អ្នកវិភាគ​និយាយ​ថា​ យោធា​ថៃ​មាន​ការ​ភ័យខ្លាច​នឹង​ចលនា​តស៊ូ​ដើម្បី​ស្វ័យ​ភាពណាមួយ​ដែល​ក្រុម​បាតុករ​តាម​ទាមទារ​សម្រាប់​ឯករាជ្យ​ភាព​ពី​ប្រទេស​ថៃ៕

ប្រែ​សម្រួល​ដោយ ​ហ៊ុយ សម្ផស្ស

XS
SM
MD
LG