សកម្មជនថៃល្បីឈ្មោះ ២ រូប ដែលត្រូវបានចាប់ខ្លួនកាលពីខែមុនពាក់ព័ន្ធនឹងតួនាទីរបស់ពួកគេនៅក្នុងការតវ៉ាប្រឆាំងរដ្ឋាភិបាលថៃ ត្រូវបានតុលាការដោះលែងកាលពីថ្ងៃចន្ទ ក្រោយពីជាប់ឃុំអស់រយៈពេល ៥ ថ្ងៃ ក្រោមបទចោទប្រកាន់ថាបានរំលោភទៅលើលក្ខខណ្ឌឱ្យនៅក្រៅឃុំ។ ការដោះលែងនេះត្រូវបានធ្វើឡើង បន្ទាប់ពីប៉ូលិសបានប្រាប់តុលាការថាពុំមានមូលដ្ឋានណាមួយដែលត្រូវបន្តឃុំខ្លួនពួកគេ។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Reuters។
មេធាវីសិទ្ធិមនុស្សលោក Anon Nampa អាយុ ៣៦ ឆ្នាំ និងសកម្មជននិស្សិតលោក Panupong Jadnokអាយុ ២៤ ឆ្នាំ ត្រូវបានបញ្ជូនត្រឡប់ទៅពន្ធនាគារវិញកាលពីសប្តាហ៍មុន នៅពេលតុលាការសម្រេចថា សកម្មភាពនយោបាយរបស់ពួកគេកាលពីពេលថ្មីៗកន្លងទៅនេះគឺរំលោភលើលក្ខខណ្ឌនៅក្រៅឃុំរបស់ពួកគេ។ លោកទាំងពីរបានបដិសេធចំពោះការចោទប្រកាន់នេះ។
សកម្មជនទាំង ២ រូបបានចូលរួមនៅក្នុងការតវ៉ាស្ទើររាល់ថ្ងៃក្នុងរយៈពេល ២ ខែចុងក្រោយនេះ ដោយទាមទារឱ្យស្ថាបនយោធាថៃកុំឱ្យពាក់ព័ន្ធក្នុងរឿងនយោបាយ និងទាមទារឱ្យមានការដកលោកនាយករដ្ឋមន្រ្តី Prayuth Chan-ocha ចេញពីតំណែង។ លោក Prayuth បានឡើងកាន់អំណាចជានាយករដ្ឋមន្ត្រីដោយការធ្វើរដ្ឋប្រហារកាលពីឆ្នាំ ២០១៤។
លោក Panupong និងលោក Anon ត្រូវបានចាប់ខ្លួនជាច្រើនលើកច្រើនសារក្នុងពេលកន្លងមក ហើយលោកទាំងពីរស្ថិតក្នុងចំណោមអ្នកតវ៉ាជាច្រើននាក់ ដែលត្រូវបានចោទប្រកាន់នាពេលថ្មីៗនេះថាបានញុះញុង់ឱ្យមានភាពវឹកវរក្នុងសង្គម និងរំលោភលើគោលការណ៍មិនឱ្យប្រមូលផ្ដុំគ្នាច្រើន ដើម្បីជៀសវាងការឆ្លងជំងឺកូវីដ១៩៕
