ជនជាតិស៊ីរីអាយុ៣៦ឆ្នាំម្នាក់ បានជាប់គាំងនៅក្នុងអាកាសយានដ្ឋានរដ្ឋធានីប្រទេសម៉ាឡេស៊ី អស់រយៈពេលជាងមួយខែមកហើយ។
លោក Hassan al Kontar ដែលឋិតក្នុងកន្លែងប្តូរជើងយន្តហោះបានបង្ហោះវីដេអូអំពីជីវិតប្រចាំថ្ងៃរបស់គាត់នៅលើបណ្តាញសង្គម Twitter និងហ្វេសប៊ុក ដែលទាក់ទាញការយកចិត្តទុកដាក់របស់ក្រុមសិទ្ធិមនុស្ស និងប្រព័ន្ធផ្សព្វផ្សាយ។
លោកបាននិយាយថា លោកបានរស់នៅព្រលានយន្តហោះចាប់តាំងពីថ្ងៃទី៧ ខែមីនាហើយភ័យខ្លាចប៉ូលិសចាប់បញ្ជូនត្រឡប់ទៅប្រទេសស៊ីរីវិញ ដែលសង្គ្រាមស៊ីវិលកំពុងឆាបឆេះអស់រយៈពេល៧ ឆ្នាំមកហើយនោះ។
វីដេអូពី Kontar Twitter
លោក Hassan ជាអតីតអ្នកលក់ធានារ៉ាប់រង បាននិយាយថា លោករស់នៅរាជាណាចក្ររួមអារ៉ាប់អេមីរ៉ាត នៅពេលសង្គ្រាមផ្ទុះឡើងនៅក្នុងប្រទេសស៊ីរី។ បន្ទាប់ពីស្ថានទូតស៊ីរី នៅរាជាណាចក្ររួមអារ៉ាប់អេមីរ៉ាត មិនបន្តលិខិតឆ្លងដែនរបស់លោក លោកត្រូវបានគេនិរទេសទៅទីក្រុង Kuala Lumpur នៅឆ្នាំ២០១៦។ លោកត្រូវក្រុមហ៊ុនអាកាសចរណ៍បដិសេធមិនឲ្យលោកធ្វើដំណើរទៅប្រទេសអេក្វាឌ័រ។
បន្ទាប់មកលោកបានព្យាយាមធ្វើដំណើរទៅកម្ពុជា ប៉ុន្តែត្រូវបានអាជ្ញាធរអន្តោប្រវេសន៍កម្ពុជាមិនឲ្យចូល និងបាននិរទេសត្រឡប់ទៅកូឡាឡាំពួរវិញ ទីដែលលោករស់នៅដោយអាស្រ័យលើសប្បុរសធម៌របស់បុគ្គលិកព្រលានយន្តហោះនិងក្រុមហ៊ុនអាកាសចរណ៍។
ទីភ្នាក់ងារជនភៀសខ្លួនរបស់អង្គការសហប្រជាជាតិបានបញ្ជាក់ពីចុះជួបលោក Hassan ប៉ុន្តែបានមិនផ្តល់ព័ត៌មានលម្អិតដោយលើកហេតុផលថា ជារឿងផ្ទាល់ខ្លួនទេ។ លោក Hassan និយាយថា ទីភ្នាក់ងារជនភៀសខ្លួនរបស់អង្គការសហប្រជាជាតិមិនបានប្រាប់ថា រយៈពេលប៉ុន្មានថ្ងៃទើបក្រុមសិទ្ធិមនុស្សអាចរកបានកន្លែងជ្រកកោនសម្រាប់លោកនោះទេ៕
