ពួកឧទ្ទាមស៊ីរី ជាច្រើនក្រុម បាននិយាយនៅថ្ងៃច័ន្ទនេះថា ពួកគេ នឹងបើក«សមរភូមិ» ប្រយុទ្ធ ជាការឆ្លើយតបនឹងការរំលោភបំពានពីសំណាក់ក្រុមគាំទ្ររដ្ឋាភិបាលទៅលើកិច្ចព្រមព្រៀងឈប់បាញ់គ្នាមួយ ដែលចូលជាធរមានចាប់តាំងពីចុងខែកុម្ភៈមក។
បទឈប់បាញ់គ្នានេះ បានកាត់បន្ថយអំពើហិង្សាយ៉ាងច្រើននៅក្នុងប្រទេសស៊ីរី ដែលនៅទីនោះ ប្រជាជនរាប់សែននាក់ បានស្លាប់និងរាប់លាននាក់ បានភៀសខ្លួន ចាប់តាំងពីមានការតវ៉ានិងការបង្ក្រាបដោយហិង្សាមួយ បានវិវត្តទៅជាសង្គ្រាមស៊ីវិលកាលពី៥ឆ្នាំមុន។
ប៉ុន្តែ ភាគីទាំងពីរ បានចោទគ្នាទៅវិញទៅមក ថាបានរំលោភបំពានកិច្ចព្រមព្រៀងនេះ ម្តងហើយម្តងទៀត ក្នុងអំឡុងពេល២ខែចុងក្រោយនេះ។ ក្រុមឧទ្ទាមទាំងនេះ ដែលរួមមានក្រុមកងទ័ពរំដោះស៊ីរីផង បានប្រកាសនៅក្នុងសេចក្តីថ្លែងការណ៍រួមគ្នាមួយថា ពួកគេ ប្តេជ្ញាថា នឹងសងសឹក «ដោយប្រើកម្លាំងបាយ»។
អំពើហិង្សា បានកើនឡើងក្នុងរយៈពេលពីរបីសប្តាហ៍កន្លងមកនេះ ក្នុងប្រទេសស៊ីរី ប៉ែកខាងជើង ជាពិសេសនៅក្នុងខេត្តAleppo ដែលនៅទីនោះ កងកម្លាំងរដ្ឋាភិបាល និងក្រុមសកម្មប្រយុទ្ធរដ្ឋឥស្លាម ហើយនិងក្រុមឧទ្ទាម បានវាយប្រយុទ្ធគ្នា៕
