កាលពីថ្ងៃអាទិត្យ រដ្ឋាភិបាលស៊ីរីបាននិយាយថា កងកម្លាំងពួកគេបានវាយយកបានពីពួករដ្ឋឥស្លាមនូវក្រុង Qaryatain នៅក្នុងផ្នែកកណ្តាលនៃប្រទេសស៊ីរី មួយសប្តាហ៍ក្រោយពីបានវាយយកក្រុងប្រវត្តិសាស្ត្រ Palmyra មកវិញ។
បណ្តាញផ្សាយព័ត៌មានរបស់រដ្ឋបាននិយាយថា ការវាយយកបានក្រុង Qaryatain ដោយមានជំនួយពីការវាយប្រហារតាមអាកាសដោយរុស្ស៊ី ផ្តល់ឱ្យរដ្ឋាភិបាលនូវជ័យជម្នះខាងយុទ្ធសាស្ត្រមួយដោយបានកាន់កាប់ផ្លូវប្រេង និងឧស្ម័នរវាងតំបន់រដ្ឋធានីដាម៉ាស់ និងវាលប្រេងនៅក្នុងប៉ែកខាងកើតនៃប្រទេសស៊ីរី។
ក៏ប៉ុន្តែអង្គការ Syrian Observatory for Human Rights ដែលមានមូលដ្ឋានក្នុងប្រទេសអង់គ្លេសដែលតាមឃ្លាំមើលការប្រយុទ្ធគ្នាក្នុងប្រទេសស៊ីរីតាមរយៈការផ្តល់ព័ត៌មានពីខាងក្នុងប្រទេសបាននិយាយថា ការអះអាងរបស់រដ្ឋាភិបាលជាការប្រញាប់ពេក ទោះណាជាអង្គការនេះបាននិយាយ ថាពួកយុទ្ធជនរដ្ឋឥស្លាម «ជិតចាញ់ហើយ» ក៏ដោយ។ ក្រុមឃ្លាំមើលស្ថានការណ៍ក្នុងប្រទេសស៊ីរីនេះបានថ្លែងថាពួកជីហាដនៅតែត្រួតត្រាផ្នែកខាងកើត និងខាងអាគ្នេយ៍នៃក្រុង Qaryatain នៅឡើយទេ ក៏ប៉ុន្តែយុទ្ធជនខ្លះនៃក្រុមនេះបានចាប់ផ្តើមដកថយទៅកាន់តំបន់ភ្នំនៅជិតទីនោះហើយ។
ក្រុង Qaryatain ធ្លាប់ជាកន្លែងរស់នៅរបស់ប្រជារាស្ត្រស៊ីរីគោរពគ្រិស្តសាសនាច្រើនក្រាស់ក្រែលហើយពួកគេរាប់សិបនាក់បានត្រូវចាប់ពង្រត់ដោយពួកជ្រុលនិយម។ ជនខ្លះក្នុងបណ្តាពួកជនទាំងនេះបានត្រូវដោះលែង ក៏ប៉ុន្តែអ្នកខ្លះទៀតបានត្រូវបង្ខំឱ្យចុះហត្ថលេខាលើការសន្យាមួយថា នឹងបង់ពន្ធដារមួយ ត្រូវដាក់កំហិតលើពួកអ្នកមិនកាន់សាសនាឥស្លាម។
ការរុលទៅមុខលើក្រុង Qaryatain ដែលពួកជនសកម្មប្រយុទ្ធបានកាន់កាប់ចាប់តាំងពីខែសីហាមុនមក កើតមានឡើងមួយសប្តាហ៍ក្រោយកងកម្លាំងរដ្ឋាភិបាលស៊ីរីវាយយកបានក្រុងបុរាណ Palmyra ដែលនៅទីនោះពួកយុទ្ធជនរដ្ឋឥស្លាមបានបំផ្លាញបុរាណវត្ថុប្រវត្តិសាស្ត្រដែលមានរយៈកាលរាប់សតវត្សរ៍មកហើយ។ នៅក្នុងក្រុង Qaryatain ពួកយុទ្ធជនរដ្ឋឥស្លាម បានកម្ទេចវិហារគ្រិស្តសាសនា Saint Eliane៕
