ក្រុមឃ្លាំមើលស្ថានការណ៍សង្គ្រាមនៅស៊ីរីនិយាយថាការវាយប្រហារតាមអាកាសរបស់រដ្ឋាភិបាលបានសម្លាប់ជនស៊ីវិលយ៉ាងតិច៣៧នាក់ក្នុងតំបន់ដែលគ្រប់គ្រងដោយក្រុមឧទ្ទាមរដ្ឋឥស្លាម។
ក្រុមអង្គការសិទ្ធិមនុស្សដែលហៅថា The Syrian Observatory for Human Rights និយាយថាមានក្មេង៧នាក់និងស្រ្តី២នាក់ស្ថិតក្នុងចំណោមមនុស្សស្លាប់ក្នុងការវាយប្រហារលើតំបន់ អាល់បាប (Al-Bab) និងក្រុង កាបេស៊ីន ( Qabaseen) ដែលជាតំបន់ជាប់គ្នា។
ក្រុមអង្គការសិទ្ធិមនុស្សអង់គ្លេសដែលមានមូលដ្ឋានក្នុងប្រទេសស៊ីរី បានបង្ហាញតួលេខចំនួនមនុស្សស្លាប់ដល់ទៅ២១នាក់ក្នុងការវាយប្រហារតាមអាកាសកាលពីថ្ងៃព្រហស្បតិ៍។
ក្រុង អាលីប៉ូ (Aleppo) នៅភាគឥសានប្រទេសស៊ីរី កំពុងកាន់កាប់ដោយក្រុមរដ្ឋឥស្លាម និងបានក្លាយជាគោលដៅនៃការវាយប្រហារដោយការទម្លាក់គ្រាប់បែកពីរដ្ឋាភិបាលម្តងហើយម្តងទៀត។ យុទ្ធនាការវាយប្រហារតាមអាកាសដឹកនាំ ដោយស.រ.អា.ក៏មានបំណងបណ្តេញក្រុមឧទ្ទាមចេញពីទីតាំងដ៏រឹងម៉ាំនានានៅភាគឥសានស៊ីរីនិងភាគខាងជើងអ៊ីរ៉ាក់ផងដែរ៕
