ការស្ទង់មតិមួយអំពីពលរដ្ឋអាមេរិកាំងដើមកំណើតអាស៊ីដែលត្រូវបានចេញផ្សាយកាលពីថ្ងៃពុធ បង្ហាញថាជាង៣ភាគ៤នៃអ្នកចូលរួមពេញចិត្តសហរដ្ឋអាមេរិក។ មានអ្នកចូលរួមតែ២០ភាគរយប៉ុណ្ណោះ ពេញចិត្តចិន។
មជ្ឈមណ្ឌលស្រាវជ្រាវ Pew បានស្ទង់មតិពលរដ្ឋពេញវ័យអាមេរិកាំងដើមកំណើតអាស៊ីជាង៧០០០នាក់រវាងខែកក្កដាឆ្នាំ២០២២និងខែមករាឆ្នាំ២០២៣ ដោយសំណួរផ្តោតលើទស្សនៈអំពីប្រទេសកំណើតរបស់ពួកគេនិងរបស់ជនជាតិផ្សេងៗនៅអាស៊ី។ អ្នកចូលរួមក្នុងការស្ទង់មតិនេះរួមមានអ្នកដែលមានទំនាក់ទំនងជាមួយជនជាតិជប៉ុនកូរ៉េ តៃវ៉ាន់ ហ្វីលីពីន វៀតណាម ឥណ្ឌា និងចិន។
ពេលត្រូវបានសួរអំពីប្រទេសកំណើតរបស់ពួកគេផ្ទាល់ ពលរដ្ឋអាមេរិកាំងដើមកំណើតចិនតែ៤១ភាគរយប៉ុណ្ណោះ និយាយថាពួកគេពេញចិត្តខ្លាំងឬពេញចិត្តបង្គួរចំពោះប្រទេសចិន។ ក្រុមជនជាតិផ្សេងទៀតដែលត្រូវបានស្ទង់មតិ ភាគច្រើនពេញចិត្តប្រទេសកំណើតរបស់ខ្លួន។
ក្នុងចំណោមពលរដ្ឋអាមេរិកដើមកំណើតអាស៊ីផ្សេងទៀត មានតែ១៤ភាគរយប៉ុណ្ណោះនិយាយថាពួកគេពេញចិត្តចិន។
ការស្ទង់មតិរបស់មជ្ឈមណ្ឌលស្រាវជ្រាវ Pew រកឃើញថា ពេលពលរដ្ឋអាមេរិកាំងដើមកំណើតចិនរស់នៅក្នុងសហរដ្ឋអាមេរិកកាន់តែយូរ ពួកគេកាន់តែមិនសូវពេញចិត្តចិន។សម្រាប់អ្នករស់នៅក្នុងសហរដ្ឋអាមេរិកចាប់ពី១០ឆ្នាំចុះ ៥៦ភាគរយមានទស្សនៈវិជ្ជមាន ធៀបនឹង៣៨ភាគរយ សម្រាប់អ្នករស់នៅក្នុងសហរដ្ឋអាមេរិកចាប់ពី២១ឆ្នាំឡើងទៅ។
ពេលត្រូវបានសួរថាតើពួកគេនឹងវិលត្រឡប់ទៅរស់នៅប្រទេសកំណើតជីដូនជីតារបស់ពួកគេវិញទេ ពលរដ្ឋអាមេរិកាំងដើមកំណើតចិន ជាក្រុមតិចជាងគេដោយ១៦ភាគរយនិយាយថាពួកគេនឹងត្រឡប់ទៅវិញ ធៀបនឹង២៨ភាគរយសម្រាប់ពលរដ្ឋអាមេរិកាំងដើមកំណើតអាស៊ីផ្សេងទៀត៕
