សង្គ្រាមក្នុងប្រទេសស៊ូដង់ចូលក្នុងខែទីបីហើយនៅថ្ងៃព្រហស្បតិ៍នេះ នៅពេលការសម្លាប់អភិបាលរដ្ឋម្នាក់បានកំណត់កំណើនភាពតានតឹងថ្មីមួយក្នុងតំបន់ Darfur នាផ្នែកខាងលិចប្រទេស។
តាំងពីថ្ងៃទី ១៥ ខែមេសាមក កងទ័ពជាតិដឹកនាំដោយលោក Abdel Fattah al-Burhan និងពួកទាហានប៉ារ៉ានៃកងកម្លាំងគាំទ្ររហ័ស (RSF) ដឹកនាំដោយអតីតអនុប្រធានរបស់លោក គឺលោក Mohamed Hamdan Daglo បានប្រយុទ្ធគ្នាខ្លាំងក្លា ហើយបានបំផ្លាញសង្កាត់ជាច្រើននៃរដ្ឋធានីខាទុំ។
ការប្រយុទ្ធគ្នាបានរាលដាលឆាប់រហ័សទៅកាន់ខេត្តនានា ជាពិសេសតំបន់ Darfur ហើយបានបណ្តាលឱ្យមនុស្សយ៉ាងតិចណាស់ ១.៨០០ នាក់ស្លាប់។ នេះបើតាមតួលេខថ្មីបំផុតកាលពីខែមុនរបស់គម្រោង Armed Conflict Location and Event Data Project។
លោក Burhan បានចោទប្រកាន់កងកម្លាំង RSF អំពីការសម្លាប់លោក Khamis Abdullah Abakar អភិបាលរដ្ឋ West Darfur នៅក្នុង «វាយប្រហារមានភាពវៀចវេរ» មួយកាលពីថ្ងៃពុធ។
លោក Abakar ត្រូវបានចាប់ខ្លួន ហើយបន្ទាប់មកត្រូវបានសម្លាប់ នៅក្រោយលោកបានរិះគន់ពួកទាហានប៉ារ៉ានៅក្នុងសម្ភាសន៍មួយតាមទូរសព្ទជាមួយបណ្តាញទូរទស្សន៍ប្រទេសអារ៉ាប៊ីសាអ៊ូឌីតមួយ។
សមាគមមេធាវី Darfur បានថ្កោលទោស« ការធ្វើឃាត» លោក Abakar ថា ជាសកម្មភាព«ព្រៃផ្សៃនិងឃោរឃៅ»។
បើតាមអង្គការទេសន្តរប្រវេសន៍អន្តរជាតិថា នៅទូទាំងប្រទេស សង្គ្រាមក្នុងប្រទេសស៊ូដង់បានធ្វើឱ្យមនុស្សប្រមាណ ២លាន ២សែននាក់ ខ្ចាត់ព្រាត់ពីផ្ទះសម្បែងរបស់ពួកគេ៕
