ភ្ជាប់​ទៅ​គេហទំព័រ​ទាក់ទង

ជន​ជាតិ​អាមេរិកាំង​អ៊ីស្លាម​កំណត់​អត្តសញ្ញាណ​ជា​មួយ​សហរដ្ឋ​អាមេរិក​និង​អ៊ីស្លាម​ស្មើគ្នា​


ជន​ជាតិ​អាល់បានី​កាន់​សាសនា​ឥស្លាម​សូត្រ​ធម៌​​នៅ​ព្រះ​វិហារ​ឥស្លាម​នៅ​ទី​ក្រុង​ឌី​ត្រូយ​ នៅ​ក្នុង​រដ្ឋ​មីស៊ីហ្គិន​ស.រ.អ.។​

ចាប់​តាំង​ពី​ឆ្នាំ​២០០៨​មក​ ក្រុម​ស្រាវ​ជ្រាវ​បាន​ធ្វើ​បទ​សម្ភាសន៍​រាប់​សែន​ ជា​មួយ​ពលរដ្ឋ​អាមេរិកាំង​ដែល​មាន​ជំនឿ​ផ្សេងៗ​គ្នា​ ក្នុង​កិច្ច​ប្រឹង​ប្រែង​ដើម្បី​ពិនិត្យ​មើល​ទំនាក់​ទំនង​ខាង​នយោបាយ​ សង្គម​ និង​សាសនា​របស់​ជន​ជាតិ​អាមេរិកាំង​កាន់​សាសនា​អ៊ីស្លាម​ ព្រម​ទាំង​វាយ​តម្លៃ​អំពី​ឥរិយាបថ​ចំពោះ​អ្នក​ទាំង​នោះ។​ ការ​សិក្សា​នេះ​ត្រូវ​បាន​ចេញ​ផ្សាយ​កាល​ពី​ថ្ងៃ​អង្គារ​ ហើយ​បាន​បង្ហាញ​ពី​ការ​រក​ឃើញ​ដ៏​គួរ​ឲ្យ​ចាប់​អារម្មណ៍​មួយ​ចំនួន។

លោក​ មហាមេឌ​ យូនីស​ (Mohamed​ Younis)​ អ្នក​វិភាគ​ជាន់​ខ្ពស់​នៃ​មជ្ឈមណ្ឌល​អាប៊ូដាប៊ី​ហ្គាល់ឡិប (Abu​ Dhabi​ Gallup)​ បាន​សង្ខេប​ការ​រក​ឃើញ​នៃ​របាយការណ៍​ថ្មី​មួយ​ដែល​មាន​ចំណង​ជើង​ថា​ «ជន​ជាតិ​អាមេរិកាំង​កាន់​សាសនា​អ៊ីស្លាម​ ៖ជំនឿ​ សេរីភាព​ និង​អនាគត»។

«ជន​ជាតិ​អាមេរិកាំង​កាន់​សាសនា​អ៊ីស្លាម​គឺ​គ្រាន់​តែ​បញ្ជាក់​ថា​ ពួក​គេ​ជា​ជន​ជាតិ​អាមេរិកាំង​តែ​ប៉ុណ្ណោះ។​ ពួក​គេ​ខ្វាយ​ខ្វល់​ខ្លាំង​ពី​ជំនឿ​របស់​ពួក​គេ​ ប៉ុន្តែ​ពួក​គេ​ក៏​ព្រួយ​បារម្ភ​ខ្លាំង​អំពី​ប្រទេស​របស់​ពួក​គេ​ដែរ»។

លោក​ យូនីស​ មាន​ប្រសាសន៍​ថា​ អស់​រយៈ​ពេល​មួយ​ទសវត្សរ៍​បន្ទាប់​ពី​ការ​វាយ​ប្រហារ​របស់​ភេរវកម្ម​កាល​ពី​ថ្ងៃ​ទី​១១​ ខែ​កញ្ញា​ ទៅ​លើ​សហរដ្ឋ​អាមេរិក​ ការ​សិក្សា​នេះ​បាន​រក​ឃើញ​ថា​ ជន​ជាតិ​អាមេរិកាំង​ភាគ​ច្រើន​មក​ពី​គ្រប់​ជំនឿ​ទាំង​អស់​ ជឿ​ជាក់​ថា​ ជន​ជាតិ​អាមេរិកាំង​កាន់​សាសនា​អ៊ីស្លាម​ស្មោះ​ស្ម័គ្រ​ជា​មួយ​សហរដ្ឋ​អាមេរិក។​ លោក​បាន​ប្រាប់​ក្រុម​អ្នក​យក​ព័ត៌មាន​នៅ​ឯ​សនិ្នសិទ​កាសែត​មួយ​ នៅ​រដ្ឋធានី​វ៉ាស៊ីនតោន​ ថា​ទស្សនៈ​នេះ​បាន​បង្ហាញ​ឲ្យ​ឃើញ​នៅ​ក្នុង​ការ​ឆ្លើយ​តប​របស់​ជន​ជាតិ​អាមេរិកាំង​កាន់​សាសនា​អ៊ីស្លាម​ ចំពោះ​សំណួរ​ស្តី​ពី​អត្តសញ្ញាណ។

«អ្វី​ដែល​យើង​បាន​រក​ឃើញ​គឺ​ថា ​ជន​ជាតិ​អាមេរិកាំង​កាន់​សាសនា​អ៊ីស្លាម​កំណត់​អត្តសញ្ញាណ​របស់​ខ្លួន​ស្មើៗ​គ្នា​ជាមួយ​សហរដ្ឋ​អាមេរិក​ ដូច​ដែល​ពួក​គេ​បាន​កំណត់​អត្តសញ្ញាណ​របស់​ខ្លួន​ជាមួយ​សាសនា​របស់​ខ្លួន​ដែរ»។

ជន​ជាតិ​អាមេរិកាំង​កាន់​សាសនា​អ៊ីស្លាម​ចំនួន​៧​នាក់​ក្នុង​ចំណោម​១០​នាក់​ បាន​និយាយ​ថា ​ពួក​គេ​កំណត់​អត្តសញ្ញាណ​របស់​ខ្លួន​ជាមួយ​សហរដ្ឋ​អាមេរិក​ «ខ្លាំង​ណាស់​» ឬ​«ខ្លាំង​បំផុត»​ ហើយ​ចំនួន​មនុស្ស​ស្រដៀង​គ្នា​នេះ​ដែរ​ បាន​ថ្លែង​ដូច​គ្នា​អំពី​សាសនា​អ៊ីស្លាម។

ក្រុម​អ្នក​ស្រាវ​ជ្រាវ​បាន​រក​ឃើញ​ថា​ មនុស្ស​ភាគ​ច្រើន​នៃ​ក្រុម​សាសនា​ធំៗ​ដែ​ល​ត្រូវ​បាន​ស្ទង់​មតិ​ បាន​និយាយ​ថា​ ពួក​គេ​មិន​ជឿ​ថា​ ជន​ជាតិ​អាមេរិកាំង​កាន់​សាសនា​អ៊ីស្លាម​ មាន​សមានចិត្ត​ជាមួយ​ក្រុម​ភេរវកម្ម​អាល់កៃដា​ (al-Qaida)​ នោះ​ទេ​ ប៉ុន្តែ​ភាគ​ច្រើន​ក៏​បាន​ថ្លែង​ថា​ ក្រុម​អ្នក​កាន់​សាសនា​អ៊ីស្លាម​ត្រូវ​តែ​និយាយ​ឲ្យបាន​ច្រើន​ជាង​មុន​ប្រឆាំង​នឹង​អំពើ​ភេរវកម្ម។

ទាក់​ទង​នឹង​គុណភាព​នៃ​ការ​រស់​នៅ​វិញ​ ជន​ជាតិ​អាមេរិកាំង​កាន់​សាសនា​អ៊ីស្លាម​មាន​សុទិដ្ឋិនិយម​បំផុត​អំពី​អនាគត​របស់​ក្រុម​អ្នក​សាសនា​ទាំង​អស់​ដែល​ត្រូវ​បាន​ស្ទង់​មតិ។

លោក​ យូនីស​ បាន​ឲ្យ​ដឹង​ថា​ ជា​រួម​ ជន​ជាតិ​អាមេរិកាំង​កាន់​សាសនា​អ៊ីស្លាម​មាន​ភាព​ស្រដៀង​គ្នា​ជាមួយ​អ្នក​ឆ្លើយ​សំណួរ​ដែល​កាន់​សាសនា​កាតូលីក​ (Catholic)​ ប្រូតេស្តង់​ (Protestant)​ ម័រម៉ុន​ (Mormon)​ និង​ ជ្វីប​ (Jew)​ នៅ​ពេល​ត្រូវ​បាន​សុំ​ឲ្យ​កំណត់​ខ្លួន​ឯង​ថា​ជា​មនុស្ស​ត្រដាបត្រដួស​ រងទុក្ខ​ឬ លូតលាស់​ទៅ​មុខ។

«យោង​តាម​ស្ថិតិ​ ជន​ជាតិ​អាមេរិកាំង​កាន់​សាសនា​អ៊ីស្លាម​ពិត​ជា​មាន​ភាព​ស្រដៀង​គ្នា​ទៅ​នឹង​ក្រុម​សាសនា​ធំៗ​ផ្សេង​ទៀត​នៅ​សហរដ្ឋ​អាមេរិក​ ចំពោះ​ទស្សនៈ​វិស័យ​របស់​អ្នក​ឆ្លើយសំណួរ​ ដែល​ស្ថិត​ក្នុង​ប្រភេទ​ «​លូត​លាស់​ទៅ​មុខ»។

៦០​ភាគរយ​នៃ​ជន​ជាតិ​អាមេរិកាំង​កាន់​សាសនា​អ៊ីស្លាម​ បាន​ពណ៌នា​ខ្លួន​ឯង​ថា​ មាន​ភាព​រីក​លូតលាស់​ ហើយ​មាន​តែ​បី​ភាគរយ​ទេ​ ដែល​និយាយ​ថា​ ពួក​គេ​រងទុក្ខ​លំបាក។​ ក្នុង​ករណី​ទាំង​ពីរ​នេះ​ ការ​ឆ្លើយ​តប​របស់​ពួក​គេ​គឺ​ស្ទើរ​តែ​ដូច​គ្នា​ទៅ​នឹង​ជន​ជាតិ​អាមេរិកាំង​មាន​ដើម​កំណើត​ជ្វីប​ដែរ។

លោក​ មហាមេដ​ យូនីស​ អ្នក​ស្រាវ​ជ្រាវ​ បាន​ឲ្យ​ដឹង​ថា​ ជារឿយៗ​ ជន​ជាតិ​អាមេរិកាំង​កាន់​សាសនា​អ៊ីស្លាម​មាន​ភាព​ជិត​ស្និទ្ធ​បំផុត​ជាមួយ​ជន​ជាតិ​អាមេរិកាំង​កាន់​សាសនា​ជ្វីប​ ដោយ​ឈរ​លើ​ទស្សនៈ​សង្គម​និង​នយោបាយ​របស់​ពួក​គេ។

«ឥឡូវ​នេះ​ ជន​ជាតិ​អាមេរិកាំង​មាន​ដើម​កំណើត​ជ្វីប​ ទំនង​ជា​មាន​ចំនួន​ច្រើន​ជាង​ក្រុម​អ្នក​កាន់​សាសនា​កាតូលីក​ ប្រូតេស្តង់​ និង​ ម័រម៉ុន​ ដែល​ចាត់​ទុក​ក្រុម​អ្នក​កាន់​សាសនា​អ៊ីស្លាម​ថា​ស្មោះស្ម័គ្រ​ជាមួយ​សហរដ្ឋ​អាមេរិក។​ ពួក​គេ​ក៏​យល់​ស្រប​គ្នា​ជាមួយ​ជន​ជាតិ​អាមេរិកាំង​កាន់​សាសនា​អ៊ីស្លាម​ដែរ​ ហើយ​ទំនង​ជា​មាន​ចំនួន​ច្រើន​ជាង​ក្រុម​អ្នក​កាន់​សាសនា​កាតូលីក​ ប្រូតេស្តង់​ និង​ ម័រម៉ុន​ ដែល​ជឿថា​ក្រុម​អ្នក​កាន់​សាសនា​អ៊ីស្លាម​នៅ​សហរដ្ឋ​អាមេរិក​ គ្មាន​សមានចិត្ត​ជាមួយ​អង្គការ​ភេរវកម្ម​អាល់កៃដា​នោះ​ទេ។​ ជា​ការ​ពិត​ណាស់​ ពួក​គេ​ទំនង​ជា​មាន​ចំនួន​លើស​ពី​ជន​ជាតិ​អាមេរិកាំង​កាន់​សាសនា​អ៊ីស្លាម​ក្នុង​ការ​និយាយ​ថា​ ក្រុម​អ្នក​កាន់​សាសនា​អ៊ីស្លាម​នៅ​សហរដ្ឋ​អាមេរិក​ ជួប​ប្រទះ​នូវ​ការ​រើសអើង​យ៉ាង​ខ្លាំង។​ ហើយ​បន្ទាប់​មក ​ជន​ជាតិ​អាមេរិកាំង​ដែល​មាន​ដើម​កំណើត​ជ្វីប​ និង​ដែល​កាន់​សាសនា​អ៊ីស្លាម​ ទំនង​ជា​ក្រុម​សាសនា​ចំនួន​ពីរ​ដែល​និយាយ​ថា ​សង្គ្រាម​នៅ​ប្រទេស​អ៊ីរ៉ាក់​ជា​កំហុស​ឆ្គង​មួយ»។

អ៊ីមាំ​ មហាមេដ​ ម៉ាហ្គីដ​ (Mahamed​ Magid) អ្នក​គណៈវិនិច្ឆ័យ​ម្នាក់​ បាន​និយាយ​ថា​ លោក​មាន​ការ​ភ្ញាក់​ផ្អើល​ចំពោះ​ការ​រកឃើញ​នេះ។

«យើង​ធ្វើ​ការ​ជិតស្និទ្ធ​ជាមួយ​សហគមន៍​ជ្វីប​នៅក្នុង​វិស័យ​ជា​ច្រើន​ ប៉ុន្តែ​ ជា​ឧទាហរណ៍​ ភាគរយ​នៃ​ជន​ជាតិ​អាមេរិកាំង​មាន​ដើម​កំណើត​ជ្វីប​ ដែល​មាន​ទស្សនៈ​ដូច​គ្នា​អំពី​សង្គ្រាម​នៅ​អ៊ីរ៉ាក់​ និង​កិច្ចការ​ដទៃ​ទៀត​ ខ្ញុំ​បាន​ខ្សឹប​ដាក់​ត្រចៀក​លោក​ ដេវីត​ (David)។​ ជា​ការ​ពិត​ ខ្ញុំ​បាន​និយាយ​ថា​ «ការ​រកឃើញនោះ​ជា​ការ​គួរ​ឲ្យ​ភ្ញាក់​ផ្អើល​ខ្លាំង​ណាស់»។

អ៊ីមាំ​បាន​និយាយ​សំដៅ​ទៅ​សហ​អ្នក​គណៈវិនិច្ឆ័យ​ដូច​គ្នា​ គឺ​រ៉ាបាយ​ ដេវីត​ សាភើស្តេន​ (Rabbi​ David​ Saperstein)​ ដែល​បាន​និយាយ​ថា​ លោក​ជឿ​ថា​មាន​ហេតុផល​ជាច្រើន​ ចំពោះ​ទស្សនៈ​ស្រ​ដៀង​គ្នា​ទាំង​នេះ។

«ជនជាតិ​ជ្វីប​ចាត់​ទុក​ខ្លួន​ឯង​ថា​ជា​ជន​រងគ្រោះ​សុទ្ធសាធ​នៃ​ការ​ធ្វើ​ទុក្ខ​បុក​ម្នេញ​ខាង​សាសនា​ នៅ​ក្នុង​ប្រវត្តិសាស្ត្រ​ពិភពលោក​ក្នុង​ពេល​៣​ពាន់​ឆ្នាំ​កន្លង​ទៅនេះ​ ហើយ​អាស្រ័យ​ហេតុ​នេះ​ទើប​ពួក​គេ​តែង​តែ​កំណត់​អត្តសញ្ញាណ​ជាមួយ​នឹង​អ្នក​ដែល​ទទួល​រង​នូវ​ការ​ធ្វើ​ទុក្ខ​បុក​ម្នេញ​ខាង​សាសនា​ និង​ការ​រើសអើង»។

លោក ​មហាមេដ​ យូនីស​ អ្នក​វិភាគ​ បាន​ផ្តល់​អនុសាសន៍​ថា​ រដ្ឋាភិបាល​សហរដ្ឋ​អាមេរិក​គួរ​ចាត់​ទុក​ ការ​ប្រឆាំង​និង​ជន​ជាតិ​អ៊ីស្លាម​ និង​ស្ថានភាព​ប្រឆាំង​ជ​ន​ជាតិ​ជ្វីប​ ថា​ជា​បាតុភូត​ដែល​ទាក់​ទង​គ្នា។ ​ក្រុម​គណៈវិនិច្ឆ័យ​បាន​និយាយ​ថា​ ពួក​គេ​សង្ឃឹម​ថា ​ការ​សិក្សា​របស់​អាប៊ូដាប៊ី​ហ្គាឡិប​ នឹង​ជួយ​ដោះស្រាយ​ទស្សនៈ​ខុស​ឆ្គង​ទៅ​លើ​ជន​ជាតិ​អាមេរិកាំង​កាន់​សាសនា​អ៊ីស្លាម៕

ប្រែ​សម្រួល​ដោយ​ លី សុខឃាង

XS
SM
MD
LG