ពលរដ្ឋខ្មែរម្នាក់ ដែលមករៀននៅសរអានៅក្នុងឆ្នាំ១៩៦២ គឺ លោក ទន់ សុវណ្ណ បាន ក្លាយជាជនភៀសខ្លួន ហើយនឹងក្រោយមកក្លាយជាជនអន្តោប្រវេសនៅក្នុងប្រទេស អាមេរិក។ លោកបានសម្រេចគោលបំណងជាច្រើនរបស់លោក ក្នុងរយៈពេល ៤០ ឆ្នាំកន្លងមកលើទឹកដីអាមេរិក។ ក្នុងនោះមានដូចជាការជួយសហគមខ្មែរជាច្រើនបែប បានជួយជនអន្តោប្រវេសខ្មែរ បានជួយបង្កើតវត្តអារាម បានជួយបំពេញកិច្ចការ សំខាន់ៗ ក្នុងរដ្ឋការអាមេរិកាំង បានជួយផ្នែកទំនាក់ទំនងជាមួយនឹងជាតិសាសន៍ ដ៍ទៃ និងកិច្ចការផ្សេងៗទៀត។ លោក សុខ ខេមរា នៃ VOA បានជួបសម្ភាសលោក បណ្ឌិត ទន់ សុវណ្ណកាលពីដើមខែកញ្ញានៅក្នុងវត្ត ពុទ្ធិការាម ក្នុងក្រុង Silver Springs រដ្ឋ Maryland។ លោកសុវណ្ណក្នុងវ័យជាង៧០ឆ្នាំ បានថ្លែងថា ក្តីប្រាថ្នាសំខាន់មួយ ទៀតរបស់លោកគឺការចង់ឃើញរដ្ឋាភិបាលស.រ.អា យកចិត្តទុកដាក់នឹងពុទ្ធសាសនាបន្ថែមទៀត ដោយអនុញាតិឲ្យមានការរៀបចំពិធីបុណ្យ វិសាខបូជាក្នុងសេតវិមានដូច សាសនាដ៏ទៃ។
កាលពីជាង៤០ឆ្នាំមុន លោក ទន់ សុវណ្ណ ដែលមានស្រុកកំណើតនៅខេត្តបាត់ដំបង នោះបានមកដល់សហរដ្ឋអាមេរិក ក្នុងនាមជានិស្សិតមួយរូប។
នៅពេលដែលប្រទេសកម្ពុជាធ្លាក់ក្នុងសង្គ្រាមនិងភាពវឹកវរ លោក ទន់ សុវណ្ណ បានជ្រកកោននៅក្នុងសហរដ្ឋអាមេរិកជាជនភៀសខ្លួនហើយកសាងជីវិតរបស់លោកជាជនអន្តោប្រវេសន៍មួយរូប។
លោកបានបន្តបម្រើការឲ្យរដ្ឋាភិបាលសហព័ន្ធនិងរដ្ឋាភិបាលក្នុងស្រុកជាង ៣៥ឆ្នាំនៅក្នុងតំបន់រដ្ឋធានីវ៉ាស៊ីនតោន ហើយលោកបានចូលរួមនៅក្នុងក្រុមអង្គការផ្នែក កិច្ចការសង្គមជាច្រើន ដើម្បីលើកកំពស់ជំនឿតាមបែបព្រះពុទ្ធសាសនា ការពិភាក្សាសាសនា និងកិច្ចការអន្តោប្រវេសន៍។
លោកបានជួបជាមួយនឹងសម្តេចប៉ាបចំនួនពីរដង។
លោក ទន់ សុវណ្ណ បានចាត់ទុកសហរដ្ឋអាមេរិក ដែលជាប្រទេសទទួលលោកឲ្យជ្រកកោណនេះ គឺជាប្រទេសដ៏ពិសេសមួយ។ នេះជាការថ្លែងរបស់លោក ទន់ សុវណ្ណដែលបានប្រាប់ដល់ VOA ភាសាខ្មែរនៅក្នុងបទសម្ភាសនាពេលថ្មីៗនេះ ដោយពន្យល់ថា អាមេរិកត្រូវបានកសាងឡើងដោយជនអន្តោប្រវេសន៍ដោយផ្អែកលើគោលការណ៍សេរីភាព ការផ្តល់ជម្រក និងការផ្តល់ឱកាស។
លោកបានថ្លែងថា៖
«ប៉ុន្តែយើងកុំភ្លេចថាសរអានេះ វាមានគោលការណ៍»។
បច្ចុប្បន្ននេះលោកទន់ សុវណ្ណ ដែលស្ថិតក្នុងវ័យជាង៧០ឆ្នាំ និងនៅតែជាមេដឹកនាំសហគមន៍ដ៏សកម្មមួយរូប លោកជឿថា សហរដ្ឋអាមេរិកនៅតែបន្តជាប្រទេសដែលពោរពេញដោយឱកាស ហើយអាមេរិកមិនដែលបោះបង់នូវគោលការណ៍ជាប្រទេសផ្តល់ជម្រកដល់អ្នកដែលមិនអាចរស់នៅក្នុងប្រទេសកំណើតដូចជារូបលោកនោះទេ។
សាររបស់លោក ទន់ សុវណ្ណ បានលាន់ឮកងរំពងនៅក្នុងសហរដ្ឋអាមេរិក កន្លែងដែលបញ្ហាអន្តោប្រវេសន៍បានក្លាយជាបញ្ហាមួយដែលត្រូវបានលើកឡើងនៅក្នុងប្រកួតប្រជែងតំណែងប្រធានាធិបតីនៅក្នុងឆ្នាំ២០១៦ ហើយស្របពេលដែលលោកប្រធានាធិបតី បារ៉ាក់ អូបាម៉ា ត្រៀមនឹងរៀបចំកិច្ចប្រជុំសកលកំពូលមួយនៅក្នុងទីក្រុង New York នៅថ្ងៃទី២០ ខែកញ្ញាខាងមុខនេះ ដើម្បីដោះស្រាយបញ្ហាវិបត្តិជនភៀសខ្លួននៅក្នុងពិភពលោក។
លោក អូបាម៉ា ចង់ឲ្យមេដឹកនាំពិភពលោកចូលរួមក្នុងកិច្ចប្រជុំកំពូល ដែលធ្វើឡើងទន្ទឹមគ្នា នឹងកិច្ចប្រជុំមហាសន្និបាតរបស់អង្គការសហប្រជាជាតិលើកទី៧១ ដើម្បីបង្កើនមូលនិធិសម្រាប់កិច្ចខិតខំប្រឹងប្រែងមនុស្សធម៌ សម្រាប់ជួយដល់ជនភៀសខ្លួន ដើម្បីបង្កើនការផ្តល់ការតាំងទីលំនៅជាថ្មីដល់ជនភៀសខ្លួន និងផ្តល់ឱកាសឲ្យបានច្រើនជាងមុនដល់អ្នកដែលចង់ស្វែករកសិទ្ធិជ្រកកោន។
លោកស្រី Samantha Powers ឯកអគ្គរដ្ឋទូតអាមេរិកប្រចាំនៅអង្គការសហប្រជាជាតិ ដែលលោកស្រីក៏ជាជនអន្តោប្រវេសន៍មួយរូបផងដែរនោះ បានថ្លែងនៅក្នុងសន្ទរកថាមួយកាលពីខែមិថុនាថា៖«កិច្ចប្រជុំកំពូលនោះមិនមែនជាថ្នាំកែរោគនោះទេ»។ លោកស្រីបានថ្លែងថា៖
«បើទោះបីជាយើងដោះស្រាយ ចំគ្រប់គោលដៅក៏ដោយ ក៏ការឆ្លើយតបរបស់យើងនៅតែមិនអាចទប់ទល់នឹងទំហ៊ុំនៃវិបត្តិដ៏ធំទាំងនោះបានដែរ។ ប៉ុន្តែដំណោះស្រាយ របស់យើង អាចតំណាងឲ្យជំហានមួយ គឺជំហានដ៏សំខាន់ដើម្បីឆ្ពោះទៅកាន់ការបង្កើនកិច្ចសហប្រតិបត្តិការលើធនធានពីបណ្តាប្រទេសនានា ដែលការណ៍នោះជាផ្នែកនៃដំណោះស្រាយ»។
ប្រធានបទ ជនភៀសខ្លួននិងអន្តោប្រវេសន៍បានក្លាយជាប្រធានបទមិនចុះសម្រុងគ្នាមួយក្នុងប្រទេសអាមេរិក។
ពួកគណបក្សសាធារណរដ្ឋបានរិះគន់គម្រោងការ របស់រដ្ឋបាលលោកអូបាម៉ា ក្នុងការផ្តល់ជម្រកដល់ជនភៀសខ្លួនស៊ីរីចំនួន មួយម៉ឺននាក់ក្នុងឆ្នាំសារពើពន្ធនេះ ដោយលើកឡើងថា វាអាចបង្កហានិភ័យដល់ពលរដ្ឋអាមេរិកាំងដោយអំពើភេរវកម្ម។
កាលដើមទសវត្សរ៍ ១៩៧០ លោក ទន់ សុវណ្ណគឺជានិស្សិតអាហារូបករណ៍មកសិក្សានៅសហរដ្ឋអាមេរិក ក្រោយមកនៅពេលដែលប្រទេសកម្ពុជាធ្លាក់ក្នុងសង្គ្រាមដែលបានសម្លាប់មនុស្សយ៉ាងរង្គាល លោកបានក្លាយជាជនភៀសខ្លួន។ ហើយបច្ចុប្បន្ននេះក្នុងនាមរូបលោកជាពលរដ្ឋអាមេរិកាំងមួយរូបដែលរស់នៅទីនេះអស់រយៈពេល៤០ឆ្នាំ លោក ទន់ សុវណ្ណ យល់អំពីការជជែកដេញដោលលើបញ្ហានេះតាមរយៈបទពិសោធន៍របស់រូបលោកដោយផ្ទាល់តែម្តង។
លោកបានថ្លែងថា លោកយល់ស្របថា រដ្ឋាភិបាលត្រូវចាត់វិធានការដើម្បីប្រឆាំងនឹងក្រុមភេរវករ ប៉ុន្តែសកម្មភាពទាំងនោះ មិនគួរដើររំលងប្រវត្តិសាស្ត្រដ៏យូរអង្វែងរបស់ប្រទេសនេះដែលបានជួយដល់ជនភៀសខ្លួននិងស្វាគមន៍ជនអន្តោប្រវេសន៍ផងដែរ។
សហរដ្ឋអាមេរិកបានក្លាយជាប្រទេសអភិវឌ្ឍដោយសារតែជនអន្កោប្រវេសន៍ នេះបើយោងតាមលោក ទន់ សុវណ្ណដែលបានប្រាប់ VOA។
ថ្លែងទៅកាន់ VOA ភាសាខ្មែរ នៅឯវត្តព្រះពុទ្ធសាសនានៅឯរដ្ឋ Maryland ដែលលោកធ្វើការស្ម័គ្រចិត្តនៅទីនោះ លោកបានចែករំលែករឿងរ៉ាវនៃភាពរើសអើងមកលើជនភៀសខ្លួនកម្ពុជាកាលពីប៉ុន្មានទសវត្សរ៍មុននៅក្នុងរដ្ឋ Virginia។
កិច្ចខិតខំប្រឹងប្រែងរបស់សហគមន៍កម្ពុជាក្រោមដើម្បីបង្កើតឲ្យមានវត្តកម្ពុជាក្រោមមួយត្រូវបានរារាំងដោយស្ត្រីម្នាក់ក្នុងកិច្ចប្រជុំមួយ។ លោក ទន់ សុវណ្ណ បានថ្លែងថា ស្ត្រីម្នាក់នោះបានថ្លែងប្រឆាំងនឹងការសាងសង់វត្តនោះ ដោយនិយាយថាខ្លួនមិនចង់ឲ្យមានជនអន្តោប្រវេសន៍នៅក្នុងតំបន់របស់គាត់នោះទេ។
លោក ទន់ សុវណ្ណ បានគិតក្នុងចិត្តថា បើទោះបីជាអ្នកស្រីមិនមែនជាជនអន្តោប្រវេសន៍នាពេលឥឡូវនេះក៏ដោយ អ្នកស្រីនោះបានភ្លេចហើយថា ឪពុកម្តាយរបស់អ្នកស្រីក៏ជាជនអន្តោប្រវេសន៍ផងដែរ។
លោកបានថ្លែងបន្តថា ការជ្រោមជ្រែងរបស់ជនអន្តោប្រវេសន៍ដល់សហរដ្ឋអាមេរិកគួរត្រូវបានគេផ្តល់តម្លៃ មិនមែនមើលស្រាលនោះទេ។
ក្រោយពេលដែលលោកទទួលបានសញ្ញាប័ត្របណ្ឌិតផ្នែកសេដ្ឋកិច្ចនៅឯសកលវិទ្យាល័យ Tennessee ឆ្នាំ១៩៧៩ លោក ទន់ សុវណ្ណបានធ្វើឲ្យរដ្ឋាភិបាលក្នុងស្រុកមួយនិងធ្វើការឲ្យគណកម្មាធិការផ្តល់ឱកាសការងារស្មើគ្នារបស់អាមេរិក Equal Employment Opportunity Commission (EEOC) ដែលជាទីភ្នាក់ងាររបស់រដ្ឋាភិបាលសហព័ន្ធទទួលខុសត្រូវខាងការស៊ើបអង្កេតទៅលើការរើសអើងនៅក្នុងកន្លែងការងារ។
ក្នុងពេលទំនេរ លោកចំណាយពេលផ្ទាល់ខ្លួនដើម្បីជួយដល់ពលរដ្ឋកម្ពុជា និងជនភៀសខ្លួនសាសន៍ដទៃទៀតដែលមកកាន់សហរដ្ឋអាមេរិក ហើយនឹងជួយលើកកំពស់យល់ដឹងអំពីសេចក្តីជំនឿរវាងគ្នានិងគ្នា។
ក្នុងចំណោមតួនាទីជាច្រើនរបស់លោក លោកគឺជាប្រធានពុទ្ធិកសមាគមព្រះពុទ្ធ សាសនា ឬ Cambodia Buddhist Society នៅក្នុងទីក្រុង Silver Spring រដ្ឋ Maryland ជាអនុប្រធានបណ្តាញពុទ្ធសាសនិកនៅក្នុងតំបន់រដ្ឋធានីវ៉ាស៊ីនតោន ជាសមាជិកស្ថាបនិកមួយរូប នៃសមាគមពុទ្ធសាសនិកអន្តរជាតិនៅអាមេរិក ហើយលោកក៏ជាសមាជិកក្រុមប្រឹក្សាភិបាលនៃ សន្និសីទអន្តរសាសនានៅក្នុងតំបន់រដ្ឋធានីវ៉ាស៊ីនតោនផងដែរ។
សម្តេច Pope Francis បានអញ្ជើញលោក ទន់ សុវណ្ណ ទៅចូលរួមក្នុងកិច្ចពិភាក្សារវាងសាសនាព្រះពុទ្ធនិងកាតូលិក នៅឯវិមាន Vatican កាលពីខែមិថុនា ឆ្នាំ២០១៥ ហើយបីខែក្រោយមកលោកត្រូវសម្តេចប៉ាបអញ្ជើញលោក ម្តងទៀតឲ្យចូលរួមក្នុងកម្មវិធីព្រះអង្គ ក្នុងអំឡុងពេលសម្តេចប៉ាបបំពេញទស្សនកិច្ចក្នុងសហរដ្ឋអាមេរិកនៅក្នុងខែកញ្ញា។
ក្នុងនាមជាគណកម្មាធិការមួយរូបនៃគណកម្មាធិការទទួលបន្ទុកកិច្ចការអាស៊ីនិងប៉ាស៊ីហ្វិកអាមេរិកាំងប្រចាំនៅក្នុងរដ្ឋ Maryland តាំងពីឆ្នាំ១៩៩៨មក លោកគឺជាសមាជិកមួយរូបដែលបានបង្កើតក្រុមប្រឹក្សាផ្តល់សិទ្ធិអំណាចសម្រាប់ជនអន្តោប្រវេសន៍ ឬ Immigrant Empowerment Council (IEC) នៅក្នុងតំបន់រដ្ឋធានីវ៉ាស៊ីនតោន ហើយលោកក៏ជាសមាជិកនាយកនៃគណៈអភិបាលនៃអង្គការ Friends of Khmer Culture ផងដែរ។
លោក យ័ប គឹមទឹង ពលរដ្ឋនៅក្នុងសហគមន៍ខ្មែររស់នៅក្នុងរដ្ឋ Virginia បានថ្លែងថា លោក ទន់ សុវណ្ណត្រូវបានគេស្គាល់តាមរយៈការងាររបស់លោកនៅឯវត្តព្រះពុទ្ធសាសនាហើយក៏ជាចំណុចប្រសព្វមួយដើម្បីភ្ជាប់ទំនាក់ទំនងរវាងសហគមន៍ខ្មែរនិងរដ្ឋាភិបាលផងដែរ។លោកបានថ្លែងថា៖
«ហើយខ្ញុំក៏ឃើញគាត់ទៅប្រជុំជាមួយក្រុមទីប្រឹក្សា អភិបាលរដ្ឋ សមាជិកព្រឹទ្ធសភា និងសមាជិកសភាផ្សេងៗទៀត » ។
លោក គុជ ច័ន្ទលី (Schanley Kuch) ពលរដ្ឋខ្មែររស់នៅក្នុងរដ្ឋ Maryland បានថ្លែងថា លោក ទន់ សុវណ្ណ ត្រូវបានស្គាល់តាមរយៈសកម្មភាពរបស់លោកក្នុងការជួយដល់ជនអន្តោប្រវេសន៍ ពិសេសគឺកិច្ចខិតខំប្រឹងប្រែងរបស់លោកក្នុងការរួបរួមសហគមន៍ខ្មែរនានានៅក្នុងសហរដ្ឋអាមេរិក។លោក Schanly Kuch បានថ្លែងថា៖
«គាត់យកចិត្តទុក្ខដាក់និងឈឺឆ្អាលនឹងសេចក្តី ត្រូវការរបស់ប្រជាពលរដ្ឋផង ហើយគាត់បំរើខាងផ្នែកវប្បធម៌ផងនិងជាប្រធានពុទ្ធិកសមាគមព្រះពុទ្ធសាសនានៅរដ្ឋ ម៉ារីឡែនផង » ។
លោក ទន់ សុវណ្ណបានទទួលជោគជ័យក្នុងរឿងជាច្រើនក្នុងរយៈពេលជាង ៤០ឆ្នាំដែលគាត់រស់នៅនិងធ្វើការនៅក្នុងសហរដ្ឋអាមេរិកក្នុងនាមជាអ្នកធ្វើជាមន្ត្រីរដ្ឋការនិងជាពលរដ្ឋដ៏សកម្មមួយរូប។ ទោះជាយ៉ាងណាក៏ដោយ នៅមានរឿងមួយទៀតដែលលោកចង់ធ្វើឲ្យបានសម្រេចបំណងប្រាថ្នារបស់លោក។
លោកចង់ឲ្យមានពិធីបុណ្យសាសនាព្រះពុទ្ធធ្វើឡើងនៅឯសេតវិមាន ដូចដែលសាសនាដទៃទៀតត្រូវបានផ្តល់កិត្តិយសឲ្យធ្វើរួចមកហើយដែរ។
ជារៀងរាល់ឆ្នាំ លោកទន់ សុវណ្ណថ្លែងថា លោកប្រធានាធិបតី អូបាម៉ា បានផ្ញើរលិខិតទៅកាន់សមាគមព្រះពុទ្ធសាសនា ដើម្បីតំណាងឲ្យបុណ្យវិសាខបូជាអន្តរជាតិ ដែលប្រារព្ធឡើងដើម្បីរំឭកដល់ថ្ងៃដែលព្រះពុទ្ធប្រសូត្រ ត្រាស់ដឹង និងចូលបរិនិព្វាន។
លោកបានថ្លែងថា៖
«ប៉ុន្តែយើងមិនចង់បានត្រឹម(លិខិត)នេះទេ តែយើងចង់ធ្វើបុណ្យនៅក្នុងសេតវិមាន ដូច សាសនាគេដ៏ទៃទៀត តែដោយសារគាត់ (លោក អូបាម៉ា) ត្រូវចប់អាណត្តិហើយ យើងនឹងធ្វើកិច្ចការយ៉ាងម៉េចទៅប្រធានាធិបតីបន្ទាប់ដើម្បីឲ្យបានទៅធ្វើបុណ្យនៅ សេតវិមាន »។
លោកប្រធានាធិបតីសរអាតាមច្បាប់ត្រូវចប់អាណត្តិទាំងពីរដែលមានរយៈពេល៨ឆ្នាំរបស់លោកនៅខែមករាឆ្នាំ២០១៧ ក្រោយប្រធានាធិបតីថ្មីរបស់សរអាត្រូវជ្រើសរើស នៅក្នុងការបោះឆ្នោតនៅខែវិច្ឆិកាខាងមុខ៕
