គណបក្សប្រឆាំងនៅប្រទេសស្រីលង្កាបានជួបប្រជុំគ្នាកាលពីថ្ងៃអាទិត្យដើម្បីពិភាក្សាអំពីការបង្កើតរដ្ឋាភិបាលថ្មី។ ជំនួបនេះបានកើតឡើងមួយថ្ងៃបន្ទាប់ពីប្រធានាធិបតី និងនាយករដ្ឋមន្ត្រីបាននិយាយថា ពួកគេនឹងចុះចេញពីតំណែង។ ក្រុមអ្នកតវ៉ាកាលពីថ្ងៃអាទិត្យបាននិយាយថា ពួកគេនឹងបន្តកាន់កាប់លំនៅដ្ឋានប្រធានាធិបតី និងនាយករដ្ឋមន្ត្រីនៅទីក្រុងកូឡុំបូ រហូតដល់លោកទាំងពីរចុះចេញពីតំណែងជាផ្លូវការ។
បាតុកររាប់ពាន់នាក់បានសម្រុកចូលលំនៅដ្ឋានទាំងពីរកាលពីថ្ងៃសៅរ៍។ ពួកគេបានរុះរើផ្ទះរបស់លោកប្រធានាធិបតី Gotabaya Rajapaksa និងដុតផ្ទះលោកនាយករដ្ឋមន្ត្រី Ranil Wickremesinghe ចំពេលមានការផ្ទុះកំហឹងជាសាធារណៈចំពោះវិបត្តិសេដ្ឋកិច្ចរយៈពេលមួយខែ។
លោកប្រធានាធិបតីនិងលោកនាយករដ្ឋមន្ត្រីបានយល់ព្រមចុះចេញពីតំណែង។ លោកប្រធានាធិបតីប្រាប់ប្រធានសភាថា លោកនឹងចុះចេញពីតំណែងនៅថ្ងៃទី១៣ ខែកក្កដា ដើម្បីធានាឱ្យមានការផ្ទេរអំណាចដោយរលូន។ ទោះជាយ៉ាងណា ក្រុមអ្នកតវ៉ាទាមទារឲ្យការលាលែងនេះចូលជាធរមានជាបន្ទាន់។
លោកប្រធានាធិបតី Rajapaksa ត្រូវបានទាហាននាំទៅកាន់ទីតាំងសុវត្ថិភាព ដែលមិនត្រូវបានបញ្ចេញឱ្យដឹង មុនមានការតវ៉ាដ៏ធំ។ ដោយរងការស្តីបន្ទោសយ៉ាងទូលំទូលាយចំពោះការធ្លាក់ចុះសេដ្ឋកិច្ចដ៏ធ្ងន់ធ្ងរ លោកបានរងសម្ពាធសាធារណជនជាច្រើនខែឱ្យចុះចេញពីតំណែង។ ការសម្រេចចិត្តលាលែងពីតំណែងរបស់លោកប្រធានាធិបតីត្រូវបានប្រកាស បន្ទាប់ពីលោកនាយករដ្ឋមន្ត្រី Wickremesinghe ក៏បានប្រកាសចុះចេញពីតំណែង និងបើកផ្លូវឱ្យមានរដ្ឋាភិបាលចម្រុះគ្រប់ភាគី។
វិបត្តិនយោបាយមិនធូរស្បើយឡើយ ខណៈរដ្ឋាភិបាលទីក្រុងកូឡុំបូប្រឈមកំហឹងជាសាធារណៈយ៉ាងទូលំទូលាយ បន្ទាប់ពីមនុស្សរាប់ពាន់នាក់បានប្រមូលផ្តុំគ្នានៅក្នុងទីក្រុងធ្វើការតវ៉ាដ៏ធំបំផុតប្រឆាំងរដ្ឋាភិបាលក្នុងពេលប៉ុន្មានខែថ្មីៗនេះ។
វីដេអូដ៏រន្ធត់តាមប្រព័ន្ធផ្សព្វផ្សាយសង្គមបានបង្ហាញពីមនុស្សរាប់រយនាក់បានមកចោមរោមចូលគេហដ្ឋានលោកប្រធានាធិបតី Rajapaksa ដោយស្រែកពាក្យស្លោក នៅពេញច្រកនានានិងអង្គុយនៅក្នុងបន្ទប់ ខណៈអ្នកខ្លះកំពុងងូតទឹកក្នុងអាងហែលទឹក។ បាតុករដែលរីករាយក៏បានចូលទៅក្នុងការិយាល័យប្រធានាធិបតីដោយស្រែកថា «អ្នកគិតថាអ្នកអាចបញ្ឈប់យើងបាន ប៉ុន្តែយើងនៅទីនេះ»។
អាជ្ញាធរបានដាក់ពង្រាយទាហានជិត២ម៉ឺននាក់នៅមុនការប្រមូលផ្តុំ និងបានពង្រឹងសន្តិសុខនៅខាងក្រៅលំនៅដ្ឋានប្រធានាធិបតី ប៉ុន្តែពួកគេមិនអាចរារាំងមិនឱ្យក្រុមបាតុករដែលប្រឆាំងទម្លាយរបាំងសន្តិសុខបានទេ។
មនុស្សរាប់សិបនាក់បានរងរបួស ខណៈមានភាពចលាចលពេញមួយថ្ងៃ។ ដំបូងឡើយ ប៉ូលិសបានដាក់បម្រាមគោចរកាលពីថ្ងៃសុក្រ ដើម្បីទប់ស្កាត់ការប្រមូលផ្តុំនេះ ប៉ុន្តែបម្រាមនេះត្រូវដកចេញវិញ បន្ទាប់ពីមានការជំទាស់យ៉ាងខ្លាំងពីក្រុមសង្គមស៊ីវិល និងគណបក្សប្រឆាំង។
នៅទីក្រុងបាងកក រដ្ឋមន្ត្រីការបរទេសសហរដ្ឋអាមេរិក លោក Antony Blinken បាននិយាយកាលពីថ្ងៃអាទិត្យថា សហរដ្ឋអាមេរិកកំពុងតាមដានស្ថានការណ៍នៅក្នុងប្រទេសស្រីលង្កា៕
ព័ត៌មានខ្លះក្នុងសេចក្តីរាយការណ៍នេះដកស្រង់ពីទីភ្នាក់ងារសារព័ត៌មាន The Associated Press។
