ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

រដ្ឋាភិបាល​ស្រីលង្កា​រង​ការ​រិះគន់​ដោយសារ​ការ​បិទបណ្តាញ​​ផ្សាយ​ព័ត៌មានតាម​អ៊ីនធឺណិត


អ្នក​នាំ​ពាក្យ​ស្រីលង្កា​ Keheliya Rambukwella ថ្លែង​នៅ​​ក្នុង​សន្និសីទ​ពត៌មាន​មួយ​ក្នុង​ទី​ក្រុង​កូឡុំបូ ប្រទេស​ស្រីលង្កា។
អ្នក​នាំ​ពាក្យ​ស្រីលង្កា​ Keheliya Rambukwella ថ្លែង​នៅ​​ក្នុង​សន្និសីទ​ពត៌មាន​មួយ​ក្នុង​ទី​ក្រុង​កូឡុំបូ ប្រទេស​ស្រីលង្កា។

អាជ្ញាធរ​ស្រីលង្កា​កំពុង​ទទួល​រង​ការ​រិះគន់​ដ៏​ខ្លាំងចំពោះការ​រិតត្បិត​សេរីភាព​ផ្សព្វផ្សាយ​ព័ត៌មាន ក្រោយ​ពី​បាន​បិទ​គេហទំព័រ​ព័ត៌មាន​មួយ​ចំនួន និង​តម្រូវ​ឲ្យ​បណ្តាញ​ទាំងនេះ​ចុះ​បញ្ជី​ជាមួយ​នឹង​រដ្ឋាភិបាល។ រដ្ឋាភិបាល​ប្រទេស​នេះ​កំពុង​ការពារ​សកម្មភាព​របស់​ខ្លួន ដោយ​ថ្លែង​ថា​ទង្វើ​នេះមិនមែន​ជា​ការ​សំដៅ​ទៅ​រក​ការ​រាំងខ្ទប់​សេរីភាព​បញ្ចេញ​មតិ​ឡើយ។ រាយការណ៍​ពី​ទីក្រុង​ញូដេលី ហើយ​នាង​លី ម៉ូនីវ៉ាន់​អាន​ជូន​សេចក្តី​ប្រែ​សម្រួល។

រដ្ឋាភិបាល​ស្រីលង្កា​ឲ្យ​ដឹងថា​អាជ្ញាធរ​បាន​បិទ​បណ្តាញ​ផ្សាយ​ព័ត៌មាន​តាម​អ៊ីនធឺណិត ​ដោយសារ​តែ​សេចក្តីរាយការណ៍​មួយ​ចំនួន​បាន​ប៉ះពាល់​ដល់​តួនាទី​ប្រធានាធិបតី រដ្ឋមន្ត្រី ក៏ដូចជា​មន្រ្តី​ជាន់​ខ្ពស់​ជាច្រើន​ទៀត។

រដ្ឋមន្រ្តី​ព័ត៌មាន​និង​ប្រព័ន្ធ​ផ្សព្វផ្សាយ លោក​ខេហេលីយ៉ា រ៉ាមប៊ុកវេឡា (Keheliya Rambukwella) បាន​ប្រាប់​សំឡេង​សហរដ្ឋ​អាមេរិកថា ក្រសួងរបស់​លោកបាន​ទទួល​ពាក្យបណ្តឹង​មួយ​ចំនួន​ដែល​ចោទប្រកាន់​បណ្តាញ​ផ្សាយ​ព័ត៌មាន​តាម​អ៊ីនធឺណិត​។

«យើង​មាន​ការ​ទទួល​ខុសត្រូវ​ចំពោះ​សាធារណៈជន​នៃ​ប្រទេស​នេះ… បណ្តាញ​ព័ត៌មាន​តាម​អ៊ីនធឺណិត​ទាំង​នេះ​មិន​បាន​ផ្តល់​ឱកាស​ដល់​ភាគី​ម្ខាងទៀត​ធ្វើការ​បញ្ចេញយោបល់​ឡើយ ហើយ​ពួក​គេ​ចង់​ធ្វើ​របៀប​នេះ ​ដែល​វា​មិន​ត្រូវ​បាន​អនុញ្ញាត​ឡើយ។ ប្រាកដ​ណាស់ថា ពួក​គេ​អាច​បញ្ចេញ​យោបល់​បាន​ ក៏ប៉ុន្តែ​ទស្សនៈ​របស់​អ្នក​ផ្សេង​ក៏ត្រូវ​តែ​បាន​ការ​គោរព​វិញដែរ។»

បណ្ណាធិការនៃ​បណ្តាញ​ផ្សាយ​ព័ត៌មាន​មួយ​ដែល​ត្រូវ​បាន​បិទគឺ srilankamirror.com បាន​ថ្លែង​ការពារ​ការ​ចេញផ្សាយ​របស់​ខ្លួន ដោយ​និយាយថា​កាសែត​តាម​អ៊ីនធឺណិត​មួយ​នេះ​តែង​តែ​ធ្វើ​សេចក្តីរាយការ​សាច់រឿង​ដោយ​ប្រភព​ព័ត៌មាន​ទាំង​សងខាង។

អ្នក​នាំពាក្យ​របស់​បណ្ណាធិការគឺ ស្ហានីកា ចាយ៉ា​សេកេរ៉ា​ បង្ហាញ​ឲ្យដឹងថារហូត​មកដល់​ពេល​នេះ អាជ្ញាធរ​មិន​ទាន់​បាន​ផ្តល់​ហេតុផលណាមួយ​សម្រាប់​ការ​បិទ​កាសែត​ផ្សាយ​តាម​អ៊ីនធឺណិត​របស់​លោក​ឡើយ។

«យើង​មិន​ទាន់​ត្រូវ​បាន​គេ​ជូន​ដំណឹង​ដោយ​ផ្ទាល់​នៅ​ឡើយ​ទេ។ បើសិន​ជា​យើង​ធ្វើ​អ្វីមួយ​ដែល​ខុស​ឆ្គង យើង​គួរ​ត្រូវ​បាន​គេ​ជូន​ដំណឹង ហើយ​បើ​មិន​ដូច្នោះ​ទេ តើ​ធ្វើ​យ៉ាងម៉េច ​ទើប​យើង​ដឹងថា​ទង្វើ​របស់​យើង​ខុស​ទៅ?»

កាសែត វិទ្យុ និង​ទូរទស្សន៍ ទាំងអស់​ត្រូវ​បាន​តម្រូវ​ឲ្យ​ចុះ​បញ្ជី​ជាមួយ​នឹង​រដ្ឋាភិបាល​រួច​ទៅហើយ ​ប៉ុន្តែ​សម្រាប់​បណ្តាញ​ផ្សាយ​ព័ត៌មាន​តាម​អ៊ីនធឺណិត​វិញ​មិន​ទាន់​មាន​ការតម្រូវឲ្យ​ចុះ​ឈ្មោះ​នៅ​ឡើយ​ទេ។

ពេល​នេះ​អាជ្ញាធរ​និយាយ​ថា​រាល់​គេហទំព័រដែល​រាយការណ៍​អំពី​ប្រទេស​ស្រីលង្កា​ត្រូវ​ចុះ​បញ្ជី បើ​មិន​ដូច្នោះទេ​នឹង​ត្រូវ​ប្រឈម​មុខ​នឹង​ច្បាប់។

ក្រុម​អ្នក​រិះ​គន់​ឆ្លើយ​តប​ថា ការ​ធ្វើ​បែប​នេះ​គឺ​ប្រៀប​បាន​ទៅនឹង​ការ​បំបិទ​សិទ្ធិ​បញ្ចេញ​មតិ​និងការចេញ​ផ្សាយ​ព័ត៌មាន​តាម​បណ្តាញ​អ៊ីនធឺណិតយ៉ាង​ដូច្នោះ​ដែរ។

រដ្ឋ​មន្រ្តីព័ត៌មាន លោក រ៉ាមប៊ុកវេឡា និយាយ​ថា ​អាជ្ញាធរ​មិន​សំដៅ​ទៅ​រក​ការ​បំបិទ​សេរីភាព​ការ​ផ្សព្វផ្សាយ​ព័ត៌មាន​ឡើយ ក៏​ប៉ុន្តែ​ពួកគេចង់​ដឹង​អត្តសញ្ញាណ​របស់​អ្នកដែល​គ្រប់គ្រង​បណ្តាញ​ព័ត៌មាន​តាម​អ៊ីនធើ​ណិត​ទាំង​អស់នោះ។

«អ្នក​គួរ​តែ​ដឹង​ថា​អ្នកណាគេ​ដែល​ពាក់ព័ន្ធ​ជាមួយ​នឹង​បណ្តាញ​ផ្សាយ​ព័ត៌មាន​ទាំងនេះ ហើយ​ពួក​គេ​ធ្វើ​ការ​ និង​ផ្សាយ​ព័ត៌មានពីទីតាំងណា ​យើង​មិន​ទាំង​មាន​អាស័យដ្ឋាន​ទាក់ទង​ពួក​គេ​ផងដើម្បីធ្វើ​ការជូនដំណឹង​ទៅ​ពួកគេនោះ។ ការណ៍​ដែល​យើង​តម្រូវ​ឲ្យ​ពួកគេ​ចុះ​បញ្ជី​ជាមួយ​អាជ្ញាធរ​មិន​មែន​ជា​ការ​បំបិទ​សិទ្ធិ​សេរីភាព​ឡើយ។»

កាល​ពីមុន រដ្ឋាភិបាល​ត្រូវទទួល​រងការ​រិះ​គន់​ចំពោះ​ការ​ធ្វើទុក្ខបុកម្និញ​ចំពោះ​អ្នក​សារព័ត៌មាន​ណាដែល​រិះគន់​រដ្ឋាភិបាល​លើ​ដំណោះស្រាយ​ជម្លោះ​ជាមួយ​នឹង​ក្រុម​ឧទ្ទាម​ខ្លាតាមិល។ ក្រុម​សកម្មជន​ខាង​ប្រឆាំង​និយាយថា​ការ​ផ្លាស់ប្តូរនាពេល​ថ្មីៗ​នេះគ្រាន់​តែ​ជា​វិធី​មួយ​ទៀត​ដើម្បី​បំបិទ​សំឡេង​រិះគន់​ប៉ុណ្ណោះ។

ក្នុង​ចំណោម​ក្រុម​អ្នក​ដែល​ជឿថា​វិធានការ​របស់​រដ្ឋាភិបាល​នឹង​ធ្វើ​ឲ្យ​ប៉ះពាល់​ដល់​ការ​បញ្ចេញ​មតិ​ដោយ​សេរីនិង​សិទ្ធិ​របស់​អ្នក​រិះ​គន់នោះ​គឺ​លោក ប៉ាកៀសុធី សារ៉ាវណ្ណមុទូ (Paikiasothy Saravanamuttu) ជា​នាយកមជ្ឈមណ្ឌល​សម្រាប់​ជម្រើស​គោល​នយោបាយ នៅ​រដ្ឋធានី​កូឡំបូ។

«មាន​មតិយោបល់​មួយ​ចំនួន​ដែល​ថា ​បណ្តាញ​ព័ត៌មាន​តាម​អ៊ីនធឺណិត​កំពុង​ជជែក​អំពី​ជម្លោះ​ផ្ទៃក្នុង​របស់​ក្រុម​គ្រួសារ​គណបក្ស​កាន់​អំណាច និយាយ​ឲ្យ​ចំ​គឺភាព​ប្រេះ​ស្រាំ​នៅ​ក្នុង​គណបក្ស​កាន់​អំណាច​តែ​ម្តង ហើយ​ពួក​គេ​បារម្ភ​ថា ​ព័ត៌មាន​ប្រភេទ​នេះ​នឹង​ត្រូវ​បែក​ធ្លាយ​កាន់តែ​ទូលំទូលាយ។ ហើយ​ក៏មាន​អ្នក​ខ្លះ​ទៀត​ដែល​មាន​យោបល់​ថា រដ្ឋាភិបាល​មាន​សេចក្តី​ព្រួយបារម្ភ​ដោយហេតុ​តែ​ចលនា​ដែល​មាន​និន្នាការ​ស្រដៀងគ្នា​នឹង​អ្វី​ដែល​បាន​កើតឡើង​រួច​ហើយនៅ​ឯ​មជ្ឈឹមបូព៌ា ពោល​គឺ​ចលនា​នេះអាច​រីកដាល​ឡើង​នៅ​ក្នុង​ប្រទេស​ស្រីលង្កា​ដែរ​ដោយ​ការ​ប្រើ​បច្ចេកវិទ្យា​ថ្មីៗ។ វាជាការ​លំបាក​ក្នុង​ការ​ចង្អុល​បង្ហាញ​ឲ្យ​ចំ​ហេតុផលណាស់ ក្រៅ​តែ​អំពី​ការ​មើល​ឃើញ​ជាក់​ស្តែង​ថា​រដ្ឋាភិបាល​មាន​ការ​អន្ទះអន្ទែង​ចង់ត្រួតត្រា​គេហទំព័រ​ព័ត៌មាន។»

នៅ​ក្នុង​សេចក្តី​ថ្លែង​ការណ៍​កាល​ពី​សប្តាហ៍​មុន ស្ថានទូត​សហរដ្ឋ​អាមេរិក​ប្រចាំ​នៅ​រដ្ឋធានី​កូឡំបូ​បានឲ្យ​ដឹងថា សេរីភាព​បញេ្ចញ​មតិ ដោយ​រួមទាំង​ការ​ទទួល​យក​ព័ត៌មាន​តាម​បណ្តាញ​អ៊ីនធឺណិត​ដោយ​គ្មាន​ការ​រាំងខ្ទប់​គឺ​ជា​សិទ្ធិ​មូលដ្ឋាន ដែល​ត្រូវ​ទទួល​បាន​ការគោរព​ដោយ​អាជ្ញាធរ​ស្រីលង្កា។

XS
SM
MD
LG