តំណាងក្រុមបះបោរនិងតំណាងរដ្ឋាភិបាលស៊ូដង់ខាងត្បូង បានជួបគ្នាជាថ្មីម្តងទៀត ក្នុងគោលបំណងបញ្ចប់សង្គ្រាមស៊ីវិលនៅក្នុងប្រទេសនោះ។
ភាគីទាំងពីរបានជួបគ្នានៅក្នុងរដ្ឋធានី Juba កាលពីថ្ងៃអង្គារម្សិលមិញ ដោយសង្ឃឹមថាពួកគេនឹងបង្កើតរដ្ឋាភិបាលសាមគ្គីជាតិអន្តរកាលកាលមួយ។
ភាគីក្រុមបះបោរនិងភាគីរដ្ឋាភិបាល បានចរចាគ្នាដើម្បីរកសន្តិភាពដែលមានលក្ខណៈដូចអំពិលអំពែក ចាប់តាំងពីជម្លោះបានចាប់ផ្តើមកាលពីពាក់កណ្តាលខែធ្នូ ឆ្នាំ២០១៣មក ប៉ុន្តែភាគីទាំងពីរ បានរំលោភបំពានលើបទផ្អាកបាញ់គ្នាជាបណ្តោះអាសន្នជាច្រើនលើក ដែលពួកគេបានយល់ព្រមជាមួយគ្នា។
ប្រធានាធិបតីស៊ូដង់ខាងត្បូង លោក Salva Kiir និងមេក្រុមបះបោរ លោក Riek Machar ដែលជាអតីតអនុប្រធានាធិបតីទី១របស់ស៊ូដង់ខាងត្បូងនោះ បានចោទគ្នាទៅវិញទៅមក ថាភាគីម្ខាងទៀតជាអ្នករំលោភលើកិច្ចព្រៀមព្រៀងសន្តិភាពនោះ ប៉ុន្តែភាគីទាំងពីរនៅតែប្តេជ្ញាចិត្តគោរពតាមកិច្ចព្រមព្រៀងថ្ងៃទី២៦ ខែសីហា បើទោះបីជាពួកគេទាំងពីរ តែងតែខកខានមិនបានគោរពទៅតាមកាលបរិច្ឆេទដែលពួកគេបានកំណត់ក៏ដោយ។
សហរដ្ឋអាមេរិកបាននិយាយកាលពីថ្ងៃអង្គារថា ខ្លួនស្វាគមន៍ការវិលទៅរកការចរចរគ្នាឡើងវិញរវាងភាគីទាំងពីរ ប៉ុន្តែបានបន្ថែមថាភាគីទាំងពីរចាំបាច់ត្រូវធ្វើការសម្រេចចិត្តសំខាន់ៗនិងពិបាកៗជាច្រើនទៀត។ រដ្ឋាភិបាលក្រុងវ៉ាស៊ីនតោន ក៏បានអំពាវនាវឲ្យភាគីទាំងពីរសហការគ្នា ក្នុងស្មារតីរួបរួមនិងផ្សះផ្សាជាតិ ដើម្បីអនុវត្តកំណែទម្រង់ដែលត្រូវបានកំណត់នៅក្នុងកិច្ចព្រមព្រៀងសន្តិភាពរវាងភាគីទាំងពីរ។
ប្រទេសស៊ូដង់ខាងត្បូង គឹជាប្រទេសដែលមានវ័យក្មេងជាងគេនៅលើលោក ដោយបានទទួលឯករាជ្យពីប្រទេសស៊ូដង់ នៅឆ្នាំ២០១១៕
