ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

កូរ៉េ​ខាង​ត្បូង​ថា លោក Kim Jong Un មិន​បាន​វះកាត់​បេះដូង​ទេ


មេដឹកនាំកូរ៉េខាងជើង លោក គីម ជុងអ៊ុន ចូលរួមក្នុងពិធីសម្ពោធរោងចក្រផលិតជីមួយ ជាមួយនឹងប្អូនស្រីរបស់លោក នៅប៉ែកខាងជើងទីក្រុងព្យុងយ៉ាង។ រូបភាពនេះត្រូវបានផ្សព្វផ្សាយដោយបណ្ដាញព័ត៌មានKCNA របស់កូរ៉េខាងជើង ថ្ងៃទី២ ខែឧសភា ឆ្នាំ២០២០។

មេដឹកនាំ​កូរ៉េ​ខាង​ជើង​លោក Kim Jong Un មិន​បាន​វះកាត់​បេះដូង​នោះ​ទេ នៅ​ពេល​ដែល​លោក​មិន​បង្ហាញ​ខ្លួន​ជា​សាធារណៈ​ជិត ៣ សប្ដាហ៍​កន្លង​មក​នេះ។ នេះ​បើ​តាម​ការ​ផ្សាយ​របស់​ទីភ្នាក់ងារ​ព័ត៌មាន Yonhap របស់​កូរ៉េ​ខាង​ត្បូង ដោយ​យោង​លើ​មន្ត្រី​រដ្ឋាភិបាល​ជាន់​ខ្ពស់​កូរ៉េ​ខាង​ត្បូង​មួយ​រូប។

ទីភ្នាក់ងារ​ព័ត៌មាន Yonhap បាន​បញ្ជាក់​ថា មន្ត្រី​កូរ៉េ​ខាង​ត្បូង​រូប​នោះ​បាន​បដិសេធ​មិន​ផ្ដល់​មូលហេតុ​សម្រាប់​ការ​ជឿជាក់​ដែល​ថា លោក Kim Jong Un មិន​បាន​វះកាត់​បេះដូង​នោះ​ទេ ប៉ុន្តែ​បាន​និយាយ​ថា សេចក្ដី​រាយការណ៍​នានា​កន្លង​មក​ដែល​ថា​លោក​ប្រហែល​ជា​ឆ្លង​កាត់​ការ​វះកាត់​បេះដូង​នោះ​គឺ​មិន​ត្រឹមត្រូវ​ទេ។

ប៉ុន្មាន​សប្ដាហ៍​ក្រោយ​មក បន្ទាប់ពី​មាន​ការ​សង្ស័យ​កាន់​តែ​ខ្លាំង​អំពី​សុខភាព​របស់​លោក Kim Jong Un និង​ទីកន្លែង​ដែល​លោក​ស្នាក់នៅ ប្រព័ន្ធ​ផ្សព្វផ្សាយ​ផ្លូវការ​របស់​កូរ៉េ​ខាង​ជើង​បាន​ចេញ​ផ្សាយ​រូបថត និង​សេចក្ដី​រាយការណ៍​មួយ​កាល​ពី​ថ្ងៃ​សៅរ៍​ម្សិលមិញ ដែល​បង្ហាញ​ថា លោក Kim Jong Un បាន​ចូលរួម​នៅ​ក្នុង​ពិធី​បញ្ចប់​ការ​សាងសង់​រោងចក្រ​ជី​មួយ​កន្លែង។

នៅ​ក្នុង​រូបថត​មួយ​ចំនួន​ដែល​បាន​ផ្សព្វផ្សាយ គេ​ឃើញ​លោក Kim Jong Un ញញឹម និង​និយាយ​ទៅ​កាន់​ជំនួយការ​របស់​លោក​នៅ​ឯ​ពិធី​កាត់​ខ្សែ​បូរ ក៏​ដូចជា​បង្ហាញ​ពី​លោក​ដើរ​ទស្សនកិច្ច​មើល​រោងចក្រ​នោះ​ផង​ដែរ។

ពាក្យ​ចចាមអារ៉ាម​អំពី​សុខភាព​របស់​លោក Kim Jong Un បាន​កើត​ឡើង បន្ទាប់ពី​លោក​មិន​បាន​ចូលរួម​នៅ​ក្នុង​ពិធី​រំឮក​ខួប​ថ្ងៃ​កំណើត​របស់​លោក Kim Il Sung ដែល​ជា​ជីតា​របស់​លោក និង​ជា​ស្ថាបនិក​ប្រទេស​កូរ៉េ​ខាង​ជើង កាល​ពី​ថ្ងៃ​ទី១៥ ខែ​មេសា​ កន្លង​ទៅ​នេះ។ មក​ទល់​នឹង​ពេល​នេះ គេ​នៅតែ​មិន​ដឹង​អំពី​មូលហេតុ​នៃ​ការ​បាត់​ខ្លួន​មួយ​រយៈ​របស់​លោក Kim Jong Un ក៏​ដូចជា​ពេល​ដែល​លោក​បង្ហាញ​ខ្លួន​ឡើង​វិញ​នេះ​ដែរ៕

XS
SM
MD
LG