ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

កូរ៉េ​ខាងត្បូង​បើក​ពាក្យ​បណ្ដឹង​ឡើង​វិញ​ប្រឆាំង​នឹង​ការរារាំង​ការនាំ​ចេញ​របស់​ជប៉ុន


លោក Na Seung Sik អនុ​រដ្ឋមន្ត្រី​នៃ​ក្រសួង​ពាណិជ្ជកម្ម​កូរ៉េ​ខាង​ត្បូង ថ្លែង​សុន្ទរកថា​ក្នុង​អំឡុងពេល​ធ្វើ​សន្និសីទ​កាសែត​នៅ​ឯ​អាគារ​រដ្ឋាភិបាល​មួយ​នៅ​ទីក្រុង Sejong នៃ​ប្រទេស​កូរ៉េ​ខាងត្បូង​នៅ​ថ្ងៃទី ២ ខែមិថុនា ឆ្នាំ ២០២០។

កូរ៉េ​ខាង​ត្បូង​បាន​ផ្អាក​ពាក្យ​បណ្ដឹង​នេះ​កាល​ពី​ខែ​វិច្ឆិកា ឆ្នាំ​មុន ដែល​ជា​ផ្នែក​មួយ​នៃ​កាយវិការ​ក្នុង​ឆន្ទៈ​ល្អ ក្នុង​គោល​បំណង​ដោះស្រាយ​បញ្ហា​តាម​រយៈ​ការ​ចរចា​ដោយ​ផ្ទាល់។

ប្រទេស​កូរ៉េ​ខាង​ត្បូង​បាន​បញ្ជាក់​ថា ខ្លួន​នឹង​បើក​ពាក្យ​បណ្ដឹង​ឡើង​វិញ​នៅ​អង្គការ​ពាណិជ្ជកម្ម​ពិភពលោក ប្រឆាំង​នឹង​ប្រទេស​ជប៉ុន ទាក់ទិន​នឹង​ការ​គ្រប់គ្រង​តឹងតែង​របស់​ជប៉ុន​លើ​ការ​នាំ​ចេញ​វត្ថុធាតុ​ដើម​សំខាន់ៗ​ដែល​ប្រើ​នៅ​ក្នុង​វិស័យ​បច្ចេកវិទ្យា​របស់​កូរ៉េ​ខាង​ត្បូង។

រដ្ឋាភិបាល​ក្រុង​សេអ៊ូល ដំបូង​បាន​ដាក់​ពាក្យ​បណ្ដឹង​នេះ​កាល​ពី​ខែ​កញ្ញា​ឆ្នាំ​មុន បន្ទាប់ពី​រដ្ឋាភិបាល​ក្រុង​តូក្យូ​ដក​កូរ៉េ​ខាង​ត្បូង​ចេញ​ពី​បញ្ជី​ដៃគូ​ពាណិជ្ជកម្ម​ដ៏​ទុកចិត្ត​របស់​ខ្លួន ដែល​នេះ​ជា​វិធានការ​មួយ​ដែល​បញ្ចប់​នូវ​ដំណើរការ​លឿន និង​ពន្យឺត​ដល់​ការ​នាំចេញ​សារធាតុ​គីមី​សំខាន់ ៣ ប្រភេទ ដែល​ប្រើ​នៅ​ក្នុង​ការ​ផលិត​បន្ទះ chip និង​រូបភាព​អេក្រង់​កុំព្យូទ័រ។

ជប៉ុន​បាន​លើក​ឡើង​ថា ខ្លួន​រារាំង​ដូច្នេះ ដោយសារតែ​មាន​ការ​ព្រួយ​បារម្ភ​ផ្នែក​សន្តិសុខ។

កូរ៉េ​ខាង​ត្បូង​បាន​ផ្អាក​ពាក្យ​បណ្ដឹង​នេះ​កាល​ពី​ខែ​វិច្ឆិកា ឆ្នាំ​មុន ដែល​ជា​ផ្នែក​មួយ​នៃ​កាយវិការ​ក្នុង​ឆន្ទៈ​ល្អ ក្នុង​គោល​បំណង​ដោះស្រាយ​បញ្ហា​តាម​រយៈ​ការ​ចរចា​ដោយ​ផ្ទាល់។

ប៉ុន្តែ លោក Na Seung Sik ដែល​ជា​មន្ត្រី​នៃ​ក្រសួង​ពាណិជ្ជកម្ម​កូរ៉េ​ខាង​ត្បូង បាន​ប្រាប់​អ្នក​កាសែត​កាល​ពី​ថ្ងៃ​អង្គារ​ម្សិលមិញ​ថា ការ​ពិភាក្សា​មិន​បាន​ផ្ដល់​លទ្ធផល​ជា​ផ្លែផ្កា​អ្វី​នោះ​ទេ ដោយសារតែ​រដ្ឋាភិបាល​ជប៉ុន​គ្មាន​ឆន្ទៈ​នៅ​ក្នុង​ការ​ដោះស្រាយ​ជម្លោះ។

លោក​បាន​បន្ថែម​ទៀត​ថា គ្មាន​បញ្ហា​សន្តិសុខ​ណា​មួយ​កើត​ឡើង​នោះ​ទេ ពាក់ព័ន្ធ​នឹង​វត្ថុធាតុ​ដើម​ទាំង​នេះ នៅ​ក្នុង​រយៈពេល ១១ ខែ​កន្លង​មក​នេះ។

ពាក្យ​បណ្ដឹង​នេះ​ស្នើ​ឲ្យ​អង្គការ​ពាណិជ្ជកម្ម​ពិភពលោក​បើក​គណៈកម្មាធិការ​ដោះស្រាយ​ជម្លោះ ដែលជា​ដំណើរការ​មួយ​ដែល​អាច​ត្រូវការ​ពេល​ជាង​មួយ​ឆ្នាំ​ដើម្បី​ដោះស្រាយ​បញ្ហា៕

XS
SM
MD
LG