កូរ៉េខាងត្បូងបានដាក់ទណ្ឌកម្មថ្មីៗជាឯកតោភាគីទៅលើកូរ៉េខាងជើងនៅថ្ងៃអង្គារនេះ ខណៈដែលទីភ្នាក់ងារស៊ើបការសម្ងាត់របស់រដ្ឋាភិបាលក្រុងសេអ៊ូលបានបន្ទោសទៅលើអ្នកលួចយកទិន្នន័យក្នុងកុំព្យូទ័ររបស់រដ្ឋាភិបាលក្រុងព្យុងយ៉ាង ដែលបានចូលលួចទិន្នន័យក្នុងពេលថ្មីៗនេះ។
នៅក្រោមទណ្ឌកម្មដែលត្រូវបានប្រកាសនៅថ្ងៃអង្គារនេះ រដ្ឋាភិបាលក្រុងសេអ៊ូលបានដាក់ជនជាតិកូរ៉េខាងជើងចំនួន៤០នាក់និងស្ថាប័នចំនួន៣០ចូលក្នុងបញ្ជីស្បែកខ្មៅ ដោយសារពួកគេទាំងនោះមានការពាក់ព័ន្ធទៅនឹងកម្មវិធីនុយក្លេអ៊ែររបស់កូរ៉េខាងជើង ហើយទណ្ឌកម្មនេះរារាំងពួកគេទាំងនោះមិនឲ្យពាក់ព័ន្ធជាមួយនឹងកិច្ចព្រមព្រៀងហិរញ្ញវត្ថុណាមួយនៅកូរ៉េខាងត្បូងឡើយ។
ទណ្ឌកម្មនេះក៏បានហាមឃាត់មិនឲ្យនាវាណាមួយដែលចុះចតនៅកំពង់ផែកូរ៉េខាងជើងក្នុងអំឡុងពេល១៨០ថ្ងៃមុន ចូលមកកាន់កូរ៉េខាងត្បូងនោះឡើយ។
កូរ៉េខាងជើងក៏នឹងលើកទឹកចិត្តប្រជាពលរដ្ឋរបស់ខ្លួនឲ្យចៀសវាងបរិភោគនៅក្នុងភោជនីយដ្ឋានរបស់កូរ៉េខាងជើងនៅពេលធ្វើដំណើរទៅបរទេស។ រដ្ឋាភិបាលក្រុង ព្យុងយ៉ាង មានបើកដំណើរការភោជនីយដ្ឋានរាប់រយនៅទូទាំងពិភពលោក ដែលបានផ្តល់ជាប្រភពចំណូលរបស់រដ្ឋាភិបាលកូរ៉េខាងជើង។
នៅក្នុងចំណាត់ការដែលអាចនឹងធ្វើឲ្យរុស្ស៊ីអាកអន់ចិន កូរ៉េខាងត្បូងនឹងផ្អាកគម្រោង Rajin-Hassan ដែលមានភាគីចំនួន៣ចូលរួម ក្នុងការកសាងប្រព័ន្ធរថភ្លើងក្នុងការដឹកជញ្ជូនធ្យូងសឺប៊ីយ៉ារបស់រុស្សីទៅកាន់កំពង់ផែកូរ៉េខាងជើងនៅតំបន់Hassan ហើយបន្ទាប់មកបញ្ជូនទៅកូរ៉េខាងត្បូងតាមរយៈកាប៉ាល់។
មុនពេលឯកភាពនឹងគាំទ្រទណ្ឌកម្មរបស់អង្គការសហប្រជាជាតិ រុស្ស៊ីបានប្រើប្រាស់អំណាចជំទាស់របស់ខ្លួនជាសមាជិកនៃក្រុមប្រឹក្សាសន្តិសុខរបស់អង្គការសហប្រជាជាតិ ដើម្បីធានាថាសេចក្តីសម្រេចនេះនឹងមិនរារាំងដល់ការនាំចេញធ្យូងសឺប៊ីយ៉ាទៅកាន់កូរ៉េខាងជើងនោះទេ។
លោកស្រីប្រធានាធិបតីកូរ៉េខាងត្បូង Park Geun-hye និងមេដឹកនាំរុស្ស៊ីគឺលោក Vladimir Putin បានចុះហត្ថលេខាលើកិច្ចព្រមព្រៀងមួយកាលពីឆ្នាំ២០១៣ ដើម្បីសហការលើគម្រោងសាងសង់ផ្លូវអយស្ម័យយាននេះ។
មានសេចក្តីរាយការណ៍ថា រុស្ស៊ីបានសម្តែងការសោកស្តាយចំពោះការសម្រេចរបស់រដ្ឋាភិបាលក្រុងសេអ៊ូល៕
