ក្រុមអ្នកជំនាញការបានដឹងពីមុនថាការជក់បារីបណ្តាលឲ្យកើតជំងឺមហារីកច្រើនប្រភេទ។ ការវិភាគថ្មីមួយបង្ហាញថា ការជក់បារីជាមូលហេតុពាក់កណ្តាលនៃជំងឺមហារីកប្លោកនោមទាំងអស់ដែលកើតមាននៅនឹងបុរសនិងស្ត្រី គឺច្រើនជាងចំនួនដែលគេបានដឹងពីមុន។
មនុស្សនៅជុំវិញពិភពលោកច្រើនជាង៣៥ម៉ឺននាក់ បានធ្វើរោគវិនិច្ឆ័យជារៀងរាល់ឆ្នាំ ដែលឃើញថាមានជំងឺមហារីកប្លោកនោម គឺជាសរីរាង្គនៅផ្នែកខាងក្រោមនៃពោះរបស់មនុស្ស សម្រាប់ផ្ទុកនិងបញ្ចេញទឹកម៉ូត្រ។
ការសិក្សាមួយនៅឆ្នាំ២០០៩ នៃក្រុមអ្នកជក់បារីនៅក្នុងរដ្ឋ នូ ហាំស្ហឺរ (New Hampshire) របស់សរអា បានទាក់ទាញអារម្មណ៍របស់លោក នៀល ហ្វ្រ៊ីដម៉ាន់ (Neal Freedman) អ្នកស្រាវជ្រាវផ្នែកវិទ្យាសាស្ត្រម្នាក់ នៅវិទ្យាស្ថានជំងឺមហារីកជាតិរបស់សរអា ឬហៅ US National Cancer Institute។ លោក Freedman និងសហសេវិកបានសង្កេតឃើញថាមានចំនួនខ្ពស់មិនធម្មតាមួយនៃករណីអ្នកកើតជំងឺមហារីកប្លោកនោម ដែលគេបានកំណត់ថាមានទាក់ទងទៅនឹងការជក់បារី។
ពួកគេបានធ្វើការស៊ើបអង្កេតបន្ថែមអំពីទំនាក់ទំនងនេះ ដោយធ្វើវិភាគលើទិន្នន័យដែលប្រមូលបានពីមនុស្ស៥០ម៉ឺននាក់ដែលចូលរួមនៅក្នុងការសិក្សាអំពីអាហារនិងសុខភាពរបស់វិទ្យាស្ថានជាតិខាងផ្នែកសុខភាព។ ក្រុមអ្នកចូលរួមនៅក្នុងការសិក្សារយៈពេលយូរ ដែលបានចាប់ផ្តើមនៅក្នុងឆ្នាំ១៩៩៥ មានអាយុរវាងពី៥០ទៅ៧១ឆ្នាំនៅពេលចាប់ផ្តើម។
នៅពេលលោក Freedman ពិនិត្យមើលទិន្នន័យដែលប្រមូលបានពីអ្នកមកចូលរួមនៅឆ្នាំ២០០៦ លោកបានរកឃើញថាបុរសនិងស្ត្រី៤ពាន់៥រយនាក់ បានកើតជំងឺមហារីកប្លោកនោម។
«នៅក្នុងការសិក្សារបស់យើង អ្នកជក់បារីមានគ្រោះថ្នាក់កើតជំងឺមហារីកប្លោកនោម ច្រើនជាងអ្នកមិនដែលជក់បារីសោះដល់ទៅ៤ដង។ ហើយចំនួននេះខ្ពស់ជាងចំនួនដែលគេបានសង្កេតឃើញពីមុនក្នុងចំណោមក្រុមមនុស្សដែលគេបានធ្វើការសិក្សានៅក្នុងរយៈពេលដំបូងៗ គឺរវាងទសវត្ស១៩៦០ ១៩៧០ និង១៩៨០»។
លោក Freedman មានប្រសាសន៍ថា នៅក្នុងការសិក្សានៃក្រុមអ្នកចូលរួមដំបូងៗ គ្រោះថ្នាក់កើតជំងឺមហារីកប្លោកនោមនៃក្រុមអ្នកជក់បារីនៅពេលនោះមានតែ៣ដងខ្ពស់ជាង»។
«ការរកឃើញសំខាន់ផ្សេងៗទៀតដែលយើងបានឃើញនោះ គឺថាការជក់បារីបានបង្ហាញថាជំងឺមហារីកប្លោកនោមប្រមាណ៥០ភាគរយបានកើតមានជាមួយបុរសនិងស្ត្រី នៅក្នុងការសិក្សារបស់យើង។ ការសិក្សាពីមុនៗបានធ្វើឡើងក្នុងចំណោមប្រជាជនដែលមានស្ត្រីជក់បារីតិចជាងបុរស។ ហើយនៅក្នុងការសិក្សាទាំងឡាយនោះ ការជក់បារីបានបង្ហាញថាបុរសកើតជំងឺមហារីកប្លោកនោម មានប្រមាណ៥០ភាគរយ ប៉ុន្តែស្ត្រីមានរវាងត្រឹមតែ២០និង៣០ភាគរយប៉ុណ្ណោះ»។
ជាបន្ថែម លោក Freedman មានប្រសាសន៍ថា សមាសធាតុបារីបានផ្លាស់ប្តូរចាប់តាំងពីសម័យឆ្នាំ១៩៦០។ នៅពេលដែល កម្រិតជ័រកន្ទុយបារីនិងជាតិនីកូទីនត្រូវបានកាត់បន្ថយ អ្នកស្រាវជ្រាវនិយាយថា ហាក់ដូចជាមានការកើនចំនួននៃជាតិគីមីដែលគេដឹងថាជាមូលហេតុបណ្តាលឲ្យកើតមហារីក រួមមានជាតិ Beta napthylamine ដែលត្រូវបានភ្ជាប់ទៅនឹងជំងឺមហារីកប្លោកនោម។
ការសិក្សាថ្មីក៏បានរកឃើញថាមានការកើនគ្រោះថ្នាក់នៃជំងឺមហារីកប្លោកនោមនៅក្នុងក្រុមអ្នកធ្លាប់ជក់ពីមុនដែរ។ អ្នកទាំងនោះទំនងជាអាចកើតជំងឺនេះ ពីរដងច្រើនជាងអ្នកដែលមិនជក់សោះ។
អត្ថបទមួយដែលរៀបរាប់អំពីការសិក្សាជំងឺមហារីកប្លោកនោម បានបោះពុម្ភផ្សាយនៅក្នុងទស្សនាវដ្តីពេទ្យឈ្មោះ the Journal of the American Medical Association៕
ប្រែសម្រួលដោយ នុច សារីតា
