ក្រុមអាជីវករនៅក្នុងខេត្តព្រះសីហនុ នឹងធ្វើដំណើរមកកាន់រាជធានីភ្នំពេញម្ដងទៀតនៅក្នុងសប្ដាហ៍ខាងមុខ ដើម្បីទទួលបានការឆ្លើយតបពីរដ្ឋសភាជាតិ និងខុទ្ទកាល័យរបស់លោកនាយករដ្ឋមន្ត្រី ហ៊ុន សែន អំពីសំណើដែលពួកគេសុំឲ្យមានការអភិវឌ្ឍកន្លែងលក់ដូររបស់ពួកគេនៅនឹងកន្លែង បន្ទាប់ពីលោក យន្ត មីន អភិបាលខេត្តព្រះសីហនុ បានប្រកាសថា អាជ្ញាធរ នឹងអនុវត្តវិធានការណ៍របស់រដ្ឋាភិបាលក្នុងការចុះរុះរើសំណង់អាជីវកម្មរបស់ក្រុមអាជីវករដូចការគ្រោងទុក។ នេះបើយោងទៅតាមការបញ្ជាក់ពីតំណាងក្រុមអាជីវករ។
ការធ្វើដំណើរមកកាន់រាជធានីភ្នំពេញម្ដងទៀតរបស់ក្រុមអាជីវករនេះ នឹងត្រូវធ្វើឡើង នៅខណៈដែលពួកគេនៅសល់ពេលមិនដល់២សប្ដាហ៍ទៀតប៉ុណ្ណោះ សម្រាប់ការត្រៀមខ្លួនរុះរើសំណង់អាជីវកម្មរបស់ពួកគេ ដែលអាជ្ញាធរចោទថា បានសង់លើដីចំណីឆ្នេរ។
លោក ឯក វិធាន តំណាងអាជីវករនៅក្នុងតំបន់ឆ្នេរអូត្រេះ បានមានប្រសាសន៍ថា ក្រុមអាជីវករសម្រេចមករាជធានីភ្នំពេញម្ដងទៀត ដោយសារតែអាជ្ញាធរខេត្តព្រះសីហនុ កាលពីថ្ងៃពីព្រឹកថ្ងៃសៅរ៍ បានចុះទៅប្រាប់ក្រុមអាជីវករជាសាធារណៈថា អាជ្ញាធរខេត្ត នឹងចុះរុះរើតូបរបស់ក្រុមអាជីវករ ដែលមិនព្រមរុះរើតាមការស្នើសុំរបស់អាជ្ញាធរ។
លោកបន្តថា អាជ្ញាធរខេត្តក្នុងពេលជួបជុំជាមួយអាជីវករកាលពីថ្ងៃសៅរ៍នោះ មិនបានឲ្យដឹងថា អាជីវករ អាចរក្សាសំណង់អាជីវកម្មរបស់គេ ដើម្បីបន្តការលក់ដូរទៀតនោះទេ។
«គេគ្រាន់តែផ្សព្វផ្សាយ ដើម្បីឲ្យរដ្ឋាភិបាលហ្នឹង ដឹងឮថា គេបានផ្សព្វផ្សាយ ដល់ពលរដ្ឋអស់ហើយ ជាសាធារណៈ សន្និសីទអញ្ចឹង គឺថាគ្មានផលវិជ្ជមានសម្រាប់ពួកអាជីវករទេគឺគេត្រូវតែអនុវត្តន៍តាមច្បាប់»។
លោក ឯក វិធាន បានឲ្យដឹងបន្ថែមថា អាជ្ញាធរខេត្ត ទំនងជាមានចេតនាចង់យកតំបន់ឆ្នេរនេះ ទៅឲ្យភាគីឯកជនណាមួយដើម្បីគ្រប់គ្រង។
លោក អះអាងថា ក្រុមអាជីវករមិនអាចទទួលយកការណ៍នេះ បានទេ ព្រោះក្រុមអាជីវករ គឺជាផ្នែកមួយដ៏សំខាន់នៃការទាក់ទាញភ្ញៀវជាតិ និងអន្តរជាតិឲ្យមកលេងខេត្តព្រះសីហនុ។
«គម្រោងថា គេមានអ្នកគ្រប់គ្រង អញ្ចឹងបានន័យថា បើមិនរដ្ឋគឺឯកជន។ អញ្ចឹងភាសាហ្នឹង បានន័យថា រដ្ឋយកឆ្នេរនេះរបស់យើង ពីអាជីវករទៅឲ្យ ក្រុមហ៊ុនណាមួយ ឬរដ្ឋជាអ្នកធ្វើប្លង់មេ ហើយលក់ជួល ឬក៏លក់ ឬក៏ជួល ឲ្យអាជីវករវិញ។ អានេះវាតាមដែលខ្ញុំគិតទេណា៎ពីព្រោះគាត់ គាត់ថា សម្រាប់ឲ្យអ្នកមានអ្នកគ្រប់គ្រងតំបន់ឆ្នេរ»។
យោងទៅតាមសេចក្ដីប្រកាសព័ត៌មានរបស់សាលាខេត្តព្រះសីហនុ ដែលចុះហត្ថលេខាដោយលោកអភិបាលខេត្ត យន្ត មីន នៅថ្ងៃទី១២ ខែកុម្ភៈ បានឲ្យដឹងថា អាជ្ញាធរខេត្ត ស្នើឲ្យអាជីវករ ដែលកំពុងធ្វើអាជីវកម្មលក់ដូរ នៅឆ្នេរអូរត្រេះ ឆ្នេរអូរឈើទាល (ទល់មុខដីក្រុមហ៊ុន សុខា អូតែល អតីតដីអារីស្តុន) និងឆ្នេរមុខព្រះរាជដំណាក់ចាស់កំពង់សោម រុះរើសំណង់អាជីវកម្មរបស់ពួកគេចេញពីដីចំណីឆ្នេរនៅក្នុងតំបន់ទាំងបីនេះ ក្នុងរយៈពេលមួយខែ ដែលនឹងចាប់ផ្ដើមពីថ្ងៃទី១៣ ខែកុម្ភៈ ដល់ថ្ងៃទី១៣ ខែមីនា ឆ្នាំ២០១៦។
សេចក្ដីប្រកាសព័ត៌មាននោះ បានបញ្ជាក់ពីចំណាត់ការរបស់អាជ្ញាធរថា បើសិនជាផុតកំណត់កាលបរិច្ឆេទនៃការរុះរើ ហើយអាជីវករមិនព្រមរុះរើទៀតនោះ គណៈបញ្ជាការឯកភាពរដ្ឋបាលខេត្ត នឹងចាត់វិធានការចុះរុះរើ ដោយមិនទទួលខុសត្រូវរាល់ការខូចខាតនោះទេ។
លោក យន្ត មីន អភិបាលខេត្តព្រះសីហនុ ថ្លែងប្រាប់VOAថា អាជ្ញាធរ ខេត្តបានបញ្ជូនសំណើរបស់ក្រុមអាជីវករ មកកាន់រដ្ឋបាលថ្នាក់ជាតិសម្រាប់ការពិចារណាហើយ។
លោកបន្ថែមថា លោកមិនទាន់ទទួលបានការឆ្លើយតបយ៉ាងណានោះទេ ពីរដ្ឋបាលថ្នាក់ជាតិ។
លោក យន្ត មីន បញ្ជាក់ថា ពុំមានផែនការអនុញ្ញាតឲ្យក្រុមហ៊ុនណាមួយមកវិនិយោគលើតំបន់ឆ្នេរទាំងបីទីតាំងនេះទេ ហើយក៏មិនមានគោលការណ៍សង់តូបសម្រាប់ជួលទៅឲ្យអាជីវករដែរ។
«ការអភិវឌ្ឍហ្នឹង គឺវាអភិវឌ្ឍន៍ហើយ។ ប៉ុន្តែមិនមែន អភិវឌ្ឍន៍ទៅជាកន្លែងលក់ដូរ ឬក៏សួនច្បារដូចអីអញ្ចឹងទៅណា៎។ អត់មានអាចឲ្យគាត់នៅលក់ដូរអញ្ចឹង»។
តំណាងអាជីវករផ្សេងទៀត ធ្លាប់បានឲ្យVOA ដឹងថា ទីតាំងដែលត្រូវអាជ្ញាធរឲ្យរុះរើនេះ គឺជាទីតាំង ដែលធ្លាប់រងការឈូសឆាយ បង្កឲ្យមានខូចខាតជាច្រើនពីខាងក្រុមហ៊ុន សុខា អូតែល កាលពីឆ្នាំ២០០៦។ ទំហំនៃការខូចខាតកាលពីពេលនោះ គឺមានចាប់ពី ១០០០០ដុល្លារអាមេរិក រហូតដល់ជិត១០០០០០ម៉ឺនដុល្លារអាមេរិក សម្រាប់អាជីវករម្នាក់ៗ។
ក្រសួងមហាផ្ទៃ បានធ្វើការសម្របសម្រួលឲ្យអាជីវករទទួលយកប្រាក់សំណង៣៥០០ដុល្លារអាមេរិក តែពួកគេមួយចំនួន បានបដិសេធសំណងនេះ។
លោក ជា ប៉ូច ជាអ្នកតំណាងរាស្ត្រនៃគណបក្សប្រឆាំង និងជាសមាជិកនៃ គណៈកម្មការសិទ្ធិមនុស្ស ទទួលពាក្យបណ្ដឹងនៃសភាជាតិ ថ្លែងថា លោក និង អ្នកតំណាងរាស្ត្រមកពីគណបក្សគ្រប់គ្រងប្រទេស គឺលោកស្រី ឡោក ខេង កំពុងព្យាយាមទាក់ទងមន្ត្រីខេត្តព្រះសីហនុ ដើម្បីរកពេលជួបពិភាក្សាលើសំណើរបស់ក្រុមអាជីវករដែលចង់បានការអភិវឌ្ឍន៍នៅនឹងកន្លែង។
«ខ្ញុំកំពុង ជាមួយលោកជំទាវ ឡោក ខេង កំពុងទាក់ទងអាជ្ញាធរសិនណ៎ា។ ខ្ញុំអត់ទាន់ធ្វើអត្ថាធិប្បាយអីទៀត ដោយសារ ជួបអាជ្ញាធរសិន បានខ្ញុំអាចនិយាយបាន។ ដឹងហើយណ៎ា»។
ក្រុមអាជីវករប្រមាណជា១០០នាក់ បានធ្វើដំណើរមករាជធានីភ្នំពេញកាលពីថ្ងៃព្រហស្បតិ៍ ទី១៨ ខែកុម្ភៈ ហើយបានស្នើសុំលោក នាយករដ្ឋមន្ត្រី ហ៊ុន សែន រដ្ឋសភាជាតិ និងក្រសួងរៀបចំដែនដី នគររូបនីយកម្ម និងសំណង់ អភិវឌ្ឍន៍តូបលក់ដូររបស់ខ្លួននៅទីតាំងទាំងបីនោះ។
មួយថ្ងៃក្រោយមក គឺថ្ងៃសុក្រទី ១៩ ខែកុម្ភៈ គណៈកម្មាធិការជាតិគ្រប់គ្រង និង អភិវឌ្ឍន៍តំបន់ឆ្នេរសមុទ្រកម្ពុជា បានផ្ដល់ការយល់ព្រមលើផែនការរៀបចំឆ្នេរ និងវិធានការណ៍របស់អាជ្ញាធរខេត្តព្រះសីហនុក្នុងការចុះរុះរើសំណង់អាជីវកម្មរបស់អាជីវករទាំងនោះ ដោយបានច្រានចោលការស្នើសុំរបស់ក្រុមអាជីវករ។ នេះបើយោងតាមការបញ្ជាក់ពីអ្នកនាំពាក្យនៃក្រសួងរៀបចំដែនដី នគររូបនីយកម្ម និងសំណង់។
អាជ្ញាធរ អះអាងថា គណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា និងសាលាខេត្តព្រះសីហនុ គ្រោងរៀបចំកែលំអ និងអភិវឌ្ឍតំបន់ឆ្នេរខ្សាច់ក្នុងខេត្តព្រះសីហនុ ដើម្បីធានាបាននូវការគ្រប់គ្រង និងរក្សាបរិស្ថានប្រកបដោយនិរន្តរភាព៕
