ក្រុមអាជីវករប្រមាណជាង១០០នាក់មកពីខេត្តព្រះសីហនុ បានមកកាន់រាជធានីភ្នំពេញ នៅព្រឹកថ្ងៃព្រហស្បតិ៍នេះ ដើម្បីដាក់ញតិ្តជូនដល់លោកនាយករដ្ឋមន្ត្រី ហ៊ុន សែន និងលោក ហេង សំរិន ប្រធានរដ្ឋសភាជាតិ និងក្រសួងដែនដី នគរូបនីយកម្ម និងសំណង់ ស្នើសុំការអនុញ្ញាតឲ្យធ្វើការអភិវឌ្ឍនៅនឹងកន្លែងក្នុងតំបន់ឆ្នេរចំនួនបីទីតាំង ដែលពួកគេកំពុងប្រកបអាជីវកម្ម។ នេះបើយោងទៅតាមការបញ្ជាក់ពីក្រុមតំណាងអាជីវករ និងមន្ត្រីរដ្ឋាភិបាល។
ការដាក់ញត្តិរបស់ពួកគេកើតមាន បន្ទាប់ពីសាលាខេត្តព្រះសីហនុកាលពីសប្តាហ៍មុន បានចេញសេចក្តីប្រកាសព័ត៌មាន ស្នើឲ្យអាជីវករកំពុងធ្វើអាជីវកម្មលក់ដូរ នៅឆ្នេរអូរត្រេះ ឆ្នេរអូរឈើទាល និងឆ្នេរមុខព្រះរាជដំណាក់ចាស់កំពង់សោម រុះរើសំណង់អាជីវកម្មរបស់ពួកគេចេញពីដីចំណីឆ្នេរនៅក្នុងតំបន់ទាំងបីនោះ ក្នុងរយៈពេលមួយខែ ដែលនឹងចាប់ផ្ដើមពីថ្ងៃទី១៣ ខែកុម្ភៈ ដល់ថ្ងៃទី១៣ ខែមីនា ឆ្នាំ២០១៦។
អ្នកស្រី ភឿក សុខេន វ័យ៥២ឆ្នាំ តំណាងអាជីវករលក់ដូរក្នុងតំបន់ឆ្នេរអូរឈើទាល ទល់មុខដីក្រុមហ៊ុន សុខាអូតែល ថ្លែងថា ញត្តិរបស់អាជីវករត្រូវបានដាក់ជូនទៅកាន់ខុទ្ទកាល័យរបស់ លោក នាយករដ្ឋមន្ត្រី ហ៊ុន សែន សភាជាតិ និងក្រសួងដែនដី នគរូបនីយកម្ម និងសំណង់។
អ្នកស្រីបញ្ជាក់ថា៖«បានដាក់នៅខុទ្ទកាល័យរបស់គាត់អស់ហើយ។ ដាក់ហើយអស់ហើយ»។
ការស្នើឲ្យរុះរើតូបរបស់អាជីវករដោយអាជ្ញាធរខេត្តព្រះសីហនុនេះធ្វើឡើង ខណៈដែលគណៈកម្មាធិការជាតិគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជា និងសាលាខេត្តព្រះសីហនុ គ្រោងរៀបចំកែលំអ និងអភិវឌ្ឍន៍តំបន់ឆ្នេរខ្សាច់ ក្នុងខេត្តព្រះសីហនុ ដើម្បីធានាបាននូវការគ្រប់គ្រង និងរក្សាបរិស្ថានប្រកបដោយនិរន្តរភាព។
ការរៀបចំនេះនឹងត្រូវធ្វើឡើង ដើម្បីត្រៀមប្រារព្ធពិធីបុណ្យសមុទ្រ ដែលគ្រោងនឹងរៀបចំក្នុងខេត្តព្រះសីហនុ នៅដើមខែធ្នូ ឆ្នាំ២០១៦ខាងមុខនេះ។
លោក ឯក វិធាន វ័យ៣៦ឆ្នាំ តំណាងក្រុមអាជីវករដែលមានតូបលក់ដូរ៦២តូប នៅក្នុងតំបន់ឆ្នេរអូរត្រេះ ក៏បានបញ្ជាក់ផងដែរថា តំណាងរាស្ត្រពីររូបមកពីគណបក្សធំៗទាំងពីរក្នុងសភា បានចេញទទួលសំណើរបស់ក្រុមអាជីវករ ហើយបានប្រាប់ក្រុមអាជីវករថា នឹងយកសំណើរបស់អាជីវករទៅពិភាក្សាជាមួយមន្ត្រីរដ្ឋាភិបាលទទួលបន្ទុកក្នុងការរៀបចំឆ្នេរសមុទ្រ។ លោកនិយាយបញ្ជាក់ពីការឆ្លើយតបរបស់អ្នកតំណាងរាស្ត្រពីររូបនោះថា៖
«គាត់ថា គាត់នឹងធ្វើឲ្យមានការឯកភាពគ្នា មិនឲ្យមានការមិនប្រឆាំងគ្នា មានការមិនៗទទួលយកបានទាំងអស់គ្នា។ គាត់ថា នឹងធ្វើឲ្យដើម្បីប្រជាជនដែរ»។
លោកឲ្យដឹងបន្ថែមថា ទោះបីក្រុមអាជីវករបានដាក់ញត្តិចូលទៅដល់ស្ថាប័នទាំងបីនេះក៏ដោយ ក៏ការព្រួយបារម្ភអំពីការបាត់បង់ទីតាំងប្រកបរបររកស៊ីរបស់ពួកគេនៅតែកើតមាន ខណៈដែលពួកគេមានពេលត្រឹមតែមួយខែសម្រាប់ការតស៊ូមតិ។ លោកបញ្ជាក់ថា តូបដែលអាចរងការប៉ះពាល់ពីផែនការរៀបចំឆ្នេរឡើងវិញនេះ គឺមានប្រមាណជាង១៤៥តូប។
នៅក្នុងសេចក្ដីប្រកាសព័ត៌មានរបស់សាលាខេត្តព្រះសីហនុ ដែលចុះហត្ថលេខាដោយលោកអភិបាលខេត្ត យន្ត មីន កាលពីថ្ងៃទី១២ ខែកុម្ភៈ បានបញ្ជាក់ពីចំណាត់ការរបស់អាជ្ញាធរថា បើសិនជាផុតកំណត់កាលបរិច្ឆេទនៃការរុះរើ ហើយអាជីវករមិនព្រមរុះរើទៀតនោះ គណៈបញ្ជាការឯកភាពរដ្ឋបាលខេត្ត នឹងចាត់វិធានការចុះរុះរើ ដោយមិនទទួលខុសត្រូវរាល់ការខូចខាតនោះទេ។
ក៏ប៉ុន្តែ កាលពីថ្ងៃច័ន្ទដើមសបា្តហ៍នេះ លោកអភិបាលខេត្ត យន្ត មីន ឲ្យដឹង បន្ទាប់ពីលោកបានជួបប្រជុំជាមួយក្រុមអាជីវករថា លោកនឹងយកការសើ្នសុំរបស់ក្រុមអាជីវករ ដើម្បីធ្វើការអភិវឌ្ឍនៅនឹងកន្លែងទៅពិភាក្សាជាមួយរដ្ឋាភិបាលថ្នាក់ជាតិ ក្នុងនោះគឺមានគណៈកម្មាធិការជាតិគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជា។
លោក ប្រាក់ វិសាល អនុប្រធានរដ្ឋបាលខេត្តព្រះសីហនុ ទទួលបន្ទុកកិច្ចការអភិវឌ្ឍន៍ទីកន្លែងទេសចរណ៍ ថ្លែងថា លោកពុំទាន់ធ្វើការអធិប្បាយបានទេ ចំពោះការដាក់ញត្តិរបស់ក្រុមអាជីវករ តែថា ការជួបប្រជុំបន្ទាន់មួយរវាងក្រុមអាជីវករ និងសាលាខេត្តនឹងត្រូវធ្វើឡើងឆាប់ៗនេះ។
រីឯ លោក សេង ឡូត អ្នកនាំពាក្យក្រសួងដែនដីនគរូបនីយកម្ម និងសំណង់ ថ្លែងប្រាប់ VOA ថា មន្ត្រីរដ្ឋបាលក្រសួងបានទទួលលិខិតរបស់ក្រុមអាជីវករ ហើយថា ក្រសួងបានបញ្ជូនលិខិតនោះទៅ កាន់អគ្គលេខាធិការដ្ឋាននៃគណៈកម្មាធិការជាតិគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជា។
«រដ្ឋបាលរបស់ក្រសួងបានចុះទៅទទួលយកមក ហើយបានបញ្ជូនទៅអគ្គលេខាធិការដ្ឋានរបស់គណៈកម្មាធិការគ្រប់គ្រង និងអភិវឌ្ឍន៍តំបន់ឆ្នេរហើយ»។
លោកមិនអាចឲ្យដឹងថា គណៈកម្មាធិការជាតិគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជា នឹងសម្រេចយ៉ាងណានោះទេ ចំពោះញត្តិរបស់អាជីវករ តែលោកថ្លែងថា កិច្ចប្រជុំមួយរបស់គណៈកម្មាធិការនេះ នឹងត្រូវធ្វើឡើងនៅទីស្តីការក្រសួងដែនដីនគរូបនីយកម្ម និងសំណង់នៅព្រឹកថ្ងៃសុក្រស្អែកនេះ។
លោក ក៏មិនអាចឲ្យដឹងថា ញត្តិរបស់អាជីវករទាំងនោះ នឹងត្រូវគេលើកយកមកពិភាក្សាក្នុងកិច្ចប្រជុំដែលត្រូវធ្វើឡើងជាប្រចាំនោះដែរ។ លោកគ្រាន់តែបញ្ជាក់ថា ការប្រជុំនឹងផ្តោតលើការប្រែក្លាយឆ្នេរសមុទ្រ ឲ្យក្លាយជាឆ្នេរសាធារណៈ ដោយមិនមានការកាន់កាប់ជាលក្ខណៈឯកជននោះទេ។
យោងទៅតាមផែនការនៃការរៀបចំឆ្នេរនៅក្នុងតំបន់ឆ្នេរទាំងបី តូបថ្មីដែលនឹងរៀបចំឡើងដោយសាលាខេត្ត នឹងត្រូវដាក់ឲ្យឆ្ងាយពីគ្នា ចម្ងាយ២៥ម៉ែត្រ ទៅ៣០ម៉ែត្រ និងស្ថិតនៅឆ្ងាយពីការជន់ជោររបស់ទឹកសមុទ្រប្រមាណពី៣០ ទៅ៥០ម៉ែត្រ ផ្អែកទៅតាមស្ថានភាពភូមិសាស្ត្ររបស់ឆ្នេរនីមួយៗ។
តំណាងអាជីវករឲ្យដឹងបន្ថែមថា ពួកគេនឹងត្រឡប់មកកាន់រាជធានីភ្នំពេញម្តងទៀត នៅសប្តាហ៍ខាងមុខនេះ ដើម្បីទទួលការឆ្លើយតបពីស្ថាប័ន ដែលពួកគេបានដាក់ញត្តិជូននៅថ្ងៃព្រហស្បតិ៍នេះ៕
