ភ្ជាប់​ទៅ​គេហទំព័រ​ទាក់ទង

អាជ្ញាធរ​ និង​ប្រជា​ពលរដ្ឋ​ខេត្ត​សៀមរាប​ធ្វើ​ពិធី​កាន់​មរណៈ​ទុក្ខ​ចុង​ក្រោយ

  • វង្ស ដារ៉ា

​ព្រះ​ឆាយា​លក្ខណ៍​របស់​សម្តេចឪ​ក្នុង​ពិធី​ថ្វាយព្រះភ្លើង​បូជា។​​ វីអូអេខ្មែរ
កាល​ពីល្ងាច​ថ្ងៃ​សៅរ៍​ទី២​ខែ​កុម្ភៈ​នេះ​នៅ​បរិវេណ​វត្ត​ដំណាក់​ក្នុង​ក្រុង​សៀមរាប​ ក្រុម​តាជី ដូនជី​និង​ប្រជា​ពលរដ្ឋ​ជាច្រើន​នាក់​ បាន​ជួបជុំ​គ្នា​រៀបចំ​ពិធី​សូត្រ​មន្ត​បង្សុកូល​ដើម្បី​ឧទ្ទិស​កុសល​ផល​បុណ្យ​ថ្វាយដល់​ព្រះ​មហា​វីរ​ក្សត្រ​សម្តេច​ព្រះ​នរោត្តម​ សីហនុ​ ដែល​ព្រះ​អង្គ​បាន​យាង​ចូល​ទិវង្គត​កាលពី​ខែ​តុលា​ឆ្នាំ​មុន។​
នេះ​ជា​កម្មវិធី​មួយ​ក្នុង​ចំណោម​កម្ម​វិធី​ឯទៀត​ ដែល​ប្រជា​ពលរដ្ឋ​ក្នុង​ខេត្ត​សៀមរាប​បាន​ធ្វើ​ដើម្បី​ជា​ការ​ចូល​ រួម​កាន់​មរណៈ​ទុក្ខ​ចុង​ក្រោយ ​មុន​ពេល​ព្រះ​សព​របស់​ព្រះអង្គ​ត្រូវ​បាន​ថ្វាយ​ព្រះ​ភ្លើង។​
លោក​តា​អាចារ្យ​ម្នាក់​ ​ដែល​ជា​អ្នក​រៀបចំ​កម្ម​វិធី​នៅ​វត្ត​ដំណាក់​នោះ​ បាន​ថ្លែង​ថា​ កម្មវិធី​នេះ​ប្រព្រឹត្ត​ធ្វើ​ទៅ​ឲ្យ​គ្រប់​៧​ថ្ងៃ​ថ្វាយ​ព្រះ​អង្គ ​សូម​ឲ្យ​ព្រះ​អង្គ​អនមោទនា​ទទួល​នូវ​ផល​បុណ្យ​ដែល​កូនចៅ​បាន​ធ្វើ​ថ្វាយ​នេះ។​
«អញ្ចឹង​យើង​ខ្ញុំ​ទាំង​អស់​គ្នា​ដែល​ជា​កូន​ ជាចៅ​ហ្នឹង​ មាន​សេចក្តី​ស្រណោះ​ស្រណោក​ព្រះ​ករុណា​ជា​អម្ចាស់​ដែល​ធ្លាប់តែ​នៅ​ជាមួយ​នឹង​កូន​ចៅ។​ កូន​ចៅ​ស្តាយ​ណាស់​ មិន​ចង់​ឲ្យ​ព្រះ​អង្គឃ្លាត​ចាក​ចេញ​ពីរូប​ របស់​យើង​ទាំង​អស់​គ្នា​ទេ។​ ដោយ​ឃាត់​មិន​បាន​នៅ​ពេល​នេះ​ព្រះ​អង្គ​ក៏​ចូល​ទិវង្គត​ទៅ។​ អញ្ចឹង​យើង​ខ្ញុំ​ទាំងអស់​គ្នា​មាន​សេចក្តី​សោក​ស្តាយ​ព្រះ​អង្គ​ណាស់​ យើង​ក៏​បាន​ធ្វើ​បុណ្យ​នៅ​ថ្ងៃ​នេះ​ឧទ្ទិស​កុសល​ដល់​ព្រះ​ករុណា​ជា​អម្ចាស់​ហ្នឹង​ សូម​ឲ្យ​លោក​ ទទួល​អនមោទនា​នូវ​បុណ្យ​កុសល​ដែល​កូន​ចៅ​បាន​បំពេញ​ហ្នឹង​ទៅ»។​
ព្រះ​មហា​វីរ​ក្សត្រ​សម្តេច​ព្រះ​នរោត្តម ​សីហនុ​ ជា​ក្សត្រ​ដែល​មាន​ប្រជា​ប្រិយ​ភាព​និង​កិត្តិនាម​ជា​ទី​ស្រឡាញ់​ពេញ​ចិត្ត​របស់​ប្រជា​ពលរដ្ឋ​កម្ពុជា​គ្រប់រូប​តាម​រយៈ​ស្នា​ព្រះ​ហស្ថ​របស់​ព្រះ​អង្គ​ក្នុង​ការ​កសាង​ជាតិ​ មាតុភូមិ​និង​ការពារ​បូរណភាព​ទឹក​ដី។​
លោកតា​អាចារ្យ​រូប​នោះ​ដែល​មិន​ចង់​ឲ្យ​បញ្ចេញ​ឈ្មោះ​ និង​ដែល​អះអាង​ថា​ បាន​ទាន់​សម័យ​សង្គម​រាស្រ្ត​និយម​របស់​ព្រះ​អង្គ​នោះ​ បាន​ថ្លែង​ថា​ ព្រះ​អង្គ​បាន​កសាង​សមិទ្ធិ​ផល​ជាច្រើន​សម្រាប់​បំរើ​ជាតិ​កម្ពុជា​ និង​មាន​ភាព​ល្បីល្បាញ​ពេញ​ពិភព​លោក។​
«តាំងពី​សម័យ​សង្គម​រាស្រ្ត​និយម​មក​ដែល​ខ្ញុំ​ធ្លាប់​បាន​ឃើញ​ បាន​ដឹង​នោះ កសាង​ច្រើន​ណាស់​សមិទ្ធិ​ ផល​នានា​នៅតាម​ជនបទ​ជាដើម​ មាន​តាំងពី​មន្ទីរ​ពេទ្យ​ សាលា​រៀន​គ្រប់​ទីកន្លែង​ទាំងអស់​នៅ​ក្នុង​កម្ពុជា​យើង​នេះ។​ ព្រះ​អង្គ​មាន​ព្រះ​ទ័យ​ការ​ពារ​ទឹក​ដី​របស់​ព្រះ​អង្គ​ឲ្យ​បាន​គង់វង្ស​តទៅ​ ទាមទារ​ទឹកដី​ពី​បារាំង​សេស​មក​វិញ​ ហើយ​ក៏​បាន​សម្រេច​ដោយ​ជោគជ័យ​របស់​ព្រះ​អង្គ​ដែរ»។​
ក្រៅពី​ការ​រៀបចំ​ពិធី​នៅ​តាម​ទី​វត្តអារាម​ នៅ​កន្លែង​ផ្សេង​ទៀត​ក្នុង​ក្រុង​សៀមរាប​ ប្រជា​ពលរដ្ឋ​ក៏​ឆ្លៀត​ទៅ ​អុជ​ធូប​នៅ​ចំពោះ​មុខ​ព្រះ​ឆាយា​ល័ក្ខណ៍​របស់​ព្រះ​អង្គ​ផង​ដែរ​ ដែល​អាជ្ញាធរ​បាន​រៀបចំ​ដាក់​តាំង​ដើម្បី​ ប្រជា​ពលរដ្ឋ​គោរព​បូជា​នោះ។​
អ្នកស្រី​សុខ វន​អាយុ​៥២​ឆ្នាំ មក​ពី​ខេត្ត​កំពង់ចាម​ដើម្បី​ប្រកប​មុខ​របរ​រកស៊ី​នៅ​ក្នុង​ខេត្ត​សៀមរាប​ បាន មក​អុជធូប​គោរព​វិញ្ញាណ​ក្ខន្ធ​របស់​ព្រះអង្គ​នៅ​ឯ​ដំណាក់​របស់​ព្រះ​អង្គ​ជិត​ព្រះ​អង្គ​ចេក​ព្រះ​អង្គ​ចម។​
នៅលើ​អាវ​មាន​ពាក់​សញ្ញា​កាន់​ទុក្ខ​ដែល​មាន​រូប​របស់​សម្តេច​ព្រះ​នរោត្តម​ សីហនុ​នៅ​ចំ​កណ្តាល​ផង​នោះអ្នកស្រី​បាន​ថ្លែង​ថា​ អ្នកស្រី​មក​អុជ​ធូប​នៅ​ដំណាក់​នេះ​ច្រើន​ដង​មក​ហើយ​ដើម្បី​ជា​ការ​គោរព​ចំពោះ​ព្រះអង្គ។​
«ស្តាយ​ដោយ​ធ្លាប់​ឃើញ​សម្តេចតា​រស់​នៅ​ ពេល​ព្រះអង្គ​សោយ​ទិវង្គត​ដូច​ជា​បាត់​អ្វី​ម្យ៉ាង​ពី​ក្នុង​ខ្លួន​យើង​ដែរ។​ ខ្ញុំមក​ទីនេះ​បាន​ថត​ព្រះ​អង្គ​យក​ទៅ​ឯផ្ទះ​ទុក​ថ្វាយ​បង្គំ»។​
អ្នកស្រី​បាន​មាន​និយាយ​ថា ​អ្នកស្រី​បាន​ពាក់​សញ្ញា​កាន់​ទុក្ខ​តាំងពី​ពេល​ដែល​ព្រះអង្គចូល​ទិវង្គត​មក​ម្ល៉េះ ​មិន​បាន​ដោះចេញ​ទេ​គឺ​ដើម្បី​បញ្ជាក់​ពី​ការ​គោរព​ ស្រឡាញ់​ចំពោះ​ព្រះ​មហា​វីរ​ក្សត្រ។​
អភិបាល​ខេត្ត​សៀមរាប​លោក​ស៊ូ ភិរិន្ទ​ បាន​ថ្លែង​ថា​ ក្នុង​រយៈពេល​នេះ​នៅ​ក្នុង​ខេត្ត​នេះ​ អាជ្ញាធរ​បាន​ជូន​ដំណឹង​ឲ្យ​មាន​ការ​កាន់​ទុក្ខ​រយៈពេល​៧ថ្ងៃ​ចុង​ក្រោយ​ ដូច​នៅ​បណ្តា​ខេត្ត​ដទៃ​ទៀត​ដែរ។​
«ពីថ្ងៃ​១​រហូត​ដល់​ថ្ងៃ​៧​ហ្នឹង​គឺ​ថា​ ប្រជា​ពលរដ្ឋ​ទាំងអស់​ត្រូវ​កាន់​ទុក្ខ​គោរព​វិញ្ញាណ​ក្ខន្ធ​ ហើយ​ថ្ងៃ​ថ្វាយ​ព្រះភ្លើង​ជាចុង​ក្រោយ​នេះ​គឺនៅ​តាម​វត្តអារាម​នានា​នឹង​ត្រូវ​ទូង​ស្គរ​វាយ​ជួង​ ថែម​ទៀត។​ ប៉ុន្តែ​ចំពោះ​ការ​បង្ហូត​ទង់ជាតិ​ពាក់​កណ្តាល​ដង​ដើម្បី​គោរព​វិញ្ញាណ​ក្ខន្ធ​គឺ​ត្រូវ​ធ្វើឲ្យ​គ្រប់​៧​ថ្ងៃ។​ ហើយ​កន្លែង​ដទៃ​ទៀត​ហាម​មិនឲ្យ​មាន​ការ​ចាក់​ភ្លេង ​ឬ​ធ្វើអ្វី​ដែល​នាំ​ឲ្យ​មាន​ការ​ប៉ះពាល់ ​ដល់​ការ​កាន់​ទុក្ខ​គោរព​វិញ្ញាណ​ក្ខន្ធ​របស់​ព្រះ​ករុណា​ទេ»។​
ព្រះ​មហា​វីរក្សត្រ​សម្តេច​ព្រះ​នរោត្តម​សីហនុ​ បាន​សោយ​ទិវង្គត​នៅថ្ងៃ​ទី១៥​ខែតុលា​ឆ្នាំ​២០១២​ក្នុង​ព្រះជន្ម​៩០​ព្រះ​វស្សា។​
ព្រះ​បរមសព​ត្រូវបាន​ថ្វាយ​ព្រះ​ភ្លើង​នៅ​ថ្ងៃទី​៤ខែ​កុម្ភៈ៕
XS
SM
MD
LG