អាជ្ញាធរស៊ែបបានចាប់ខ្លួនជនជាប់ចោទដែលរត់គេចខ្លួនចុងក្រោយដែលតុលាការឧក្រិដ្ឋកម្មសង្រ្គាមអន្តរជាតិរបស់អង្គការសហប្រជាជាតិចង់បាន។ លោក ហ្គោរ៉ាន ហាដជីតឆ៍ (Goran Hadzic) ត្រូវបានចោទពីបទល្មើសប្រឆាំងមនុស្សជាតិនិងបទឧក្រិដ្ឋកម្មសង្រ្គាមចំនួន១៤ប្រការសម្រាប់តួនាទីដឹកនាំក្នុងការសម្លាប់រង្គាលជនជាតិក្រូអាតនិងប្រជាពលរដ្ឋមិនមែនជាជនជាតិស៊ែបមកពីផ្នែកខ្លះនៃប្រទេសក្រូអាស៊ីនៅឆ្នាំដំបូងៗនៃសង្រ្គាមនៅបាល់កង់ (Balkans)។
លោក ហ្គោរ៉ាន ហាដជីតឆ៍ ជាជនជាប់ចោទបានរត់គេចពីការកាត់ទោសអស់រយៈពេលជាង៧ឆ្នាំមកហើយ។
ក្នុងការប្រកាសពីការចាប់ខ្លួនលោកហាដជីតឆ៍កាលពីព្រឹកថ្ងៃពុធនៅជិត ផ្ទះរបស់គ្រួសារលោក ហាដជីតឆ៍នៅតំបន់ភ្នំភាគខាងជើងនៃទីក្រុងបែលក្រាដ (Belgrade) លោកប្រធានាធិបតី Boris Tadic ពន្យល់ពីមូលហេតុដែលដំណើរការចាប់ខ្លួននេះហាក់ដូចជាចំណាយពេលយូរ។
«ប្រសិនបើខ្ញុំត្រូវរំលឹកអ្នកពីករណីតាមចាប់ខ្លួនផ្សេងៗទៀត ដែលល្បីល្បាញនិងទទួលស្គាល់ជាអន្តរជាតិ ឧទាហរណ៍ដូចជាករណីតាមចាប់ខ្លួនរបស់អូសាម៉ាប៊ីនឡាដិន (Osama Bin Laden) ជាដើម។ ដំណើរការនេះគឺត្រូវប្រើពេលវេលាយ៉ាងយូរនិងលំបាកណាស់ ស្ទើរតែប្រើពេលអស់មួយទសវត្សរ៍។ នៅទីបញ្ចប់ គឺវាទទួលបានផ្លែផ្កានិងប្រកបដោយប្រសិទ្ធភាព។ រឿងនេះគឺដូចគ្នាដែរ។ យើងបានធ្វើកិច្ចការយ៉ាងលំបាក យើងបានធ្វើការជាប្រព័ន្ធ។ ចុងក្រោយយើងបានទទួល ជោគជ័យ»។
រដ្ឋអាជ្ញានៃតុលាការទីក្រុងឡាអេបានចោទលោកហ្គោរ៉ាន ហាដជីតឆ៍ ពីបទសម្លាប់បំបាត់ពូជសាសន៍ ការសម្លាប់ ការធ្វើទុកបុកម្និញ និងការនិរទេសប្រជាពលរដ្ឋមិនមែនជាជនជាតិស៊ែបរាប់ម៉ឺននាក់ ពេលគាត់ធ្វើជាអ្នកដឹកនាំស៊ែបនៅបូស្នី (Bosnian Serbs) ស្វែងរកការផ្តាច់ខ្លួនចេញពីប្រទេស ក្រូអាស៊ី (Croatia) នៅក្នុងរវាងឆ្នាំ១៩៩១ដល់១៩៩២។
ពួកគេបានបង្កើតសាធារណរដ្ឋស៊ែបរបស់ពួកគេរៀងៗខ្លួន រួមទាំងតំបន់មួយក្នុងសាធារណរដ្ឋក្រជិនណា (Krajina) ដែលលោក Hadzic ជាប្រធានាធិបតី។ លោកក៏ត្រូវបានចោទពីបទមានជាប់ពាក់ព័ន្ធនឹងការសម្លាប់រង្គាលនៅតំបន់ Vukovar នៅឆ្នាំ១៩៩១ នៅពេលដែលប្រជាពលរដ្ឋប្រហែល២៥០នាក់ត្រូវបានយកចេញពីមន្ទីរពេទ្យនៅទីក្រុងក្រូអាស៊ីដែលត្រូវបានឡោមព័ទ្ធយ៉ាងខ្លាំងមួយនេះ និងត្រូវសម្លាប់ ដែលជាការសម្លាប់រង្គាលមុនគេមួយក្នុងសង្រ្គាម។
លោក Goran Hadzic គឺជាជនជាប់ចោទរត់ពីច្បាប់ចុងក្រោយដែលតុលាការឧក្រិដ្ឋកម្មសង្រ្គាមទីក្រុងឡាអេចង់បាន។
ខណៈដែលតុលាការថ្នាក់តំបន់និងថ្នាក់ជាតិកំពុងតែបន្តសំណុំរឿងបទឧក្រិដ្ឋកម្មសង្រ្គាមកម្រិតស្រាលនានាដែលជាប់ពាក់ព័ន្ធនឹងអំពើហិង្សាដែលកើតឡើងក្នុងពេលបែកបាក់ប្រទេសអតីតយូហ្គោស្លាវី អ្នកដែលគេជឿថាជាអ្នកទទួលខុសត្រូវខ្ពស់បំផុតទាំងឡាយ ឥឡូវនេះកំពុងឋិតនៅក្នុងមន្ទីរឃុំឃាំងនៃតុលាការនេះ។
ក្នុងចំណោមនោះរួមមានមេបញ្ជាការស៊ែបបូស្នី លោក Ratko Mladic ដែលត្រូវបានចាប់ខ្លួនពីបទប្រល័យពូជសាសន៍នៅខែឧសភា។ ការចាប់ខ្លួនទាំងនេះត្រូវបានឃើញថាមានសារសំខាន់ចំពោះការសុំចូលរបស់ស៊ែរប៊ីក្នុងសហគមន៍អឺរ៉ុប។
ប្រធានាធិបតី Tadic និយាយថា ការចាប់ខ្លួន លោក Gordan Hadzic គឺជាក្រមសីលធម៌របស់ប្រទេសស៊ែរប៊ី និងជាការទទួលខុសត្រូវតាមផ្លូវចាប់ ហើយវាមិនមែនជាលទ្ធផលនៃការដាក់សម្ពាធរបស់សហគមន៍អឺរ៉ុបនោះទេ។ យ៉ាងណាក៏ដោយ ការបញ្ជូនលោក Hadzic ទៅតុលាការអន្តរជាតិឡាអេនៅប៉ុន្មានថ្ងៃខាងមុខនេះ គឺដកចេញនូវរបាំងចុងក្រោយពីផ្លូវដ៏វែងឆ្ងាយរបស់ប្រទេសស៊ែរប៊ីចូលទៅក្នុងសហគមន៍អឺរ៉ុប។
ប្រែសម្រួលដោយ ហ៊ុយ សម្ផស្ស
