ឧបទ្ទវហេតុមួយនៅឯសណ្ឋាគារដ៏ទំនើប នៅប្រទេសកូរ៉េខាងត្បូង បានធ្វើឲ្យមើលឃើញជាសាធារណៈដ៏កម្រ ស្តីពីពិភពចារកម្មអន្តរជាតិ។ កាលពីខែកុម្ភៈ តាមការចោទប្រកាន់ ថាមានទីភ្នាក់ងារសេវាកម្មស៊ើបការណ៍សម្ងាត់ជាតិ (National Intelligence Service) ឬហៅកាត់ថា NIS របស់ប្រទេសនេះ បានទម្លាយទ្វារចូលក្នុងបន្ទប់សណ្ឋាគារមួយ របស់សមាជិកម្នាក់នៃគណៈប្រតិភូមួយក្រុម ដែលតំណាងឲ្យលោកប្រធានាធិបតីឥណ្ឌូនេស៊ី។
អាជ្ញាធរកូរ៉េខាងត្បូង នៅតែស្ងាត់ស្ងៀម អស់រយៈពេលពីរខែកន្លះ បន្ទាប់ពីការទម្លាយទ្វារដ៏អាថ៍កំបាំង ចូលទៅក្នុងបន្ទប់លេខ ១៩៦១ នៃសណ្ឋាគារឡូតេ (Lotte Hotel) នៅទីក្រុងសេអ៊ូល។
ប្រព័ន្ធផ្សព្វផ្សាយក្នុងស្រុក និយាយថា ភ្នាក់ងារបីនាក់នៃសេវាកម្មស៊ើបការណ៍សម្ងាត់ ត្រូវបានប្រទះឃើញនៅក្នុងសណ្ឋាគារលំដាប់ផ្កាយប្រាំ នៃទីប្រជុំជនមួយ ដោយបានរុះរើម៉ាស៊ីនកុំព្យូទ័រយួរដៃ របស់គណៈប្រតិភូឥណ្ឌូនេស៊ី ដែលកំពុងធ្វើទស្សនកិច្ច។ អ្នកទាំងបីនេះ ដែលតាមសេចក្តីរាយការណ៍ថា មានបុរសពីរនាក់ និងស្រ្តីម្នាក់ផង បានគេចខ្លួនចេញបាត់។
នៅចំពេលដែលមានការគាស់ទ្វារចូល កាលពីថ្ងៃទី១៦ ខែកុម្ភៈ គណៈប្រតិភូមួយក្រុម ដឹកនាំដោយរដ្ឋមន្ត្រីសេដ្ឋកិច្ចរបស់ឥណ្ឌូនេស៊ី ស្ថិតនៅឯកិច្ចប្រជុំជាមួយលោកប្រធានាធិបតីកូរ៉េខាងត្បូង លី យ៉ុងបាក់ (Lee Myung-bak)។
ប្រទេសទាំងពីរ បានកំពុងចរចាទៅលើកិច្ចព្រមព្រៀងមួយ ទាក់ទងនឹងការនាំចេញបច្ចេកវិទ្យាការពារជាតិ ទៅប្រទេសឥណ្ឌូនេស៊ី ដោយរាប់បញ្ចូលទាំង យន្តហោះប្រតិកម្មល្បឿនលឿនជាងសម្លេងសម្រាប់យកមកហាត់ហ្វឹកហ្វឺន។
លោក ជុង យ៉ុងស៊ុក (Jung Yong-suk) សាស្ត្រាចារ្យចូលនិវត្តន៍ផ្នែកខាងវិទ្យាសាស្ត្រនយោបាយនៃសាកលវិទ្យាល័យដានឃុក (Dankook University) ថ្លែងថា លោក គ្មាន «ការមន្ទិលសង្ស័យ» អំពីថាតើនរណាទទួលខុសត្រូវចំពោះការទម្លាយទ្វារចូលនោះទេ។
លោក ជុង និយាយថា វាច្បាស់ជាធ្វើឡើងដោយ ទីភ្នាក់ងារចារកម្មរបស់កូរ៉េខាងត្បូង។ លោក បានបន្តថា ការទម្លាយទ្វារចូលនោះ គួរត្រូវបានចាត់ទុកថាជា សកម្មភាពចារកម្មផ្នែកឧស្សាហកម្ម ជាជាងចារកម្មខាងនយោបាយ។
លោក ជុង ពន្យល់ទៀតថា រឿងនេះ គឺជាអ្វី ដែលរដ្ឋាភិបាលកូរ៉េខាងត្បូង បានផ្តោតការយកចិត្តទុកដាក់យ៉ាងខ្លាំងក្លាអស់រយៈពេលជាច្រើនឆ្នាំមកហើយ ដោយសារតែប្រទេសនេះ ពឹងផ្អែកទាំងស្រុង ទៅលើការនាំចេញ។ សាស្ត្រាចារ្យរូបនេះ មានប្រសាសន៍ថា កូរ៉េខាងត្បូង ប្រឈមមុខនឹងការប្រកួតប្រជែងខ្លាំង ក្នុងចំណោមប្រទេសដែលពឹងផ្អែកលើការនាំចេញ ហើយ ត្រូវនាំមុខគេក្នុងកិច្ចការនោះ ដូច្នោះហើយចារកម្មផ្នែកឧស្សាហកម្ម មានសារៈសំខាន់ និងត្រូវបានលើកទឹកចិត្ត។ លោក បានបញ្ជាក់ថា ទីភ្នាក់ងារស៊ើបការណ៍សម្ងាត់ ធ្វើអ្វីគ្រប់យ៉ាង ដែលខ្លួនអាចធ្វើបាន ប៉ុន្តែជាអកុសល ត្រូវបានចាប់ជាប់ក្នុងទង្វើបែបនោះ។
នៅក្នុងការឆ្លើយតបទៅនឹងសំណួររបស់វីអូអេ និងបណ្តាញផ្សព្វផ្សាយព័ត៌មានដទៃទៀត ក្រុមមន្ត្រីនៃសេវាកម្មស៊ើបការណ៍សម្ងាត់ជាតិ បានបដិសេធជារឿយៗថា ភ្នាក់ងាររបស់ខ្លួន មិនបានទទួលខុសត្រូវចំពោះការគាស់ទ្វារចូលដ៏ខ្ជីខ្ជានោះទេ ប៉ុន្តែនិយាយថា សេវាកម្មស៊ើបការណ៍សម្ងាត់ជាតិ នឹងមិនចេញបទអត្ថាធិប្បាយជាផ្លូវការណាមួយឡើយ។
សមាជិកម្នាក់នៃសហគមន៍ស៊ើបការណ៍សម្ងាត់របស់កូរ៉េខាងត្បូង បានប្រាប់វីអូអេដោយសុំមិនឲ្យបញ្ចេញឈ្មោះថា ឧបទ្ទវហេតុនោះ ជំរុញឲ្យសហការីរបស់លោក ចោទសួរស្តីពីជំនាញអាជីពរបស់សមាជិកក្នុងក្រុមមួយចំនួន។
លោក ចូ យុនអូ (Cho Hyun-oh) ស្នងការប៉ូលីសជាតិ បានប្រាប់ក្រុមអ្នកយកព័ត៌មានថា ការដាក់ទោសទៅលើអ្នកទទួលខុសត្រូវ នឹងមិនមានប្រយោជន៍ទេ ប្រសិនបើការដាក់ទោសនោះស្តែងឲ្យឃើញថា ពួកគេ ជាភ្នាក់ងារស៊ើបការណ៍សម្ងាត់របស់កូរ៉េខាងត្បូង។ លោក បានសំអាងហេតុផលទៅលើ «ផលប្រយោជន៍ជាតិ»។
អតីតមន្ត្រីស៊ើបការណ៍សម្ងាត់របស់សហរដ្ឋអាមេរិក និងអ្នកការទូតចូលនិវត្តន៍ ដែលអ្នកទាំងពីរ បានធ្វើការនៅក្នុងតំបន់ ប៉ុន្តែមិនចង់ឲ្យមានការបញ្ជាក់ពីអត្តសញ្ញាណបន្ថែមពីនេះទេ បានពិពណ៌នាឧបទ្ទវហេតុនេះ ថាជារឿងអាម៉ាស់យ៉ាងធំធេងសម្រាប់កូរ៉េខាងត្បូង។ ពួកគេនិយាយថា ប្រតិបត្តិការ «ស្បោងខ្មៅ» ឬហៅជាភាសាអង់គ្លេសថា « black bag» ត្រូវបានធ្វើឡើងគ្រប់ពេល ប៉ុន្តែថា ប្រតិបត្តិការនោះ កម្រត្រូវបានចាប់ជាប់ណាស់ ដោយសារតែការតាមឃ្លាំមើលយ៉ាងហ្មត់ចត់ ទៅលើទីតាំង ដែលបានកំណត់មុខសញ្ញារួចហើយ។ ក្រុមមន្ត្រី សម្តែងការភ្ញាក់ផ្អើល ដែលថា ឧបទ្ទវហេតុនេះ បានខូចការណ៍ ហើយលេចឮជាសាធារណៈទៀត ។
លោក ភីតធឺ អើនណេស (Peter Earnest) នាយកប្រតិបត្តិនៃសារៈមន្ទីរចារកម្មអន្តរជាតិ នៅទីក្រុងវ៉ាស៊ីនតោន និងជាមន្ត្រីជើងចាស់នៃប្រតិបត្តិការរបស់ទីភ្នាក់ងារស៊ើបការណ៍សម្ងាត់កណ្តាល ឬហៅកាត់ថា CIA បានពន្យល់ថា ប្រតិបត្តិការសម្ងាត់បែបនេះ កាន់តែក្លាយជារឿងទូទៅហើយ។
«ដោយសារកត្តាសកលភាវូបនីយកម្ម និងការប្រកួតប្រជែងគ្នាជាសកល យើងនឹងកាន់តែឃើញរឿងនេះកើតមានកាន់តែច្រើនឡើង។ រដ្ឋាភិបាលផ្សេងៗមួយចំនួន បានត្រៀមប្រើប្រាស់ក្បាលម៉ាស៊ីនស៊ើបការណ៍សម្ងាត់រដ្ឋាភិបាលរបស់ខ្លួន ដើម្បីគាំទ្រដល់ឧស្សាហកម្មនាំមុខគេរបស់ខ្លួន»។
ទីភ្នាក់ងារចារកម្មរបស់កូរ៉េខាងត្បូង បានប្រឈមមុខទៅនឹងការរិះគន់ពីប្រព័ន្ធផ្សព្វផ្សាយនានានៅទីនេះជាបន្តបន្ទាប់ ដែលមិនមែនទៅលើអ្វីដែលទីភ្នាក់ងារនេះបានព្យាយាមធ្វើ នៅឯសណ្ឋាគារឡូតេទេ ប៉ុន្តែផ្ទុយទៅវិញ គឺទៅលើការណ៍ដែលត្រូវបានចាប់ជាប់។
កាសែតលេចធ្លោមួយចំនួន ព្រមទាំងអ្នកនយោបាយ មកពីគ្រប់និន្នាការនយោបាយទាំងអស់ អំពាវនាវសុំឲ្យលោក វ៉ុន សេហ៊ូន (Won Sei-hoon) ប្រធានសេវាកម្មស៊ើបការណ៍សម្ងាត់ជាតិរបស់កូរ៉េខាងត្បូងលាលែងពីតំណែង។
កាលពីខែមុន លោកប្រធានាធិបតី លី បានផ្លាស់ប្តូរមុខតំណែងនាយករងចំនួនពីរ ក្នុងចំណោមមុខតំណែងនាយករងចំនួនបី៕
ប្រែសម្រួលដោយ លី សុខឃាង
