ភ្ជាប់​ទៅ​គេហទំព័រ​ទាក់ទង

ស.រ.អ.​ពិនិត្យ​មើល​ជំនួយ​ទៅ​ឲ្យ​ជន​រង​គ្រោះ​នៅ​អាហ្វ្រីក​ខាង​កើត​


កុមារ​ខ្វះ​អាហារូបត្ថម្ភ​ មក​ពី​ប្រទេស​សូម៉ាលី​ខាង​ត្បូង​ សំរាក​នៅ​លើ​គ្រែ នៅ​មន្ទីរ​ពេទ្យ​បាន់ដារ​ នៅ​ទីក្រុង​ ម៉ូហ្កាឌីស៊ូ (Mogadishu) ប្រទេស​សូម៉ាលី​ នៅ​ថ្ងៃ​ទី​ ១​ខែ​សីហា​ ឆ្នាំ​២០១១។​

អនុ​គណកម្មាធិការ​មួយ​ទទួល​បន្ទុក​ខាង​ការ​ទាក់​ទង​បរទេស​របស់​ព្រឹទ្ធសភា​សហរដ្ឋ​អាមេរិក​បាន​ធ្វើ​សវនាការ​មួយ​ កាល​ពី​ថ្ងៃ​ពុធ​ ដើម្បី​ពិនិត្យ​មើល​មធ្យោបាយ​ឆ្លើយ​តប​ទៅ​និង​ភាព​រាំង​ស្ងួត​និង​ទុរ្ភិក្សដ៏​អាក្រក់​បំផុត​នៅ​ទ្វីប​អាហ្វ្រីក​ខាងកើត​ហៅ​ Horn of Africa​ ក្នុង​ពេល​ ៦០​ ឆ្នាំ​កន្លង​ទៅ​នេះ។​ អ្នក​ជំនាញ​ការ​និង​អ្នក​តែង​ច្បាប់​បាន​សំដែង​ស្វាគមន៍​ចំពោះ​សេចក្តី​ប្រកាស​មួយ​របស់​ក្រសួង​ការ​បរទេស​ដែល​ថា​ សហរដ្ឋ​អាមេរិក​នឹង​បន្ធូរ​ទណ្ឌកម្ម​ហិរញ្ញវត្ថុ​ប្រឆាំង​ភេរវកម្ម​ ទល់​និង​ក្រុម​ភេរវករ​ អាល់-ស្ហាបាប់ (al-Shabaab)​ ដែល​មាន​មូលដ្ឋាន​នៅ​ប្រទេស​ សូម៉ាលី​ (Somalia)​ ដើម្បី​ដំឡើង​លំហូរ​នៃ​ជំនួយ​មនុស្សធម៌​ទៅ​កាន់​តំបន់​នោះ។

ប្រទេស​ សូម៉ាលី​ ស្ថិត​នៅ​ចំណុច​កណ្តាល​នៃ​វិបត្តិ​រាំង​ស្ងួត​និង​ទុរ្ភិក្ស។​ អង្គការ​សហប្រជាជាតិ​និយាយថា​មនុស្ស​ជាង​ ១២​ លាន​នាក់​នៅ​ក្នុង​ទ្វីប​អាហ្វ្រីក​ខាង​កើត​ ហៅ​ Horn​ of​ Africa​ កំពុង​ត្រូវ​ការ​ជំនួយ​ម្ហូប​អាហារ​យ៉ាង​ខ្លាំង។​ ហើយ​អង្គការ​សហប្រជាជាតិ​បាន​ប្រកាស​ទុរ្ភិក្ស​នៅ​ក្នុង​កន្លែង​ថ្មី​បី​នៃ​ប្រទេស​ សូម៉ាលី។

ក្រុម​អ្នក​ជំនាញ​ការ​ដែល​បាន​ឆ្លើយ​សំនួរ​នៅ​ក្នុង​សវនាការ​របស់​អនុ​គណកម្មាធិការ​ទទួល​បន្ទុក​ខាង​កិច្ច​ការ​អាហ្វ្រីក​និយាយ​ថា​ គេ​ពិបាក​ស្ទង់​ទំហំ​នៃ​វិបត្តិ​នេះ​ ដែល​កំពុង​រីក​ទៅ​ពាស​ពេញ​ទ្វីប​អាហ្វ្រីក​ខាង​កើត​ទាំង​មូល។

អ្នក​ស្រី​ នែនស៊ី​ លិនប៊ក​ (Nancy Lindborg)​ ជា​មន្រ្តី​នៃ​ទី​ភ្នាក់ងារ​សហរដ្ឋ​អាមេរិក​សម្រាប់​ការ​អភិវឌ្ឍ​អន្តរជាតិ​ (U.S.​ Agency​ for​ International​ Development)។

«យើង​កាក់​ស្មាន​ថា​ ក្នុង​ពេល​ ៩០​ថ្ងៃ​កន្លង​ទៅ​នេះ​ កុមារ​ជាតិ​សូម៉ាលី​ចំនួន​ ២​ម៉ឺន​ ៩​ពាន់​នាក់ បាន​ស្លាប់​ គឺ​ជិត​បួន​ភាគ​រយ​នៃ​ចំនួន​កុមារ​នៅ​ក្នុង​អាហ្វ្រីក​ភាគ​ខាង​ត្បូង»។

មេ​ដឹក​នាំ​អង្គការ​សង្គ្រោះ​ដែល​ឆ្លើយ​សំណួរ​នៅ​ក្នុង​សវនាការ​នេះ​ និយាយ​ថា​ គេ​ត្រូវ​ការ​ប្រាក់​សម្រាប់​ជំនួយ​ម្ហូបអាហារ​យ៉ាង​ច្រើន​ពី​មនុស្ស​ឯកជន​និង​ពី​រដ្ឋាភិបាល។​ អ្នក​ទាំង​នេះ​បាន​អំពាវនាវ​ឲ្យ​លោក​ប្រធានាធិបតី​ បារ៉ាក់​ អូបាម៉ា​ (Barack​ Obama)​ និង​លោក​ជំទាវ​ មីស្ហ៊ែល​ អូបាម៉ា​ (Michelle​ Obama)​ ជួយ​លើក​ទឹក​ចិត្ត​ឲ្យ​មនុស្ស​ផ្តល់​ជំនួយ​ទៅ​ឲ្យ​អ្នក​ដែល​កំពុង​មាន​សេចក្តី​ត្រួវ​ការ​ ​(ម្ហូប​អាហារ)​នៅ​ក្នុង​ប្រទេស​សូម៉ាលិ​ និង​តំបន់​ដទៃ​ទៀត​នៅ​ក្នុង​ទ្វីប​អាហ្វ្រីក​ខាង​កើត។

ឧបសគ្គ​ធំ​បំផុត​មួយ​នៅ​ក្នុង​ការ​ផ្តល់​ជំនួយ​ទៅ​ឲ្យ​ប្រទេស​សូម៉ាលី​គឺ​អំពើ​ហិង្សា​របស់​ក្រុម​សកម្ម​ប្រយុទ្ធ អាល់-ស្ហាបាប់​ ដែល​មាន​ទំនាក់​ទំនង​ជា​មួយ​ពួក​ អាល់-ខៃដា។​ ក្រុម​នេះ​ជា​អ្នក​សម្រេច​ថា​តើ​អង្គការ​ជំនួយ​ណា​ដែល​អាច​ចូល​ទៅ​បាន​ ហើយ​ទារ​យក​កម្រៃ​ពី​អង្គការ​សង្គ្រោះ​ដែល​ចង់​នាំ​យក​ម្ហូប​និង​ទឹក​ទៅ​ចែកចាយ​ឲ្យ​មនុស្ស​ដែល​ត្រូវ​ការ​ជំនួយ។​ ចំនួន​ ៦០​ភាគរយ​នៃ​ជន​ដែល​ត្រូវ​ការ​ជំនួយ​ក្នុង​ប្រទេស​សូម៉ាលី​ ស្ថិត​នៅ​ក្នុង​តំបន់​ដែល​ពូក​ អាល់-ស្ហាបាប់​ កំពុង​ត្រួត​ត្រា។

វិបត្តិ​នេះ​បាន​បង្ខំ​ឲ្យ​ប្រជារាស្រ្ត​សូម៉ាលី​ជា​ច្រើន​នាក់​ភៀស​ខ្លួន​ទៅ​ប្រទេស​ជិត​ខាង​ដូច​ជា​ កេនយ៉ា (Kenya)​ និង​ អេត្យូពី​ (Ethiopia) ​ជា​ដើម​ ឬ​ទៅ​កាន់​តំបន់​នៃ​ប្រទេស​សូម៉ាលី​ដែល​រដ្ឋាភិបាល​ត្រួត​ត្រា នៅ​កន្លែង​ដែល​ពួក​គេ​អាច​ទទួល​ជំនួយ​ម្ហូប​អាហារ​បាន។​ ក៏​ប៉ុន្តែ​មន្រ្តី​ជាន់​ខ្ពស់​សហរដ្ឋ​អាមេរិក​ និង​ក្រុម​អ្នក​ជំនាញ​ការ​ឯកជន​បាន​ថ្លែង​ជំរាប​អនុ​គណកម្មាធិការ​ព្រឹទ្ធសភា​ថា​ ក្រុម​ អាល់-ស្ហាបាប់​ កំពុង​តែ​ឃាត់​ទុក​ប្រជារាស្រ្ត​ប្រឆាំង​និង​ឆន្ទៈ​របស់​ពួក​គេ​ ដើម្បី​រារាំង​មិន​ឲ្យ​ជន​ទាំង​នោះ​អាច​គេច​ចេញ​ទៅ​កាន់​តំបន់​ដែល​ពួក​គេ​អាច​ទទួល​ម្ហូប​អាហារ​បាន៕

ប្រែ​សម្រួល​ដោយ​ កែរ យ៉ាន

XS
SM
MD
LG