ប្រធានគណៈកម្មាធិការស៊ើបការណ៍សម្ងាត់មកពីគណបក្សប្រជាធិបតេយ្យរបស់សភាតំណាងរាស្ត្រសហរដ្ឋអាមេរិក និយាយថា ខ្លួនបានឈានដល់កិច្ចព្រមព្រៀងដើម្បីស្តាប់ការផ្តល់សក្ខីកម្មពីអ្នកបញ្ចេញព័ត៌មានសម្ងាត់ដែលការប្តឹងរបស់គេ បានបណ្តាលឲ្យមានការស៊ើបអង្កេតប្តឹងទម្លាក់តំណែងលោកប្រធានាធិបតីត្រាំ។
លោក Adam Schiff ប្រាប់បណ្តាញទូរទស្សន៍ ABC ក្នុងកម្មវិធី «This Week» ថា «យើងកំពុងចាត់វិធានការទាំងអស់ដែលយើងអាចធ្វើបាន ដើម្បីអនុញ្ញាតឲ្យការផ្តល់សក្ខីកម្មនេះដំណើរការទៅ មុខ ដោយការពារអត្តសញ្ញាណរបស់អ្នកបញ្ចេញព័ត៌មានសម្ងាត់។ ដោយប្រធានាធិបតីបញ្ចេញការគំរាមកំហែង យើងអាចស្រមៃអំពីការព្រួយបារម្ភខាងសន្តិសុខ»។
អ្នកបញ្ចេញព័ត៌មានសម្ងាត់ ចោទប្រកាន់ថា លោកប្រធានាធិបតីត្រាំ បាននិយាយទូរស័ព្ទនៅថ្ងៃទី២៥ ខែកក្កដា ស្វះស្វែងរកការជួយពីប្រធានាធិបតីថ្មីអ៊ុយក្រែននៅក្នុងការជីកកកាយរកព័ត៌មានអំពីលោក Joe Biden អនុប្រធានាធិបតី និងលោក Hunter ដែលជាកូនប្រុសរបស់លោក។ ព័ត៌មាននេះនឹងប៉ះពាល់ដល់ជោគជ័យរបស់លោក Biden ដើម្បីទទួលបានការតែងតាំងជាបេក្ខជនប្រធានាធិបតីខាងគណបក្សប្រជាធិបតេយ្យ ហើយនិងប្រកួតប្រជែងជាមួយលោកត្រាំនៅក្នុងការបោះឆ្នោតប្រធានាធិបតីអាមេរិកនៅឆ្នាំ២០២០។
លោកប្រធានាធិបតីដូណាល់ ត្រាំ ដែលបានបញ្ចេញការសន្ទនាតាមទូរស័ព្ទ បានទទូចថា លោកមិនបានធ្វើអ្វីខុសទេហើយបានបន្តការពារខ្លួនតាមរយៈ Twitter។
នៅពេលដែលធ្វើជាអនុប្រធានាធិបតី លោក Bidenនិងមេដឹកនាំប្រទេសលោកខាងលិចផ្សេងទៀត បានគាបសង្កត់ប្រទេសអ៊ុយក្រែនឲ្យដកលោក Viktor Shokin ដែលជារដ្ឋអាជ្ញាកំពូលរបស់អ៊ុយក្រែនចេញពីតំណែង ពីព្រោះតែលោកត្រូវបានគេមើលឃើញថា មិនបានចាត់វិធានការឲ្យគ្រប់គ្រាន់ដើម្បីបំបាត់អំពើពុករលួយទេ។
ប្រធានាធិបតីត្រាំ បានអះអាងថា លោក Biden បានស្វះស្វែងការពារកូនប្រុសរបស់លោក ក៏ប៉ុន្តែ ការចោទប្រកាន់នេះ បានត្រូវគេបង្ហាញថា ខុស៕
