ការចាប់ខ្លួនក្រុមមន្ត្រីគណបក្សជំទាស់ និង សកម្មជននយោបាយកើតឡើងបន្តបន្ទាប់ក្នុងពេលមានបញ្ហាការរាតត្បាតជំងឺកូវីដ១៩ និងក្នុងពេលកម្ពុជាត្រូវសហភាពអឺរ៉ុបប្រកាសព្យួរប្រព័ន្ធអនុគ្រោះពន្ធចំពោះទំនិញនាំចេញ ដោយសារតែបញ្ហាការចោទប្រកាន់រឿងធ្លាក់ចុះប្រជាធិប តេយ្យនិងសិទ្ធិមនុស្ស តែក្រុមមេដឹកនាំនយោបាយកំពូលនៃប្រទេសកម្ពុជាបានបន្តវាយប្រហារគ្នា និងប្រជែងយកប្រៀបរៀងខ្លួន។
លោក សម រង្ស៉ី ដែលជាមេដឹកនាំក្រុមជំទាស់កំពុងនិរទេសខ្លួននៅក្រៅប្រទេស បានបន្តរិះគន់លោកនាយករដ្ឋមន្ត្រីហ៊ុន សែនថាបន្តចាប់ខ្លួនសកម្មជនគណបក្សជំទាស់ក្នុងប្រទេស ដោយភ័យខ្លាចនឹងការងើបតវ៉ាប្រឆាំងនឹងរដ្ឋាភិបាលគណបក្សគ្រប់គ្រងប្រទេស។
ថ្លែងប្រាប់ VOA ក្នុងកិច្ចសម្ភាសន៍តាមទូរស័ព្ទពីប្រទេសបារាំងក្រោយពេលលោកបានដាក់លិខិតទៅកាន់ស្ថាប័នសិទ្ធិមនុស្ស អំពីការចាប់ខ្លួនសកម្មជនលោកថ្មីៗនេះ លោក សម រង្ស៉ី បានអះអាងថានោះគឺជាការភ័យខ្លាចរបស់លោកនាយករដ្ឋមន្ត្រីហ៊ុន សែន៖
«ចំពោះគាត់ប្រជាពលរដ្ឋដែលបាត់បង់ប្រាក់ចំណូល លុយធនាគារ លុយអង្គការវ័ណ្ឌក ដូច្នេះប្រជារាស្ត្រមានបំណងតតាំងងើបឈរប្រឆាំងរូបគាត់ អីចឹងហើយគាត់ភ័យ គាត់មិនដឹងធ្វើអ្វីគាត់រករឿងសមាជិកគណបក្សសង្គ្រោះជាតិ តែរឿងនេះជារឿងប្រជារាស្ត្រខ្មែរទាំងមូលមិនមែនរឿងគណបក្សសង្គ្រោះជាតិទេ»។
លោក សម រង្ស៉ីបន្តថារដ្ឋាភិបាលមិនបានដោះស្រាយជូនប្រជាពលរដ្ឋទេក្នុងពេលមានបញ្ហាកូវីដ១៩ ដែលធ្វើឲ្យពលរដ្ឋជួបបញ្ហាជីវភាព ហើយមិនអាចសន្សំប្រាក់សងបំណុលធនាគារនេះ។
«លោកហ៊ុន សែនរបបគាត់ហ្នឹងកាន់តែធ្ងន់ធ្ងរហើយ គាត់ធ្វើបាបប្រជាពលរដ្ឋកាន់តែខ្លាំង នយោបាយសេដ្ឋកិច្ចគាត់កាន់តែបរាជ័យ គាត់នៅតែបណ្តោយឲ្យធនាគារ ឲ្យស្ថាប័នមីក្រូហិរញ្ញវត្ថុអីទាំងអស់ហ្នឹងមកកៀបសង្កត់ប្រជារាស្ត្រគឺរបបគាត់មិនអាចនៅស្ថិតស្ថេរបានទេពីព្រោះគាត់ធ្វើសង្គ្រាមប្រឆាំងនឹងប្រជារាស្ត្រខ្មែរទាំងមូល ដូច្នេះគាត់មិនអាចនៅដល់ការបោះឆ្នោតអី ២០២២ និង ២០២៣ ទេ គាត់ធ្វើអាក្រក់អីចឹង គឺរបបគាត់ដួលកាន់តែឆាប់»។
ក្រុមសកម្មជនគណបក្សជំទាស់មួយចំនួនចុងក្រោយនេះរួមទាំងលោក ស៊ុន ធន់ ជាអតីតសមាជិកក្រុមប្រឹក្សាខេត្តកំពង់ធំគណបក្សជំទាស់និងជាសមាជិកសមាគមគ្រួបង្រៀនឯករាជ្យត្រូវចាប់ខ្លួនមិនដឹងមូលហេតុក្នុងសប្តាហ៍ថ្មីៗនេះ។ក្រុមមន្ត្រីគណបក្សសង្គ្រោះជាតិដែលត្រូវរំលាយរាប់សិបនាក់ត្រូវចាប់ខ្លួនដោយសារតែមានការចោទប្រកាន់ថាផ្សព្វផ្សាយព័ត៌មានមិនពិត និង ប្រឆាំងរដ្ឋាភិបាល។
លោកសំ សុគង់មេធាវីការពារក្តីឲ្យមន្រ្តីគណបក្សប្រឆាំងដែលត្រូវបានចាប់ខ្លួនជាបន្តបន្ទាប់អះអាងថា ចាប់តាំងពីការរំលាយគណបក្សសង្រ្គោះជាតិ លោកបានការពារក្តីឲ្យមន្រ្តីគណបក្សប្រមាណ១០០នាក់ដែលក្នុងនោះមានការចាប់ខ្លួនដោយមានដីកាខ្លះនិងមិនមានដីកាខ្លះ។លោកបន្តថា បច្ចុប្បន្ននេះលោកកំពុងការពារក្តីឲ្យសកម្មជនគណបក្សសង្រ្គោះជាតិចំនួនយ៉ាងតិច១៦នាក់ទៀតដែលកំពុងជាប់ពន្ធនាគារហើយពួកគេត្រូវបានចោទប្រកាន់ថា រួមគំនិតក្បត់ញុះញង់ឲ្យប្រព្រឹត្តបទឧក្រិដ្ឋជាអាទិ៍និងញុះញង់មិនឲ្យយោធាស្តាប់បង្គាប់៕
លោក សម រង្ស៉ីដែលបានដាក់លិខិតទៅកាន់ស្ថាប័នសិទ្ធិមនុស្សអន្តរជាតិ អសប និង សហភាពអឺរ៉ុបដើម្បីទាមទារឲ្យមានអន្តាគមន៍ពីសហគមន៍អន្តរជាតិចំពោះការចាប់ខ្លួនក្រុមសកម្មជនជំទាស់នេះ បានចាត់ទុកថាការចាប់ខ្លួននេះនឹងបន្ថែមទម្ងន់លើកំណត់ត្រាសិទ្ធិមនុស្សនិងប្រជាធិបតេយ្យ ដែលរដ្ឋាភិបាលលោកនាយករដ្ឋមន្ត្រីហ៊ុន សែនកំពុងតែប្រឈមស្រាប់។
«ហើយម្យ៉ាងទៀតគាត់យល់ច្រឡំហើយ គាត់ស្មានថាធ្វើអីចឹងគេមិនប្រតិកម្ម ឥឡូវហ្នឹងអន្តរជាតិប្រតិកម្មកាន់តែខ្លាំងឡើងៗពីព្រោះគាត់កំពុងតែប្រឈមមុខរឿងនាំទំនិញចេញទៅលក់នៅខាងក្រៅ EBA។ សមាគមរោងចក្រកាត់ដេរគឺទៅអង្វរសហភាពអឺរ៉ុបថាឲ្យពន្យាកុំឲ្យព្យួរប្រព័ន្ធអនុគ្រោះពន្ធ ប៉ុន្តែគាត់ធ្វើអីចឹងមិនខ្មាស់គេទេ អឺរ៉ុបគេចង់ឲ្យគាត់គោរពសិទ្ធិមនុស្ស គោរពប្រជាធិបតេយ្យ តែគាត់មកធ្វើគណបក្សប្រឆាំង ធ្វើបាបប្រជារាស្ត្រអីចឹង ហើយគាត់នឹងស្មានថាគេនឹងពន្យាទណ្ឌកម្មដែលគេដាក់មកលើរបបគាត់»។
ក្រុមមេដឹកនាំគណបក្សជំទាស់នៅក្រៅប្រទេសរួមទាំងលោក សម រង្ស៉ីផងត្រូវស្ថិតនៅក្រោមការចោទប្រកាន់ថាជាក្រុមឧទ្ទាមក្រៅច្បាប់ ដែលមន្ត្រីគណបក្សគ្រប់គ្រងប្រទេស បានវាយបកនិងអះអាងថានេះជាល្បែងរបស់មេដឹកនាំគណបក្សជំទាស់ដែលប៉ុនប៉ងផ្តួលរំលំរដ្ឋាភិបាលយូរឆ្នាំមកហើយ តែមិនបានជោគជ័យ ហើយដែលអាជ្ញាធររដ្ឋាភិបាលត្រូវចាត់វិធានការ។
លោក សុខ ឥសានអ្នកនាំពាក្យគណបក្សប្រជាជនកម្ពុជាបានថ្លែងថាជារឿងធម្មតានិងជាវប្បធម៌របស់ក្រុមឧទ្ទាមក្រៅច្បាប់ ដែលបរិហារមកលើរាជរដ្ឋាភិបាល យាយី ធ្វើទុក្ខបុក្ខម្នេញចូលមកក្នុងប្រទេស តែលោកថាគេពុំគួរគាំទ្រក្រុមឧទ្ទាមក្រៅច្បាប់ទេ ដែលលោកថាអង្គការចាត់តាំងមួយនេះត្រូវរំលាយចោលដោយតុលាការកំពូលរួចទៅហើយ។
«មេឧទ្ទាមក្រៅច្បាប់និងក្រុមឧទ្ទាមក្រៅច្បាប់សុទ្ធតែខុសច្បាប់ទាំងអស់រួមទាំងអ្នកគាំទ្រផង។ បើថាគាំទ្រនូវនយោបាយឬឧបាយកលរបស់អ្នកក្រៅច្បាប់ អ្នកហ្នឹងសុទ្ធតែខុសច្បាប់ទាំងអស់ អីចឹងការចាត់វិធានការរបស់រាជរដ្ឋាភិបាលគឺជាការត្រឹមត្រូវ មិនមែនជាការរំលោភសិទ្ធិមនុស្សដូចខ្ញុំជម្រាបខាងដើមអីចឹង»។
លោក សុខ ឥសានបានបន្ថែមថា៖
«យើងដឹងហើយថាបើសិនណាជារាជរាដ្ឋាភិបាលធ្វើឲ្យលទ្ធិប្រជាធិបតេយ្យដើរថយក្រោយឬមួយក៏មានការរំលោភសិទ្ធិមនុស្សធ្ងន់ធ្ងរនៅក្នុងប្រទេសកម្ពុជា ប្រាកដណាស់ប្រទេសកម្ពុជាមិនមានសន្តិភាពពេញលេញហើយមិនមានស្ថិរភាពនយោបាយព្រមទាំងប្រជាពលរដ្ឋរស់នៅប្រកប ដោយភាពសុខដុមរមនានៅក្នុងប្រទេសកម្ពុជាទាំងមូលទេ»។
លោកបានបន្ថែមថាការប៉ុនប៉ងរបស់ក្រុមប្រឆាំងបំផុសពលរដ្ឋដើម្បីផ្តួលរំលំរដ្ឋាភិបាលកើតឡើងជាច្រើនឆ្នាំមកហើយ។
«ហើយសួរថាវាបានប្រយោជន៍អីតាំងពី២០១៣ ហើយឥឡូវជិត១០ឆ្នាំទៅហើយ។ តែយើងឃើញហើយថាតើទណ្ឌិតសម រង្ស៉ីនិយាយវាមានប្រសិទ្ធភាពទេ គ្មានប្រជាជនណាយកត្រចៀកស្តាប់ទេបាទ។ នេះគ្រាន់តែល្បិចកល្បបោកប្រាស់យកចំណេញនយោបាយមួយពេលៗតែប៉ុណ្ណោះទេ តែដល់វាច្រើនឆ្នាំ ច្រើនដងដែលគេហៅថារាប់ដងទៅហើយប្រជាជនគេមើលឃើញ»។
កាលពីពេលថ្មីៗលោកនាយករដ្ឋមន្ត្រីហ៊ុន សែន បានព្រមានចាប់ខ្លួនក្រុមជំទាស់ ដែលមានការប៉ុនប៉ងផ្តួលរំលំរដ្ឋាភិបាលនិងធ្វើវិទ្ធង្សនាសេដ្ឋកិច្ច ដែលលោកចាត់ទុកថាជាអំពើភេរវកម្មហើយថែមទាំងបានព្រមានដល់អ្នកដែលចង់ឆ្លៀតឳកាសមានបញ្ហាកូវីដ១៩ដើម្បីផ្តួលរំលំរដ្ឋាភិបាលរបស់លោក។
«ហ្អែងចង់បង្កើតចលាចលដោយបំផុសមនុស្សមិនឲ្យសងលុយដល់ធនាគារ រួចហើយធ្វើឲ្យធនាគាររលំ រួចហើយហ្អែងទាញយកផលដើម្បីផ្តួលរំលំ អញមិនទុកឱកាសឲ្យហ្អែងទេ ហ្អែងត្រូវដឹង ហើយអញប្រាប់ហ្អែងឲ្យត្រង់ ប្រាប់ហ្អែងឲ្យច្បាស់រាប់ទាំងអាអ្នកធ្វើសកម្មភាពក្នុងស្រុក ហ្អែងធ្វើអញចាប់ហើយ វិទ្ធង្សនាសេដ្ឋកិច្ច ភេរវកម្ម។ វិទ្ធង្សនា ភេរវកម្មមិនសំដៅទៅលើការវាយប្រហារដោយគ្រាប់បែកគ្រាប់មីននោះទេ អ្នកឯងធ្វើវិទ្ធង្សនាសេដ្ឋកិច្ចបំផ្លាញជាតិយ៉ាងដូច្នេះគ្មានរឿងត្រូវទុកអ្នកឯងទេ រឿងសិទ្ធិមនុស្សទុកមួយឡែកសិន រឿងអីនិយាយដល់សិទ្ធិមនុស្ស សិទ្ធមិនឲ្យបំផ្លាញទេ ឥឡួវមើលនៅអាមេរិក»។
លោក ហ៊ុន សែន ដែលទំនងជានិយាយយោងទៅលើក្រុមជំទាស់នៅបរទេស រួមទាំងលោក សម រង្ស៉ី ដែលធ្លាប់បាននិយាយពីការដួលរលំរបស់ធនាគារនៅកម្ពុជានោះ បានបញ្ជាក់ពីការត្រៀមថវិកា៥០០រយលានដើម្បីជួយជាទុនបង្វិលនៃធនាគារនិងវិធានការសេដ្ឋកិច្ចផ្សេងៗទៀតមកបញ្ជាក់ឲ្យដឹងជាសាធារណ:ថ្មីៗនេះដែរ ក្រៅពីលើកយកស្ថានការណ៍បាតុកម្មនៅសហរដ្ឋអាមេរិកមកចំអកដល់អ្នកការពារសិទ្ធិមនុស្សអន្តរជាតិ ដែលរិះគន់កម្ពុជា។
«ពេលកម្ពុជាទប់បាតុកម្ម គេថាកម្ពុជារំលោភលើសិទ្ធិមនុស្សដល់ទៅប្រទេសដ៏ទៃទប់បាតុកម្ម គេថាវិធានការការពារសណ្តាប់ធ្នាប់សង្គម ខុសគ្នាខ្លាំងម្ល៉េះ រឿងហ្នឹងមិនខុសពីប្រទេសចិន lockdownបិទតំបន់វូហាន នៅក្នុងខេត្តហឺប៉ី គេថាបំពានសិទ្ធពលរដ្ឋ ដល់ទៅពេលប្រទេសលោកខាងលិចបិទប្រទេស បិទទីក្រុង គេថាវិធានការការពារកូវីដ អីចឹងម៉េចក៏ស្តង់ដាដល់ទៅ២ ដល់ទៅ៣យ៉ាងដូច្នេះ»។
លោក សុខ ឥសានវិញបានថ្លែងបន្ទដោយយោងទៅលើព្រឹត្តិការណ៍ថ្ងៃទី៩ ខែវិច្ឆិកាឆ្នាំ២០១៩ ដែលទាក់ទងនឹងផែនការវិលត្រឡប់មកកម្ពុជារបស់លោកសម រង្ស៉ី ត្រូវអាក់ខាន ដែលលោកអះអាងជាឯកតោភាគីថាមិនមានអ្នកគាំទ្រ ដោយបន្ថែមថាពេលនេះរដ្ឋាភិបាលមានការគាំទ្រពីមហាអំណាចអាមេរិក ចិន និងបណ្តាប្រទេសធំៗជាច្រើនទៀត ហើយក៏បន្តកិច្ចសហប្រតិបត្តិការល្អលើវិស័យជាច្រើនដូចជាការដោះមីនផងដែរ។
ទោះជាយ៉ាងណាក៏ដោយ មន្ត្រីសហភាពអឺរ៉ុបមួយចំនួននិងមន្ត្រីសិទ្ធិមនុស្សអ.ស.ប. មិនអាចទាក់ទងបានដើម្បីសេចក្តីអត្ថាធិប្បាយបានទេចំពោះការតវ៉ាថ្មីបន្ថែមរបស់លោក សម រង្ស៉ី។ មន្ត្រីសិទ្ធិមនុស្សនៅក្នុងទីក្រុងហ្សឺណែវមិនបានឆ្លើយតបនឹងសំណួររបស់VOAនិងឆ្លើយទូរស័ព្ទរបស់VOA នៅឡើយដែរ។
នៅក្នុងសារលិខិតរបស់លោក កាលពីថ្ងៃទី៧ខែមិថុនាទៅកាន់លោកស្រី រ៉ូណាស្មីត អ្នករាយការណ៍ពិសេសសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា លោក សម រង្ស៉ី បានរៀបរាប់ពីការធ្វើទុក្ខបុកម្នេញថ្មីៗលើសកម្មជនក្រុមជំទាស់ និង កំណើននៃក្តីបារម្ភចំពោះការបង្ក្រាបក្នុងប្រទេសកម្ពុជាថ្មីៗនេះ។សារលិខិតនេះត្រូវគេដឹងថាលោកសមរង្ស៉ីបានបញ្ជូនទៅកាន់ស្ថាប័នសហភាពអឺរ៉ុបផ្សេងទៀតផងដែរ។
«នៅពេលដែលចំណាប់អារម្មណ៍របស់ពិភពលោកនិងមេដឹកនាំជាតិនិងអន្តរជាតិផ្តោតទៅលើតែការជួយសង្គ្រោះជីវិតជនរងគ្រោះដោយសារជំងឺកូវីដ១៩ដ៏ធ្ងន់ធ្ងរនោះ ការរាតត្បាតជាសាកលត្រូវបានប្រើប្រាស់ទាំងបំពានដោយរបបគ្រប់គ្រងក្នុងប្រទេសកម្ពុជាដើម្បីបន្តរលកនៃការកៀបសង្កត់លើអ្នកដែលហ៊ានបញ្ចេញទស្សន:សេរី សេសសល់តិចតួច»។
លោក សម រង្ស៉ី បានទទូចឲ្យសហភាពអឺរ៉ុបនិងស្ថាប័នអន្តរជាតិបន្តជួយស្តារសិទ្ធិមនុស្សនិងលទ្ធិប្រជាធិបតេយ្យនៅកម្ពុជា។
ប្រទេសស៊ុយអែត បានប្រកាសឲ្យដឹងកាលពីថ្ងៃទី១២ ខែមិថុនា អំពីការផ្តោតការយកចិត្តទុកដាក់របស់ខ្លួនទៅលើកិច្ចសហប្រតិ្តផ្នែកការអភិវឌ្ឍន៍នៃការពង្រឹងសិទ្ធិមនុស្សនិងលទ្ធិប្រជាធិបតេយ្យ។
សេចក្តីថ្លែងការណ៍របស់ស្ថានទូតស៊ុយអែតប្រចាំកម្ពុជា ចុះថ្ងៃទី១២ ខែមិថុនានេះ បានរៀបរាប់ថាលំហប្រជាធិបតេយ្យនៅកម្ពុជាប៉ុន្មានឆ្នាំកន្លងទៅថ្មីៗនេះ មានការ«រឹតត្បិតយ៉ាងធ្ងន់ធ្ងរ»។
លោក Peter Eriksson រដ្ឋមន្ត្រីទទួលបន្ទុកសហប្រតិបត្តិការអភិវឌ្ឍន៍អន្តរជាតិស៊ុយអែត បានថ្លែងក្នុងសេចក្តីថ្លែងការណ៍នេះថា៖
«ការណ៍នេះ បង្កការលំបាកដល់ការបន្តការសហការដែលជិតស្និទ្ធនិងទូលំទូលាយ។ ដូច្នេះរដ្ឋាភិបាល[ស៊ុយអែត]បានជ្រើសរើសបង្វែរកិច្ចប្រឹងប្រែងការអភិវឌ្ឍន៍របស់យើងដើម្បីផ្តល់ការគាំទ្រប្រសើរជាងនេះដល់ការផ្លាស់ប្តូរទាក់ទងនឹងសិទ្ធិមនុស្ស ប្រជាធិបតេយ្យ និងនីតិរដ្ឋក្នុងប្រទេស[កម្ពុជា]»។
ឧត្តមស្នងការអង្គការសហប្រជាជាតិ(អ.ស.ប)ទទួលបន្ទុកសិទ្ធិមនុស្សគឺអ្នកស្រី មីស្សែល បាស្សេឡេត (Michelle Bachelet) កាលពីសប្តាហ៍ថ្មីៗនេះ បានសម្តែងការភ្ញាក់ផ្អើលចំពោះការបង្ក្រាបលើសិទ្ធិបញ្ចេញមតិក្នុងប្រទេសចំនួន១២នៅតំបន់អាស៊ីប៉ាស៊ីហ្វ្រិករួមទាំងកម្ពុជាផង ។
សេចក្តីប្រកាសព័ត៌មានរបស់ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សដែលចេញផ្សាយនៅថ្ងៃទី៣ខែមិថុនានេះ បានបញ្ជាក់ថា នៅកម្ពុជាមានករណីចាប់ខ្លួនបុគ្គលចំនួន៣០នាក់ រួមទាំងស្ត្រី៦នាក់ និងក្មេងស្រីអាយុ១៤ឆ្នាំម្នាក់ដែរ ដោយសារតែការនិយាយជាសាធារណៈ និងការបង្ហោះសារតាមប្រព័ន្ធផ្សព្វផ្សាយសង្គមទាក់ទងនឹងជំងឺកូវីដ១៩។
បុគ្គលមួយចំនួនត្រូវបានចោទប្រកាន់ពីបទចែកចាយ «ព័ត៌មានក្លែងក្លាយ» ឬ«ព័ត៌មានមិនពិត» និងពីបទ «ញុះញង់ឱ្យប្រព្រឹត្តបទឧក្រិដ្ឋ» ហើយនិងបទ «រៀបចំផែនការប្រឆាំងនឹងរដ្ឋាភិបាល» ជាដើម។
បច្ចុប្បន្ន មនុស្ស១៤នាក់កំពុងស្ថិតក្នុងការឃុំឃាំង ដែលក្នុងនោះ១០នាក់ជាប់ពាក់ព័ន្ធនឹងគណបក្សសង្គ្រោះជាតិ ជាគណបក្សប្រឆាំងដ៏ធំ ដែលត្រូវបានតុលាការកំពូលកម្ពុជារំលាយកាលពីឆ្នាំ២០១៧។
កាលពីខែកុម្ភៈ សហភាពអឺរ៉ុបបានសម្រេចថា នឹងព្យួរប្រព័ន្ធអនុគ្រោះពន្ធសម្រាប់កម្ពុជា «គ្រប់មុខទំនិញលើកលែងសព្វាវុធ» ឬ Everything But Arms (EBA) ដែលកម្ពុជាទទួលបានតាំងពីឆ្នាំ២០០១។ ការព្យួរនេះ នឹងប៉ះពាល់ទឹកប្រាក់ជាង១ពាន់លានដុល្លារអាមេរិកនៃការនាំចេញសរុបរបស់កម្ពុជាទៅសហភាពអឺរ៉ុប។ ការសម្រេចព្យួរនេះ ក្រោមហេតុផលនៃការរំលោភសិទ្ធិមនុស្សធ្ងន់ធ្ងរ និងការធ្លាក់ចុះលទ្ធិប្រជាធិបតេយ្យនៅកម្ពុជា។ ការព្យួរនេះ នឹងចូលជាធរមាន ចាប់ពីថ្ងៃទី១២ខែសីហាឆ្នាំ២០២០។
ក្រុមមន្ត្រីរដ្ឋាភិបាលនៃគណបក្សគ្រប់គ្រងប្រទេសរួមទាំងលោក សុខ ឥសានផងមិនបានខ្វល់នឹងការរិះគន់របស់បរទេសជាពិសេសលោកខាងលិចនោះ បានបញ្ជាក់ខ្លីថា កម្ពុជាត្រូវទទួលរងការវាយតម្លៃពីភាពខ្មៅងងឹតមិនឆ្លុះបញ្ចាំងពីការពិតនោះយូរមកហើយ៕
