ប្រធានគណបក្សសង្គ្រោះជាតិគឺលោក សម រង្ស៊ី មើលឃើញថា គណៈកម្មាធិការជាតិរៀបចំការបោះឆ្នោត(គជប) ថ្មីធ្វើការគួរឱ្យទុកចិត្តបាន ហើយលោកជឿជាក់ថា ការបោះឆ្នោតក្នុងពេលខាងមុខនឹងល្អប្រសើរ។
លោក សម រង្ស៊ី បានបញ្ជាក់ក្នុងកម្មវិធី Hello VOA ពិសេសកាលពីថ្ងៃពុធថា លទ្ធផលឆ្នោតក្នុងពេលខាងមុខនឹងមិនត្រូវមានការតវ៉ាទៀតអ្វីទេ។
លោកសម រង្ស៊ីបានបន្ថែមថា៖
«នៅប្រទេសកម្ពុជាយើងអ្វីដែលជាសមិទ្ធផលដ៏ល្អ គឺឥឡូវនេះមានការរៀបចំគណៈកម្មការរៀបចំ ការបោះឆ្នោតថ្មីមួយ។ អីចឹងមិនត្រូវមានការតវ៉ាអ្វី ទៀតទេពីព្រោះគណបក្សទាំងអស់មជ្ឈដ្ឋានសង្គមស៊ីវិលចូលរួមមើលការខុសត្រូវគ្នាទៅវិញទៅមក។ ខ្ញុំជឿថាការបោះឆ្នោតក្នុងពេលខាងមុខនឹងល្អប្រសើរ»។
លោក សម រង្ស៊ី បានបន្ថែមថាបើទោះបីជាគណបក្សរបស់លោកធ្លាប់សម្តែងការខកចិត្តលើការជ្រើសរើសលោក ទេព នីថា ឱ្យបន្តតំណែងជាអគ្គលេខាធិការគ.ជ.បដដែលប៉ុន្តែរបៀបធ្វើការរបស់ស្ថាប័នបោះឆ្នោតថ្មីនេះខុសពីមុនហើយរបៀបសម្រេចចិត្តខុសពីមុនដែលមានលក្ខណៈបក្សពួកនិយម។
«លោក ទេព នីថា មុននិងលោក ទេព នីថា ក្រោយខុសគ្នាពីព្រោះ ធ្វើការក្នុងបរិបទ ក្នុងក្របខណ្ឌ របៀបធ្វើការ របៀបធ្វើសេចក្តីសម្រេច របៀបចាត់ចែងខុសគ្នា។ ពីមុនបុគ្គលម្នាក់អាចធ្វើអ្វីបានតាមចិត្ត។ គេបក្សគេតែមួយគេឃុបឃិតគ្នាទៅធ្វើអ្វី បានតាមចិត្តប៉ុន្តែឥឡូវអត់ទេ។ មានរបៀបមានវិន័យមានយន្តការឃ្លាំមើលតាមដានគ្នាទៅវិញទៅមក។ អីចឹងហើយទាល់តែ រៀបចំ បានល្អដូចយើងបានធ្វើទើបយើងមានជំនឿ»។
ទស្សនាកម្មវិធីនេះទាំងស្រុងតាម Facebook៖
យ៉ាងណាក៏ដោយលោកបន្ថែមថា លោកស្នើសុំឱ្យគ្រប់មជ្ឈដ្ឋានបន្តតាមដានការងាររបស់ស្ថាប័នបោះឆ្នោតនេះ។
លោក សម រង្ស៊ី កំពុងធ្វើដំណើរជួបអ្នកគាំទ្រនៅសហរដ្ឋអាមេរិកនិងប្រទេសកាណាដា។ លោកបានជំរុញឱ្យពួកគេចូលរួមក្នុងការទាមទារសិទ្ធិបោះឆ្នោតនៅក្នុងប្រទេសកម្ពុជាផងដែរដោយលោកបញ្ជាក់ថាច្បាប់បោះឆ្នោតគួរតែធ្វើវិសោធនកម្មដើម្បីឱ្យខ្មែរនៅក្រៅប្រទេសមានសិទ្ធិបោះឆ្នោតហើយគណបក្សរបស់លោកត្រៀមលក្ខណៈដើម្បីធ្វើការជាមួយនឹងគណបក្សកាន់អំណាចដើម្បីឱ្យពលរដ្ឋខ្មែរនៅក្រៅប្រទេសមានសិទ្ធិបោះឆ្នោតដោយមិនចាំបាច់ធ្វើដំណើរត្រឡប់ទៅប្រទេសកម្ពុជាវិញទេ។
ក្រៅពីលោក សម រង្ស៊ី មានមន្ត្រីគណបក្សជាច្រើនបានចេញដំណើរមកបំពេញបេសកកម្មនៅក្រៅប្រទេសជាបន្តបន្ទាប់ដូចជានៅសហរដ្ឋអាមេរិក កាណាដា សហគមន៍អឺរ៉ុបនិងអូស្ត្រាលីជាដើមដើម្បីជួបអ្នកគាំទ្រ។
លោក សម រង្ស៊ី បានពន្យល់ថា៖
«យើងចង់បង្ហាញថានៅក្នុងជួរគណបក្សសង្គ្រោះជាតិមានអ្នកដែលមានសមត្ថភាពច្រើន ចំនួនក៏ច្រើន អ្នកដែលមានសមត្ថភាពក៏ច្រើនយើងត្រូវតែចែកការគ្នាធ្វើ។ ខ្លះធ្វើការនៅ ក្នុងប្រទេសខ្លះទៅ ធ្វើការទៅ ជួបបងប្អូននៅ ឯនាយសមុទ្រនៅច្រើនប្រទេសច្រើនទ្វីបជួបជាមួយថ្នាក់ដឹកនាំនៅច្រើនប្រទេសជាមិត្ត។ ការចែកការគ្នាធ្វើនេះគឺបង្កើនប្រសិទ្ធភាពការងាររបស់គណបក្សទាំងមូល»។
លោកសម រង្ស៊ី យល់ថាដំណើរទស្សនកិច្ចរបស់លោករដ្ឋមន្ត្រីការបរទេសសហរដ្ឋអាមេរិក ចន ឃែរី គឺមានប្រយោជន៍ ហើយស្របនឹងពេលវេលាកាលៈទេសៈដែលត្រូវឱ្យខ្មែរទាំងអស់នឹកឃើញនិងគោរពគោលការណ៍ប្រជាធិបតេយ្យ។ លោក សម រង្ស៊ី បានបញ្ជាក់ថាកម្ពុជាត្រូវការទាំងជំនួយសម្រាប់សិទ្ធិមនុស្សនិងអភិបាលកិច្ចល្អនិងការធ្វើពាណិជ្ជកម្មជាមួយនឹងសហរដ្ឋអាមេរិកព្រោះកត្តាទាំងពីរនេះដើរទន្ទឹមគ្នា។
«សហរដ្ឋអាមេរិកគឺជាប្រទេសមហាអំណាចដែលធានាឱ្យមានការគោរពសិទ្ធិមនុស្សឱ្យបានត្រឹមត្រូវឱ្យបានពេញលេញ គោរពគោលការណ៍លទ្ធិប្រជាធិបតេយ្យដើម្បីធានាឱ្យមានអភិបាលកិច្ចល្អ។ ហើយមានតែអភិបាលកិច្ចល្អហ្នឹងទេដែលជួយឱ្យជីវភាពប្រជាពលរដ្ឋដូចជាប្រជាពលរដ្ឋនៅប្រទេសកម្ពុជាមានការរីកចម្រើនរួចផុតពីភាពក្រីក្រដែលយើងទាំងអស់គ្នាចង់ឃើញឱ្យមានការវិវត្តន៍បែបហ្នឹង។ ហើយលោក ចន ឃែរី គាត់មកដល់កម្ពុជាគាត់រំលឹកគោលការណ៍ទាំងអស់ហ្នឹងហើយពេលនេះប្រទេសកម្ពុជាយើងក៏ ត្រូវការជំនួយសហរដ្ឋអាមេរិកជំនួយខាងវិនិយោគ ជំនួយខាងពាណិជ្ជកម្ម»។
លោក សម រង្ស៊ី បន្ថែមថាកម្ពុជាជ្រើសរើសយកការរាប់អានមិត្តភក្តិច្រើនជាជាងលម្អៀងតែទៅខាងណាមួយ៖
«យើងធ្វើអ្វី ក៏ ធ្វើដែរឱ្យតែចំណេញប្រទេសជាតិ។ យើងមិនទៅលម្អៀងខាងណាខាងណាទេឱ្យតែគេគោរពអធិបតេយ្យភាពជាតិយើង។ គេគោរពភាពថ្លៃថ្នូររបស់យើង។ គោរពផលប្រយោជន៍របស់យើងគឺយើងសហការជាមួយប្រទេសជាមួយមហាអំណាចទាំងអស់ពីព្រោះបំណងយើងតែ មួយគត់គឺការពារប្រទេសកម្ពុជាឱ្យបាននៅគង់វង្ស ហើយជំរុញឱ្យប្រទេសយើងមានការរីកចម្រើនពិតប្រាកដដើម្បីលើកតម្កើងលើកស្ទួយជីវភាពប្រជាពលរដ្ឋ។ ដូច្នេះយើងត្រូវការទំនាក់ទំនងល្អជាមួយអាមេរិកក៏យើងត្រូវការ។ ទំនាក់ទំនងល្អជាមួយប្រទេសចិនក៏យើងត្រូវការ។ ជាមួយមហាអំណាចណាដទៃទៀតក៏យើងត្រូវការ»។
លោក សម រង្ស៊ី បានជួបជាមួយនឹងមន្ត្រីសំខាន់ៗមួយចំនួនក្នុងរដ្ឋាភិបាលសហរដ្ឋអាមេរិកនិងនៅខាងសភាជាតិក្នុងដំណើររបស់លោកមករដ្ឋធានីវ៉ាស៊ីនតោនក្នុងសប្តាហ៍នេះ។
