កងយោធារុស្ស៊ីបានចូលទៅក្នុងទីតាំងមូលដ្ឋានកងទ័ពអាកាសមួយកន្លែងក្នុងប្រទេសនីហ្សេដែលជាកន្លែងដែលកងទ័ពអាមេរិកកំពុងឈរជើងនៅទីនោះ។ នេះបើតាមការឱ្យដឹងរបស់មន្ត្រីការពារជាតិជាន់ខ្ពស់អាមេរិកម្នាក់ ដែលបានប្រាប់ទីភ្នាក់ងារសារព័ត៌មាន Reuters ដែលនេះជាសកម្មភាពមួយ ក្រោយពីរបបសឹកប្រទេសនីហ្សេបានសម្រេចចិត្តបណ្តេញកងយោធាអាមេរិកចេញពីប្រទេសនេះ។ នេះបើតាមការចេញផ្សាយរបស់ទីភ្នាក់ងារសារព័ត៌មាន Reuters។
ក្រុមមន្ត្រីយោធានីហ្សេដែលកំពុងកាន់កាប់ប្រទេសនៅទ្វីបអាហ្រ្វិកខាងលិចមួយនេះ បានប្រាប់ឱ្យអាមេរិកដកកងទាហានរបស់ខ្លួនប្រមាណជិត ១.០០០ នាក់ ចេញពីប្រទេសនេះ ដែលកាលពីមុនរដ្ឋប្រហារយោធាកាលពីឆ្នាំទៅធ្លាប់ធ្វើជាដៃគូដ៏សំខាន់មួយរបស់រដ្ឋាភិបាលក្រុងវ៉ាស៊ីនតោនប្រឆាំងនឹងក្រុមបះបោរ ដែលបានសម្លាប់មនុស្សអស់ជាច្រើនពាន់នាក់ និងធ្វើឱ្យមានការបម្លាស់ទីពលរដ្ឋជាច្រើនលាននាក់ផ្សេងទៀត។
មន្ត្រីការពារជាតិអាមេរិកជាន់ខ្ពស់រូបនេះ ដែលបាននិយាយក្នុងលក្ខខណ្ឌមិនបញ្ចេញឈ្មោះថា កងទ័ពរុស្ស៊ីមិនបានមកក្បែរកងទ័ពអាមេរិកនោះឡើយ ប៉ុន្តែបានប្រើប្រាស់ទីតាំងអគារដាក់យន្តហោះមួយផ្សេងទៀត នៅព្រលានយន្តហោះទ័ពអាកាស ១០១ ដែលនៅជាប់នឹងអាកាសយាន្តដ្ឋានអន្តរជាតិ Diori Hamani ក្នុងរដ្ឋធានីនីញ៉ាម៉េនៃប្រទេសនីហ្សេ។
សកម្មភាពរបស់កងយោធារុស្ស៊ីទាំងនេះ ដែលត្រូវបានផ្សព្វផ្សាយមុនគេដោយទីភ្នាក់ងារសារព័ត៌មាន Reuters នោះ បានដាក់កងយោធាអាមេរិកនិងរុស្ស៊ីនៅជិតគ្នាបំផុត នៅពេលដែលគូប្រជែងខាងការទូតនិងយោធានៃប្រទេសទាំងពីរកំពុងបង្កើនភាពជូរចត់ជាមួយគ្នា ជុំវិញជម្លោះក្នុងប្រទេសអ៊ុយក្រែន។
វាក៏បានបង្កើតនូវសំណួរជាច្រើនពីជោគវាសនានៃទីតាំងយោធាអាមេរិកក្នុងប្រទេសនីហ្សេ បន្ទាប់ពីអាមេរិកត្រូវដកកងទ័ពចេញពីប្រទេសនេះ។
មន្ត្រីអាមេរិកដែលសុំមិនបញ្ចេញឈ្មោះរូបនោះបន្តទៀតថា«ស្ថានភាពនេះមិនល្អទាល់តែសោះ ប៉ុន្តែអាចគ្រប់គ្រងបានក្នុងរយៈពេលខ្លី»។
នៅពេលសួរពីរបាយការណ៍ព័ត៌មានដែលចេញផ្សាយដោយទីភ្នាក់ងារសារព័ត៌មា Reuters នោះ រដ្ឋមន្ត្រីការពារជាតិអាមេរិកលោក Lloyd Austin បានចាត់ទុកថាមិនមានហានិភ័យអ្វីខ្លាំងទេ សម្រាប់កងទ័ពអាមេរិកនៅទីនោះ ឬក៏ឱកាសដែលកងទ័ពរុស្ស៊ីអាចទៅកាន់តែគៀកនឹងគ្រឿងឧបករណ៍យោធាធន់ធ្ងន់របស់អាមេរិក។
លោក Lloyd Austin បានប្រាប់សន្និសីទកាសែតក្នុងទីក្រុងហូណូលូលូ រដ្ឋហាវ៉ៃថា៖ «កងទ័ពរុស្ស៊ីស្ថិតនៅក្នុងបរិវេណមួយដាច់ដោយឡែក និងមិនអាចចូលទៅដល់កន្លែងកងទ័ពអាមេរិកកំពុងឈរជើងឬឧបករណ៍យោធារបស់យើងឡើយ»៕
