ក្រសួងការពារជាតិចក្រភពអង់គ្លេសនិយាយនៅក្នុងរបាយការណ៍ប្រចាំថ្ងៃរបស់ខ្លួននៅថ្ងៃសុក្រនេះ ស្តីពីប្រទេសអ៊ុយក្រែនថា ការប្រកាសនាពេលថ្មីៗនេះរបស់រុស្ស៊ី ដែលថា នាវាមុជទឹកដើរដោយថាមពលនុយក្លេអ៊ែរនៃកងនាវាជើងទឹកប្រចាំតំបន់ខាងជើងរបស់រុស្ស៊ី នឹងមិនចូលរួមនៅក្នុងទិវាកងនាវាជើងទឹក ក្នុងទីក្រុង St. Petersburg នៅថ្ងៃទី៣០ខែកក្កដាខាងមុខនេះ ទំនងជាបណ្តាលមកពីបញ្ហាសំខាន់ គឺការជួសជុល ដែលមិនអាចមាននាវាទៅចូលរួមក្នុងពិធីនោះបាន។
ទោះបីជាយ៉ាងនេះក្តី ក៏ក្រសួងការពារជាតិចក្រភពអង់គ្លេសថា វាអាចមានលទ្ធភាពជាក់ស្តែងមួយផងដែរ ដែលថាបញ្ហាបារម្ភពីសន្តិសុខផ្ទៃក្នុង អាចជាជម្រើសមួយដែរនៅក្នុងរឿងនេះ ចាប់តាំងពីកងកម្លាំងស៊ីឈ្នួលរុស្ស៊ី ក្រុមWagner បានប៉ុនប៉ងបះបោរកាលពីពេលថ្មីៗនេះ។
ទន្ទឹមនឹងនេះ ខុទ្ទកាល័យប្រធានាធិបតីអ៊ុយក្រែនរាយការណ៍នៅថ្ងៃព្រហស្បតិ៍ថា ការវាយប្រហារដោយកងកម្លាំងរុស្ស៊ីនៅក្នុងប្រទេសអ៊ុយក្រែន បានសម្លាប់ជនស៊ីវិលអ៊ុយក្រែនយ៉ាងហោចណាស់ក៏៣នាក់ដែរ និងធ្វើឱ្យរបួសមនុស្ស៣៨នាក់ផ្សេងទៀត។
រដ្ឋាភិបាលក្រុងកៀវនិយាយថា កងកម្លាំងរុស្ស៊ី បានធ្វើការវាយប្រហារសំដៅលើទីក្រុង និងភូមិអ៊ុយក្រែនចំនួន១៣ ដោយការវាយប្រហារតាមអាកាស គ្រាប់មីស៊ីល និងកាំភ្លើងធំ នៅក្នុងតំបន់ Donetsk ភាគខាងកើតដែលគ្រប់គ្រងមួយផ្នែកដោយរុស្ស៊ី។
នៅក្នុងតំបន់ Zaporizhzhia ដែលគ្រប់គ្រងមួយផ្នែកដោយកងកម្លាំងរុស្ស៊ីដែរនោះ អ៊ុយក្រែននិយាយថា មនុស្សចំនួន២១នាក់បានត្រូវរបួស ដោយសារបំណែកយន្តហោះដ្រូនដែលធ្លាក់ពីលើអាកាសកាលពីថ្ងៃពុធ និងអគ្គិភ័យដែលបានឆេះក្នុងទីក្រុង Kherson ដោយការបាញ់ផ្លោងដាក់របស់រុស្ស៊ី។
ជាមួយគ្នានេះផងដែរ មន្ត្រីអ៊ុយក្រែននិយាយថា ប្រព័ន្ធការពារដែនអាកាសរបស់ខ្លួន បានបាញ់ទម្លាក់យន្តហោះដ្រូនរុស្ស៊ី ដែលផលិតនៅអ៊ីរ៉ង់ចំនួន២០គ្រឿង ដែលបានធ្វើការវាយប្រហារលើតំបន់ក្រុងកៀវ។ ក្រុមមន្ត្រីទាំងនេះក៏បានឱ្យដឹងដែរថា កម្ទេចបាក់បែករបស់យន្តហោះដ្រូន បានធ្លាក់លើសង្កាត់ចំនួន៤នៅក្នុងទីក្រុងកៀវកាលពីព្រលឹមថ្ងៃព្រហស្បតិ៍ ដោយមនុស្ស២នាក់រងរបួស ចូលសម្រាកក្នុងមន្ទីរពេទ្យដោយត្រូវអម្បែងគ្រាប់ និងការបំផ្លាញផ្ទះសម្បែងជាច្រើនផងដែរ៕
(ព័ត៌មានមួយចំនួនក្នុងសេចក្តីរាយការណ៍នេះដកស្រង់មកពីទីភ្នាក់ងារសារព័ត៌មាន The Associated Press, Agence France-Presse និង Reuters )។
