កងទ័ពរុស្ស៊ីនិងអ៊ុយក្រែនកំពុងប៉ះទង្គិចគ្នានៅក្នុងតំបន់ Kursk នៃប្រទេសរុស្ស៊ីនៅថ្ងៃទី៣ជាប់ៗគ្នា។ នេះបើតាមក្រសួងការពារជាតិរបស់រុស្ស៊ីកាលពីថ្ងៃព្រហស្បតិ៍។
រុស្ស៊ីបានពណ៌នាការប៉ះទង្គិចនេះថាជាការលុកលុយឆ្លងកាត់ព្រំដែនដ៏ធំបង្អស់មួយដោយកងទ័ពអ៊ុយក្រែនក្នុងអំឡុងនៃសង្គ្រាមដែលបានចាប់ផ្តើមកាលពី២ឆ្នាំកន្លះមុនដោយការឈ្លានពានរបស់រដ្ឋាភិបាលក្រុងមូស្គូលើអ៊ុយក្រែននៅតាមបណ្តាយព្រំដែនរបស់ខ្លួនជាមួយរុស្ស៊ី។
ក៏ប៉ុន្តែ សេចក្តីថ្លែងការណ៍របស់ក្រសួងការពារជាតិរុស្ស៊ីបាននិយាយថាយោធារុស្ស៊ីនិងឆ្មាំការពារព្រំដែនបានរារាំងកងទ័ពអ៊ុយក្រែនកុំឱ្យរុលចូលកាន់តែជ្រៅទៅក្នុងតំបន់ Kursk នៅភាគនារតីប្រទេសរុស្ស៊ី។ ក្រសួងការពារជាតិនោះបាននិយាយទៀតថាកងទ័ពកំពុងវាយប្រហារទាហានរបស់អ៊ុយក្រែនដែលកំពុងព្យាយាមរុលទៅមុខចេញពីតំបន់ Sumy នៃប្រទេសអ៊ុយក្រែន។
វិទ្យាស្ថានសម្រាប់ការសិក្សាសង្គ្រាមដែលជាអង្គការស្រាវជ្រាវមានទីតាំងនៅរដ្ឋធានីវ៉ាស៊ីនតោនដែលបានតាមដានយ៉ាងដិតដល់សង្គ្រាមរវាងរុស្ស៊ីនិងអ៊ុយក្រែនបាននិយាយថារហូតមកដល់ថ្ងៃពុធ កងទ័ពអ៊ុយក្រែនបានរុលចូលក្នុងដែនដីរុស្ស៊ីរហូតដល់១០គីឡូម៉ែត្រ ថ្វីបើការវាយតម្លៃមិនមានការបញ្ជាក់ក៏ដោយ។
ពួកមន្ត្រីអ៊ុយក្រែនមិនបានធ្វើអត្ថាធិប្បាយជាសាធារណៈស្តីពីការប្រយុទ្ធគ្នានៅក្នុងតំបន់ Kursk ជុំវិញទីក្រុង Sudzha។
ក្រសួងការពារជាតិរុស្ស៊ីបានបញ្ជាក់ថាខ្លួនបានកម្ទេចដ្រូនអ៊ុយក្រែនដែលបានហោះពីលើតំបន់ Kursk និង Oryol។
លោក Alexei Smirnov អភិបាលស្តីទីតំបន់ Kursk បាននិយាយកាលពីថ្ងៃព្រហស្បតិ៍នៅលើ Telegram ថាប្រព័ន្ធការពារដែនអាកាសរុស្ស៊ីក៏បានបាញ់ទម្លាក់កាំជ្រួចមីស៊ីលរបស់អ៊ុយក្រែនជាច្រើននៅក្នុងរយៈពេលមួយយប់៕
ព័ត៌មានខ្លះនៃសេចក្តីរាយការណ៍នេះផ្តល់ដោយទីភ្នាក់ងារសារព័ត៌មាន ReutersនិងAP
វេទិកាបញ្ចេញមតិ