ប្រធានាធិបតីរុស្ស៊ី លោក Vladimir Putin បានប្រកាសកាលពីថ្ងៃអង្គារថា ប្រទេសលោកហាមប្រាមការដឹកជញ្ជូនប្រេងទៅលក់ឱ្យប្រទេសទាំងឡាយណាដែលយល់ព្រមតាមការកម្រិតតម្លៃប្រេងត្រូវដាក់កំហិតដោយពួកប្រទេសលោកខាងលិច ដែលបានចូលជាធរមាននៅដើមខែនេះ។
បើតាមក្រឹត្យប្រធានាធិបតីមួយត្រូវបោះពុម្ពផ្សាយតាមគេហទំព័ររដ្ឋាភិបាលនិងវិមានក្រឹមឡាំងថា៖ «ការផ្គត់ផ្គង់ប្រេងនិងផលិតកម្មប្រេងរុស្ស៊ីឱ្យនីតិបុគ្គលបរទេសនិងពួកបុគ្គលត្រូវហាមប្រាម ប្រសិនបើកុងត្រានៃការផ្គង់ផ្គង់ទាំងនេះត្រូវប្រើជាការកម្រិតតម្លៃដោយផ្ទាល់ឬមិនដោយផ្ទាល់»។
ទីភ្នាក់ងារសារព័ត៌មាន Reuters បានរាយការណ៍ថា ក្រឹត្យនេះជាការឆ្លើយតបដោយផ្ទាល់ដល់«សកម្មភាពអមិត្តនិងផ្ទុយនឹងច្បាប់អន្តរជាតិដោយសហរដ្ឋអាមេរិកនិងពួករដ្ឋបរទេសព្រមទាំងអង្គការអន្តរជាតិដែលចូលរួមជាមួយប្រទេសទាំងនេះ»។
Reuters បានរាយការណ៍ថា ការកម្រិតតម្លៃប្រេងត្រូវបានយល់ព្រមនៅដើមឆ្នាំនេះដោយក្រុមប្រទេសជាតិ ៧ ដែលមានរួមប្រទេសកាណាដា បារាំង អាល្លឺម៉ង់ អ៊ីតាលី ជប៉ុន ចក្រភពអង់គ្លេស សហរដ្ឋអាមេរិក និងសហភាពអឺរ៉ុប។ ការកម្រិតតម្លៃប្រេងនេះនឹងត្រូវពង្រឹងដោយក្រុមប្រទេស G-7 សហភាពអឺរ៉ុបនិងប្រទេសអូស្ត្រាលី។
ប៉ុន្តែយ៉ាងណាក៏ដោយ ក៏រុស្ស៊ីបាននិយាយថា ការកម្រិតតម្លៃប្រេងនេះនឹងមិនផលប៉ះពាល់ដល់យុទ្ធនាការយោធារបស់ខ្លួនក្នុងប្រទេសអ៊ុយក្រែនទេ ហើយបានសម្តែងការទុកចិត្តថាខ្លួននឹងរកអ្នកទិញថ្មីៗសម្រាប់ផលិតកម្មប្រេងរបស់ខ្លួន។
ប្រទេសរុស្ស៊ីដែលជាប្រទេសលក់ប្រេងធំទីពីរបន្ទាប់ពីប្រទេសអារ៉ាប៊ីសាអូឌីត បានថ្លែងថា ការហាមប្រាមនេះចូលជាធរមានពីថ្ងៃទី១ខែកុម្ភៈដល់ថ្ងៃទី១ ខែកក្កដា៕
