រុស្ស៊ីកំពុងធ្វើការកាន់ទុក្ខលក្ខណៈជាតិរយៈពេលមួយថ្ងៃនៅថ្ងៃអាទិត្យនេះសម្រាប់អ្នកដំណើរ២១៧នាក់ និងអ្នកបើកបរ៧នាក់ ដែលបានស្លាប់នៅក្នុងការធ្លាក់យន្តហោះមួយគ្រឿងកាលពីថ្ងៃសៅរ៍នៅឧបទ្វីបស៊ីណៃ (Sinai) នៃប្រទេសអេហ្ស៊ីប។ អ្នកដំណើរស្ទើរតែទាំងអស់ជាអ្នកទេសចរជនជាតិរុស្ស៊ី ដែលចាកចេញពីកន្លែងលំហែកាយ Sharm el-Sheik ទៅកាន់ទីក្រុង St. Petersburg វិញ។ ជនជាតិអ៊ុយក្រែនក៏ស្ថិតក្នុងចំណោមអ្នកស្លាប់ទាំងនោះដែរ។
ក្រុមជួយសង្គ្រោះបន្ទាន់បានរកឃើញសាកសពមនុស្សយ៉ាងហោចណាស់ក៏១២៩នាក់ដែររហូតមកទល់ពេលនេះ រួមជាមួយប្រអប់ខ្មៅពីររបស់យន្តហោះនោះ ដែលបានថតទិន្នន័យពីជើងហោះហើរ រួមមានការទាក់ទងក្នុងចំណោមអ្នកបើកបរ។ អ្នកជំនាញសង្ឃឹមថា ប្រដាប់ថតទិន្នន័យនឹងផ្តល់ឲ្យពួកគេនូវតម្រុយសំខាន់ៗពីមូលហេតុនៃការធ្លាក់យន្តហោះនេះ។
បណ្តាញក្រុមរដ្ឋឥស្លាមរបស់អេហ្ស៊ីបបានប្រកាសអះអាងទទួលខុសត្រូវចំពោះការបាញ់ទម្លាក់យន្តហោះនេះ។ ក៏ប៉ុន្តែអ្នកជំនាញខាងអាកាសចរណ៍ និងយោធា និយាយថា ការណ៍នេះមិនអាចកើតមានឡើងទេ។ ពួកគេនិយាយថា យន្តហោះនោះបានខ្ទេចនៅកម្ពស់៩.១០០ម៉ែត្រមុនពេលវាធ្លាក់ ហើយពួកគេនិយាយទៀតថា ក្រុមរដ្ឋឥស្លាម មិនមានកាំជ្រួចមីស៊ីលដែលអាចបាញ់ដល់កម្ពស់នោះទេ។
ក្រុមហ៊ុនអាកាសចរណ៍សំខាន់២របស់អឺរ៉ុបគឺ ក្រុមហ៊ុនអាកាសចរណ៍ Air France និង Lufthansa បានប្រាប់ឲ្យដឹងថា ពួកគេនឹងឈប់ហោះលើតំបន់នោះដោយហេតុផលសុវត្ថិភាព។
យន្តហោះធុន Airbus A-321 ជាជើងហោះហើរដឹកអ្នកដំណើរ ដែលបានប្រតិបត្តិការដោយក្រុមហ៊ុនអាកាសចរណ៍តូចមួយហៅថា Metrojet។ យន្តហោះនោះបានបាត់ពីកញ្ចក់រ៉ាដា ២៣នាទី បន្ទាប់ពីហោះចេញពីកន្លែងលំហែកាយ Sharm el-Sheikh មុនពេលថ្ងៃរះកាលពីថ្ងៃសៅរ៍។ យន្តហោះនោះធ្លាក់ចម្ងាយប្រហែល ១០០គីឡូម៉ែត្រខាងត្បូងទីក្រុង El-Arish៕
