ការជួញដូររូបិយប័ណ្ណរុស្ស៊ីបានធ្លាក់ចុះជាង៦ភាគរយបើធៀបទៅនឹងប្រាក់ដុល្លារសហរដ្ឋអាមេរិកជាលើកទីមួយកាលពីថ្ងៃច័ន្ទ បន្ទាប់ពីរដ្ឋាភិបាលទីក្រុងម៉ូស្គូបាននិយាយថាសេដ្ឋកិច្ចរបស់ខ្លួនបានធ្លាក់ចុះជាលើកទីមួយកាលពីខែវិច្ឆិកា ចាប់តាំងពីឆ្នាំ២០០៩មក។
សេចក្តីរាយការណ៍សេដ្ឋកិច្ចរបស់រុស្ស៊ីបានព្យាករណ៍ពីការធ្លាក់ចុះ៤ភាគរយបន្ថែមទៀត ប្រសិនបើប្រេងមានតម្លៃជាមធ្យម៦០ដុល្លាក្នុងមួយធុងនៅឆ្នាំ២០១៥នោះ។
រុស្ស៊ីបានទទួលរងការប៉ះពាល់ដោយសារការធ្លាក់ចុះតម្លៃប្រេងឆៅដែលជាការនាំចេញសំខាន់ ហើយនិងដោយសារការដាក់ទណ្ឌកម្មសេដ្ឋកិច្ចចំពោះសកម្មភាពរបស់រុស្ស៊ីនៅក្នុងប្រទេសអ៊ុយក្រែន។
នៅក្នុងកិច្ចសម្ភាសន៍ដែលបានផ្សាយកាលពីថ្ងៃច័ន្ទជាមួយវិទ្យុសាធារណៈជាតិ (NPR) លោកប្រធានាធិបតីសហរដ្ឋអាមេរិក បារ៉ាក់ អូបាម៉ា បាននិយាយថា លោកគិតថាស្ថិរភាពនៃការគៀបសង្កត់ដោយការដាក់ទណ្ឌកម្មនឹងធ្វើឲ្យសេដ្ឋកិច្ចរុស្ស៊ីមានងាយរងគ្រោះ ហើយពេលតម្លៃប្រេងចុះថោកនឹងធ្វើឲ្យរុស៊្សីពិបាកយ៉ាងខ្លាំងក្នុងគ្រប់គ្រងសេដ្ឋកិច្ច។
លោកប្រធានាធិបតីមានប្រសាសន៍ទៀតថា មុនពេលប្រេងដួលរលំ សេដ្ឋកិច្ចរុស្ស៊ីបានបង្ហាញសញ្ញាទន់ខ្សោយរួចហើយ៕
