អង្គការឃ្លាំមើលសិទ្ធិមនុស្សអន្តរជាតិ Human Rights Watch (HRW) និងក្រុមសមាជិកសភាអាស៊ានដើម្បីសិទ្ធិមនុស្ស (ASEAN Parliamentarians for Human Rights) ហៅកាត់ថា APHRនៅថ្ងៃអង្គារនេះ បានជំរុញឲ្យរដ្ឋាភិបាលកម្ពុជា និងរដ្ឋាភិបាលថៃតាមស្វែងរកសកម្មជនថៃម្នាក់គឺលោក Wanchalerm Satsaksit ដែលត្រូវបានរាយការណ៍ថា ត្រូវបានចាប់ពង្រត់ក្នុងប្រទេសកម្ពុជាកាលពីសប្តាហ៍មុន។
លោក Phil Robertson នាយករងនៃអង្គការ HRW ប្រចាំតំបន់អាស៊ី បាននិយាយនៅក្នុងសេចក្តីថ្លែងការណ៍មួយនៅថ្ងៃទី៩ខែមិថុនានេះថា រដ្ឋាភិបាលថៃបានបង្អែរបង្អង់ក្នុងការស្នើឲ្យកម្ពុជាស៊ើបអង្កេតលើករណីនេះ ខណៈដែលរដ្ឋាភិបាលកម្ពុជាមិនបានបង្ហាញការចាប់អារម្មណ៍ដោយយកលេសថា រដ្ឋាភិបាលថៃត្រូវតែស្នើសុំជាមុនសិន មុននឹងខ្លួនអាចបើកការស៊ើបអង្កេតទៅលើករណីនេះ ដែលអង្គការ HRW ចាត់ទុកថា ជា«ឧក្រិដ្ឋកម្មដ៏ច្បាស់ក្រឡែត កើតឡើងក្នុងពេលថ្ងៃ តាមដងផ្លូវក្នុងទីក្រុងភ្នំពេញ»។
កាលពីថ្ងៃទី៤ខែមិថុនា លោក Wanchalerm Satsaksit ដែលគាំទ្រលទ្ធិប្រជាធិបតេយ្យ និងរិះគន់រដ្ឋាភិបាលយោធាថៃដឹកនាំដោយលោកនាយករដ្ឋមន្ត្រីប្រាយុទ្ធ ចាន់អូចារ ត្រូវបានរាយការណ៍ថា ត្រូវបានមនុស្សមួយក្រុមចាប់ពង្រត់តាមរថយន្តពណ៌ខ្មៅ ម៉ាក Toyota Highlander នៅវេលាម៉ោងជិត៥ល្ងាច នៅក្បែរខុនដូដែលលោកស្នាក់នៅក្នុងខណ្ឌជ្រោយចង្វារ រាជធានីភ្នំពេញ។
សកម្មជនថៃវ័យ៣៧ឆ្នាំរូបនេះ បានមកស្នាក់នៅលាក់ខ្លួនក្នុងប្រទេសកម្ពុជា ក្រោយពីមានរដ្ឋប្រហារយោធាក្នុងប្រទេសថៃកាលពីខែឧសភាឆ្នាំ២០១៤។ នេះបើយោងតាមអង្គការ HRW។
កាលពីខែមិថុនាឆ្នាំ២០១៨ លោក Wanchalerm Satsaksit ក៏ត្រូវបានអាជ្ញាធរថៃចោទប្រកាន់ពីបទល្មើសច្បាប់ស្តីពីឧក្រិដ្ឋកម្មតាមប្រព័ន្ធកំព្យូរទ័រដោយសារការរិះគនរបស់លោកប្រឆាំងរដ្ឋាភិបាលថៃតាមបណ្តាញហ្វេសប៊ុក។
លោក Charles Santiago ប្រធានក្រុម APHR បាននិយាយក្នុងសេចក្តីថ្លែងការណ៍របស់ខ្លួននៅថ្ងៃនេះថា អ្នកតំណាងរាស្ត្រក្នុងប្រទេសកម្ពុជានិងថៃគួរតែសួរនាំរដ្ឋាភិបាលនៃប្រទេសទាំងពីរក្នុងការស្វែងរកសកម្មជនថៃរូបនេះ។
លោកនិយាយថា៖ «ការណ៍ដែលសកម្មជននយោបាយថៃត្រូវបានចាប់ពង្រត់ដោយគឃ្លើននៅលើផ្លូវក្នុងរាជធានីរបស់កម្ពុជាគឺជាបញ្ហាគួរឲ្យព្រួយបារម្ភក្រៃលែង»។
ក្នុងរយៈពេលប៉ុន្មានឆ្នាំថ្មីៗនេះ អាជ្ញាធរក្នុងប្រទេសកម្ពុជា ថៃ វៀតណាម និងម៉ាឡេស៊ីត្រូវបានចោទប្រកាន់ថា បានសហការគ្នាក្នុងការចាប់ខ្លួននិងប្រគល់ត្រឡប់មកវិញនូវអ្នករិះគន់ដែលព្យាយាមគេចទៅលាក់ខ្លួនក្នុងប្រទេសណាមួយក្នុងចំណោមប្រទេសទាំងនេះ។ ប្រទេសកម្ពុជាបានប្រកាសថា ខ្លួននឹងស៊ើបអង្កេតករណីបាត់ខ្លួនសកម្មជនថៃរូបនេះ។ នេះបើយោងតាមកាសែត The Nations របស់ថៃដែលបានចុះផ្សាយនៅថ្ងៃអង្គារនេះ។
កាសែតដដែលនេះក៏បានរាយការណ៍ដែរថា នាយករដ្ឋមន្ត្រីថៃ លោកប្រាយុទ្ធ ចាន់អូចារបាននិយាយថា លោកបានត្រៀមខ្លួនសហការជាមួយទីភ្នាក់ងារពាក់ព័ន្ធក្នុងការស៊ើបអង្កេតដើម្បីស្វែងរកសកម្មជនថៃនេះដែរ។
លោក Phil Robertson នៃអង្គការ HRW និយាយថា រដ្ឋាភិបាលកម្ពុជាត្រូវតែបន្តការស៊ើបអង្កេតប្រកបដោយតម្លាភាព ម៉ត់ចត់ និងឥតលម្អៀងដើម្បីឲ្យដឹងការណ៍ពិតដែលបានកើតឡើងចំពោះលោក Wanchalerm Satsaksit៕
