ភ្ជាប់​ទៅ​គេហទំព័រ​ទាក់ទង

ក្រុមសិទ្ធិមនុស្ស​និយាយថា​ជនភៀសខ្លួន​រូហិងគ្ហា ​ត្រូវ​អាជ្ញាធរថៃ​បញ្ជូនចោល​ក្នុង​សមុទ្រ


ជន​ភៀស​​ខ្លួន​​រូហិងគ្ហា​(Rohingya)​ធ្វើដំណើរ​តាម​ទូក​ ត្រូវបាន​សង្គ្រោះ​នៅ​ជិត​កំពង់ផែ​ Aceh Besar, ប្រទេស​ឥណ្ឌូនេស៊ី នៅថ្ងៃ​ទី​១៦​ខែ​កុម្ភះឆ្នាំ២០១១។

ក្រុមសិទ្ធិ​មនុស្ស​នាំ​មុខ​គេ​មួយ​និយាយ​ថា​មាន​ទូក​ជិះ​ដោយ​ជន​ភៀស​ខ្លួន​ រូហិងគ្ហា​( Rohingya)ចំនួន​១០​គ្រឿង​បាន​បើក​បរ​ចេញពី​ប្រទេស​បង់ក្លាដេស​កាល​ពី​ប៉ុន្មាន​សប្ដាហ៍​ថ្មី​ៗ​កន្លង​ទៅ​នេះ ដោយ​ជន​ទាំង​នោះ​សង្ឃឹម​ថា​នឹង​អាច​ទៅ​ដល់​ប្រទេស​នៃ​តំបន់​អាស៊ី​អាគ្នេយ៍។ ក្រុមការ​ពារ​សិទ្ធិ​មនុស្ស​នោះ​និង​ក្រុម​ប្រឹក្សាមេ​ធាវី​របស់​ប្រទេស​ថៃ​អំពាវ​នាវ​ឲ្យ​ជន​ភៀស​ខ្លួន​ រូហិងគ្ហា​ទាំង​នោះ​ត្រូវ​បាន​គេ​ផ្ដល់​នូវ​ច្បាប់​ការ​ពារ​ខ្លួន​សម​រម្យ​និង​ជំនួយ​ផ្សេងៗ។

ជនភៀស​ខ្លួន​អម្បូរ​រូហិងគ្ហា ​រាប់​ពាន់​នាក់​មក​ពី​រដ្ឋ ​អារាកាននៃ​ប្រទេស​ភូមា​និង​មក​ពី​ប្រទេស​បង់ក្លាដេស​បាន​រត់​ចេញ​រាល់ៗ​ឆ្នាំ​ពី​ការធ្វើ​ទុក្ខ​បុក​ម្នេញ​នៅ​ក្នុង​ប្រទេសភូមា​ហើយ​នឹង​ដោយ​សារភាព​ក្រី​ក្រ​តោក​យ៉ាក ​នៅ​ក្នុង​ប្រទេស ​បង់ក្លាដេស។

ជនភៀស​ខ្លួន​រូហិងគ្ហា ​ជាង​២៥.០០០​ពាន់​នាក់​រស់​នៅ​ក្នុង​ជំរំ​នៃ​ប្រ​ទេស​បង់ក្លាដេស​គ្រប់​គ្រង​ដោយ ​ឧត្តម​ស្នង​ការ​ ​អ.ស.ប​ ខាង​ជន​ភៀស​ខ្លួន។

តែ​មនុស្ស​២០០.០០០​ថែម​ទៀត​រស់​នៅ​ក្នុង​ស្ថាន​ភាព​ស្មោកគ្រោគ​គ្មាន​អនា​ម័យ​នៅ​ក្រៅ​ជំរំ​ដែល​គ្មាន​ជំនួយ។ ​នៅ​ជិត​ខាង​ក្នុង​រដ្ឋ​អារាកាន​ នៃ​ប្រទេស​ភូមា​ក្រុម​ការពារសិទ្ធិមនុស្ស និយាយ​ថា​ក្រុមរូហិងគ្ហា​ជា​សហគមន៍​អ៊ីស្លាមកំពុង​ប្រ​ឈម​មុខនឹង​ការគំរាម​ពី​បទបំពាន​ផ្សេងៗ​ដោយ​យោ​ធា​ភូមា។

ក្រោយ​ពី​រដូវ​ភ្លៀង​រាល់​ឆ្នាំ​ក្រុម​រូហិងគ្ហា​ឲ្យ​លុយ​ទៅ​ឈ្មួញ​រត់ពន្ធ​មនុស្ស​ដើម្បី​ពង្រត់ខ្លួន​តាម​ទូក​ ឆ្ពោះ​ទៅ​កាន់​តំបន់​អាស៊ី​អាគ្នេយ៍ ​ដោយ​សង្ឃឹម​ថា​នឹង​មាន​ជីវភាព​ប្រសើរ។​ ឆ្នាំ​នេះក៏​មិន​ខុសពី​ឆ្នាំ​មុនៗ​ដែរ។

អង្គការតាម​ឃ្លាំ​មើល​សិទ្ធិមនុស្ស​Human​ Rights ​Watch ​និយាយ​ថា​មាន​ទូក​រហូត​ដល់ ​១០​គ្រឿង​បើក​បរ​ចេញ។ ​ក្នុង​សប្ដាហ៍​នេះ​ ប៉ូលិស​សមុទ្រ​ឥណ្ឌូនេស៊ី​ បាន​ស្រោច​ស្រង់​ជន​ រូហិងគ្ហា​ ១២៩នាក់​ដែល​ទូក​របស់​ខ្លួន​រសាត់​ជា​ច្រើន​ថ្ងៃ​ក្រោយ​ពី​ម៉ាស៊ីន​ឈប់​ដើរ។

លោក​ Phil ​Robertson នាយក​រង​របស់​អង្គ​ការ​ Human ​Rights​ Watch​ផ្នែក ​អាស៊ី​ថ្លែង​ថា​មាន​ទូក​យ៉ាង​តិច​៣គ្រឿង​បាន​ចូល​ចត​ក្នុង​តំបន់​ភាគខាង​ត្បូង​ប្រទេស​ថៃ​ដោយ​មាន​មនុស្ស​ជិះ​ជាង​២២០​នាក់។

«ជនភៀស​ខ្លួន​ដែល​ចូល​មក​ដល់​ដី​ឆ្នេរ​សមុទ្រ​របស់​ប្រទេស​ថៃ​សម​នឹង​ទទួល​យក​ហើយ​ថែទាំ។ យើង​មាន​ការព្រួយ​បារម្ភ​ធំ​ហើយ​ខ្ញុំ​សុំ​និយាយ​បន្ថែម​ថា​មាន​ទូក​ជា​ច្រើន​គ្រឿង​ទៀត​ នៅ​លើ​សមុទ្រ​ហើយ​គេ​មិន​ដឹង​ច្បាស់​ថា​តើ កង​កម្លាំង​ជើង​ទឹក​ថៃ​ចូល​ទៅ​ចាប់​ទូក​ទាំង​នោះ​ឬ​ក៏​គេ​ធ្វើ​ម្ដេច? គេ​បាន​និយាយ​ប្រាប់​យើង​ថា ​មាន​ទូក​៩​ទៅ​១០​គ្រឿង​ចាក​ចេញ​ពី​ប្រទេស​ បង់ក្លាដេស»។

នៅ​អតីត​កាល កង​កម្លាំង​ជើង​ទឹក​ថៃ​ បាន​ត្រូវ​គេ​ទិទៀន​ថា​បាន​បង្ខំ​ទូក​ដឹក​ក្រុម​រូហិងគ្ហា​ឲ្យ ​ត្រឡប់​ទៅ​កាន់​សមុទ្រ​ធំ​វិញ។

កាល​ពី​សប្ដាហ៍​មុន​អាជ្ញាធរ​ឥណ្ឌា​បាន​ស្រោច​ស្រង់​ក្រុម​រូហិងគ្ហា ​៩១​នាក់​នៅ​លើ​សមុទ្រ​អង់ដាម៉ង។ ​សេចក្ដី​រាយការណ៍​ជា​ច្រើន​និយាយ​ថា​ជន​ទាំង​នោះ​អត់​ទឹក​ អត់​អាហារ​ និង​ខ្សោះ​ទឹក​ក្នុង​ខ្លួន។ ក្រុមជនភៀស​ខ្លួន​និយាយ​ថា​កង​កម្លាំង​ជើង​ទឹក​ថៃ​បាន​បង្ខំ​ខ្លួន​ឲ្យ​ចេញ​ទៅ​សមុទ្រ​ធំ​វិញ។ អង្គការ ​Human ​Rights ​Watch ​និយាយ​ថា​ការស្រាវជ្រាវ​របស់​ខ្លួន​ដូច​ពាក្យ​របស់​ក្រុម​ជន​ភៀស​ខ្លួន។

តែ​មន្ដ្រី​ថៃ​បាន​និយាយ​ប្រាប់​អ.ស.ប​ថា​ក្រុម​រូហិងគ្ហា​មិន​ត្រូវ​គេ​ធ្វើ​បាប​ទេ។ ក្រសួង​ការបរទេស​ថៃ​និយាយ​ថា ក្រុមរូហិងគ្ហា​អះអាង​ថា​ខ្លួន​ជា​ជន​ជាតិ​ភូមា​ហើយ​អាជ្ញាធរ​ថៃ​បាន​បញ្ជូន​ខ្លួន​ឲ្យ​ទៅ​កាន់​តំបន់​ឆ្លង​ព្រំដែន​នៅ​ក្នុង​ខេត្ដ​រាណុង។ ​ក្រសួង​នោះ ​និយាយ​ថា​ខ្លួន​មិន​ដឹង​ថា​តើ ​ក្រុម​នោះ​ធ្វើ​ដំណើរ​តាម​មធ្យោបាយ​ណា​ទេ​ក្រោយ​ពី​ចាក​ចេញ​ដែន​ដី​ថៃ។ ក្រសួង​អន្ដោ​ប្រវេសន៍​ថៃ​បានឃុំឃាំង​ក្រុម​រូហិងគ្ហា​១៣៥​នាក់​មាន​ក្មេង​ផង​ដែរ​ដែល​បាន​ជិះ​ទូក​ពីរ​គ្រឿង​ ចូលចត​នៅ​តំបន់​ក្បែរ​ឆ្នេរ​សមុទ្រភាគ​ខាង​ត្បូង។

ក្រុម​ប្រឹក្សា​មេ​ធាវី​របស់​ប្រទេស​ថៃ​និយាយ​ថា​ច្បាប់​ផ្ដល់​សិទ្ធិ​របស់​ក្រុម​រូហិងគ្ហា​ត្រូវ​ទទួល​ស្គាល់ ​ហើយ​មិន​ត្រូវ​បញ្ជូន​ជន​ទាំង​នោះ​ដោយ​ស្វ័យប្រវត្ដិទេ។ លោក​ សុរា​បុង​ គង់ចានទុក ​ប្រធាន​អនុគណៈកម្មាធិការ​របស់​ក្រុម​ប្រឹក្សា​ខាង​ក្រុម​អម្បូរ​ជនជាតិ​ភាគ​តិច​និង​កម្មករ​ចល័ត​និយាយ​ថា​ករណី​របស់​ពួកគេ​គួរ​តែ​ដើរ​តាម​រយៈ​ដំណើរការ​តុលាការ។

លោក ​សុរប៉ុង​ ថ្លែង​ថា​ មន្ដ្រី​អន្ដោ​ប្រវេសន៍​បាន​បំពាន​លើ​ច្បាប់​ដោយបាន​បង្ខំ​ឲ្យ​ជន​អន្ដោ​ប្រវេសន៍​វិល​ទៅ​សមុទ្រ​ធំ​វិញ។​ លោក​ថ្លែង​ទៀត​ថា​បើ​ជន​ទាំង​នោះ​ចូល​មក​ក្នុង​ដែន​ដី​ថៃ​ដោយ​ខុស​ច្បាប់​ មន្ដ្រី​អន្ដោ​ប្រវេសន៍​តម្រូវ​ឲ្យ​អនុវត្ដ​វិធាន​ការ​ត្រឹមត្រូវ ​ដោយ​ ទាក់​ទង​ប្រាប់​ប្រទេស​ដើម​ដូច​ជា​ប្រទេស​បង់ក្លាដេស​ជាដើម។

សមាគម​ប្រទេស​អាស៊ាន ​បាន​រៀប​ចំ​ឲ្យ​មាន​វិធានការ​ហៅ​យន្ដការ​ក្រុង​បាលី​ដែល​ជា​យន្ដការ​ដើម្បី​ដោះស្រាយ​បញ្ហា​ការជួញ​ដូរ​មនុស្ស ​និង​ពង្រត់​មនុស្ស​ឆ្លងដែន។ តែ​ក្រុមការ​ពារ​សិទ្ធិ​មនុស្ស​និយាយថា​វិធានការ​នោះមិន​បាន​ដំណើរ​ការ​ទៅ​មុខ​ទេ​ក្នុង​ការកាត់​បន្ថយ​វាសនា​របស់​ជន​ភៀស​ខ្លួន​ដូច​ជា​ក្រុម​រូហិងគ្ហា​ជាដើម៕

ប្រែ​សម្រួល​ដោយ​ អ៊ូ​ ធួក

XS
SM
MD
LG