ភ្ជាប់​ទៅ​គេហទំព័រ​ទាក់ទង

អតុល្យភាព​ភេទ​នាំ​ឲ្យ​មាន​ការ​ជួញដូរ​មនុស្ស​នៅ​ចិន

  • Elizabeth Lee

ក្មេង​ប្រុស​ម្នាក់​កាន់​រូប​ថត​ម្តាយ​របស់​ខ្លួន​ក្នុង​ពេល​ចូល​រួម​ជាមួយ​​សមាជិក​គ្រួសារ​ដទៃ​ទៀត​ក្នុង​យុទ្ធនាការ​ស្វែង​រក​ម្តាយ​​​​ដែល​បាន​បាត់​ពី​ផ្ទះ​របស់​​នៅ​ក្នុង​​ក្រង​ស៊ីយ៉ាន (Xian) ខេត្ត​​សានស៊ី (Shaanxi) ភាគ​ខាង​ជើង​ប្រទេស​ចិន។

ស្រ្តី និង​កុមារ​នៅ​ប្រទេស​ចិន ​និង​ប្រទេស​ជិតខាង​ត្រូវ​បាន​ជួញដូរ​នៅ​ប្រទេស​ចិន។ ស្រ្តីទាំង​នោះ​ជា​ជន​រង​គ្រោះ ដោយ​សារ​ការ​បង្ខំ​ឲ្យ ធ្វើការ​ ឬ​ដោយសារ​ការ​កេង​យក​ផល​ប្រយោជន៍​ឲ្យ​បម្រើ​ភេទ។ ស្រ្តី និង​នារី​ខ្លះត្រូវ​បាន​បង្ខំ​ឲ្យ​រៀបការ។

មាន​ក្មេង​ប្រុស​ស្រី​ដែល​បាត់​ខ្លួន​ឈឹង​ដោយ​គ្មាន​ដាន។ លោក​ស្រី ឆៃ លីង អ្នក​បង្កើត​អង្គការ​មួយ​ឈ្មោះ កេ្មង​ស្រី​ទាំង​អស់​អនុញ្ញាត (All Girls Allowed) បាន​ធ្វើ​ការ​ជា​មួយ​អង្គការ​ស្ម័គ្រ​ចិត្ត​ជា​ច្រើន ដើម្បី​លើក​ស្ទួយ​ឲ្យ​មាន​ការ​យល់​ដឹង ហើយ​ជួយក្រុម​គ្រួសារ​តាម​រក​កូនៗ​របស់​ខ្លួន។ លោក​ស្រី​ ឆៃ លីង​ថ្លែង​ថា​ កុមារជា​ច្រើន​ដែល​បាត់​ខ្លួន​ត្រូវ​គេ​លួច​ចាប់យក​ទៅ​លក់។ លោក​ស្រី​បន្ត​ថា៖

«នៅ​ផ្ទះ​បន ​គេ​ទិញ​ស្រ្តី និង​នារី​ឲ្យ​ចូល​ធ្វើជា​ទាសករ​បម្រើ​ភេទ។ មានទី​ផ្សារ​ជួញ​ដូរ​ស្រ្តី​ធំ​ណាស់​នៅ​ប្រទេស​ចិន។ ហើយ​មាន​គ្រួសារ​ខ្លះ​ចង់​រក​ប្រពន្ធ​ឲ្យ​កូ​ន​ប្រុសរបស់​គេ»។

តាម​ទំនៀម​ទម្លាប់​វប្បធម៌ចិន​ គេ​ឲ្យ​តម្លៃ​ច្រើន​ទៅ​លើកូន​ប្រុស។ ពេល​គេ​ធំ​ឡើង​មនុស្ស​ប្រុស ត្រូវ​គេ រំពឹង​ថា មាន​ប្រពន្ធ ហើយ​រស់​នៅ​ជា​មួយ​ឪពុក​ម្តាយ និង​ថែទាំ​ឪពុក​ម្តាយ​ ហើយ​បន្ត​ប្រើ​ឈ្មោះ​ត្រកូល។ លោក​ស្រី ឆៃ ថ្លែង​ថា ពេល​ដែល​ស្រ្តី​មាន​ផ្ទៃពោះ​បាន​កូន​ស្រី៖

«គ្រួសារ​ខ្លះ​បាន​សម្រេច​ពន្លូត​កូន​ស្រី​ចោល​ ឬក៏​បោះបង់​ចោល​កូន​ស្រី​ ឬ​ក៏​លក់​កូន​ខ្ចី​ស្រី​របស់​ខ្លួន។ មាន​បុរស​ក្មេងៗ​ជិត​៤០​លាន​នាក់​ហើយ​នៅ​ប្រទេស​ចិន ដែល​នឹង​មិន​អាច​រក​គូ​ស្រករ​បាន​ ដូច្នេះ​ជា​លទ្ធផល​ការ​ជួញ​ដូរ​ភេទ​ លក់​ស្រ្តី និង​ក្មេង​ស្រី ក្លាយ​ទៅ​ជា​បញ្ហា​មួយ​ធំ​នៅ​ក្នុង​ប្រទេស​ចិន»។

ក្រុម​សកម្ម​ជន​ការពារ​សិទ្ធិ​មនុស្ស និយាយ​ថា គោល​ការណ៍​នយោបាយ​ចិន​ មាន​កូន​មួយ​ក្នុង​មួយ​គ្រួសារ បានជំរុញឲ្យ​ចំនួន​កូន​ស្រី មាន​តិចជាង​កូន​ប្រុស​ដែល​ធ្វើឲ្យមាន​បញ្ហា​ខ្លាំង។ លោក​ស្រី ឆៃ និយាយ​ថា ក្មេង​ស្រី​ខ្លះ ដែល​បាត់​ខ្លួនអាច​ត្រូវ​គេ​ចាប់​យក​ទៅ​លក់ ឲ្យ​គ្រួសារ​ដែលត្រូវ​ការ​ក្មេង​ស្រី សម្រាប់​បម្រុង​ទុក​រៀបការ។ ចំណែក​ក្មេង​ប្រុស​វិញ​ក៏​គេ​លក់​ទៅ​ឲ្យ​គ្រួសារ​ដែល​អត់​មាន​កូន​ប្រុសសម្រាប់​ទទួល​មរតក​ដែរ។

ប៉ុន្តែ​ក្រុម​អ្នក​ស្ម័គ្រ​ចិត្ត​ធ្វើការ​មិន​សូវ​បាន​លឿន​ទេ។ អង្គការ​ All Girls Allowed នេះ​និយាយ​ថា កុមារី អាយុ​៣ឆ្នាំ​ម្នាក់​ ឈ្មោះ លីតថល ប៊ីន (Little Bean) ត្រូវ​បាន​លួច​ចាប់​យក​ទៅលក់ កាល​ពីខែ​មិថុនា​មុន។ ក្រុម​អ្នក​ធ្វើ​ការ​ស្ម័គ្រ​ចិត្ត​បាន​ជួយ​ចេញ​ផ្សាយ​ប័ណ្ណ​ប្រកាស​មាន​បិត​រូប​ថត​កុមារី​នោះ។ ក្មេង​នោះ ត្រូវ​គេ​រក​ឃើញ​៧​ខែ ក្រោយ​មក ហើយ​បាន​ជួប​ជុំ​ជា​មួ​យ​ឪពុក​ម្តាយ​វិញ។

លោក​ស្រី​ អ៊ែនឌ្រា ប៊ើរថុន (Andrea Bertone) ជា​នាយក​គេហទំព័រ​ HumanTrafficking.Org និយាយ​ថា​ អតុល្យភាព​ភេទ​នៅ​ប្រទេស​ចិន​ធ្វើ​ឲ្យ​មាន​ការ​ប៉ះពាល់​ដល់​ប្រទេស​ជិត​ខាង​ចិន។ លោក​ស្រី​មាន​ប្រសាសន៍​ថា៖

«មាន​ស្រ្តី​ច្រើន​ណាស់​ដែល​គេ​បាន​នាំ​ពី​ប្រទេស​វៀតណាម​ ឡាវ និង​កូរ៉េ​ខាង​ជើង​ ទៅ​ចិនដើម្បី​បង្ខំ​ឲ្យ​រៀបការ ហើយ​ភាគ​ច្រើន​គឺ​នៅ​តំបន់​ជនបទ។ ស្ត្រី ឬ​ក្មេង​ដែល​គេ​នាំ​ពី​ប្រទេស​ជិត​ខាង​ឆ្លង​ដែន​ចូល​ទៅ​ចិន ដើម្បី​ធ្វើការ​ ឬ​រៀបការ​នៅតំបន់​ជនបទ​នោះ ទៅ​តាម​រយៈ​បណ្តាញ​តូច​មួយ​នៃ ក្រុម​មួយ​ដែល​ដឹង​ពី​របៀប​បត់​បែន​ឆ្លង​ដែន​ ដោយ​ចេះ​សូក​ប៉ាន់ ក្រុម​មន្ត្រី តាម​ព្រំដែន​យ៉ាង​ងាយ​ស្រួល»។

លោក​ស្រី ប៊ើរថុន ថ្លែង​ថា ក្រុម​អ្នក​ជួញ​ដូរ​មនុស្ស​ក្នុង​ប្រទេស​ចិន អាច​ជា​សមាជិក​នៅក្នុង​បណ្តាញ​តូចៗ​ ឬ​នៅក្នុង​បណ្តាញ​ឧក្រិដ្ឋកម្ម​រួមគ្នា​មួយ។

ទោះបី​ជា​មាន​ការចាប់​បានអ្នក​លួច​ខ្លះក្តី ក៏តម្រូវការ​ស្រ្តី និងក្មេងៗ​នៅ តែបន្ត​មាន ​ហើយ​ការ​លក់ដូរ​មនុស្ស​ក៏​ត្រូវ​គេ​រំពឹង​ថា​ នឹង​បន្ត​រីក​រាល​ដាល​នៅ​ក្នុង​ប្រទេស​ចិន ​និង​ក្នុង​ទូទាំង​តំបន់​ដែរ។

ប្រែ​សម្រួល​ដោយ​ នៅ សារីម

XS
SM
MD
LG