ភ្ជាប់​ទៅ​គេហទំព័រ​ទាក់ទង

ការ​បះបោរ​នៅ អេហ្ស៊ីប​ជំរុញចិត្ត​ប្រជាពលរដ្ឋ​ប៉ាឡេស្ទីន


បាតុករ​ប៉ាឡេស្ទីន​ម្នាក់​កាន់ស្បែកជើង​គ្រវី​ ខណៈដែល​បាតុករ​ដទៃ​ទៀតកាន់ទង់ជ័យប៉ាឡេស្ទីន​ និងអេហ្ស៊ីប ក្នុងអំឡុង​ពេល​ធ្វើបាតុកម្ម​ទាមទារឲ្យលោកប្រធានាធិបតី​អេហ្ស៊ីប ហូស្នី មូបារ៉ាក់ ចុះចេញពីតំណែង។

ទីក្រុងយេរូសាឡឹម៖ បាតុកម្ម​ដ៏​មហិមា​ ហើយ​នឹង​ការចលាចល​នយោបាយ​នៅ​អេហ្ស៊ីប​ត្រូវ​បាន​ទទួល​សាទរ​ពី​សំណាក់​ប្រជាពលរដ្ឋ​ប៉ាឡេស្ទីន​នៅ​ទីក្រុង​ហ្សេរុយសាឡឹម​ខាងកើត​នា​តំបន់​ West Bank និង​នៅ​តំបន់​ហ្កាហ្សាស្រ្ទីព ​ថា​ជា​ការដាស់​សតិអារម្មណ៍នៃពិភព​អារ៉ាប់​ថ្មីមួយ។ ​ក្រុម​អ្នកវិភាគ​នៅ​មជ្ឈឹម​បូព៌ា​និយាយ​ថា ចលាចល​នោះ អាច​ផ្តល់​កម្លាំង​ដល់​មនុស្ស​ស្រករ​ថ្មីនិងក្មេង​ជំនាន់ក្រោយ​ ដែល​ជា​មេដឹកនាំ​ប្រជាពលរដ្ឋប៉ាឡេស្ទីន​ឲ្យ​ប្រឹង​ស្វែង​រក​ទាំង​សេចក្តី​ថ្លៃថ្នូរ​ផ្ទាល់​ខ្លួន ហើយ​នឹង​អនាគតមួយ​ដែល​មាន​លទ្ធិ​ប្រជាធិបតេយ្យ​ច្រើន​ជាង​មុន។

ខណៈ​ដែល​តន្ត្រី​អារ៉ាប់​បន្លឺ​ឡើង​ខ្ទរ​អាកាស ​ក្រោយ​ពេលព្រលប់​នៅតាម​ផ្លូវមមាញឹក និង​មាន​ពណ៌​ចម្រុះ នៅខាងកើត​ទីក្រុង​យេរូសាឡឹម​នោះ រឿង​សំខាន់​ជាង​គេ​ក្នុង​ការជជែក​គ្នាក្នុង​បណ្តា​ជនជាតិ​ប៉ាឡេស្ទីន​នៅ​ទីនោះ គឺការ​វិវត្ត​គួរ​ឲ្យ​ភ្ញាក់​ផ្អើល​នៅ​អេហ្ស៊ីប។

ប្រជា​ពលរដ្ឋ​អេហ្ស៊ីប​ដែលងើប​បះបោរ​ឡើង​ប្រឆាំង​នឹង​ប្រធានាធិបតី ហូស្នី មូបារ៉ាក់​ ដែល​កាន់​អំណាច​ជាង​បី​ទសវត្សរ៍ ​និង​ការសម្រេច​របស់​លោក​មិន​ឈរ​ឈ្មោះ​បោះឆ្នោត​ឡើង​វិញ​ ​ជាការធ្វើ​ឲ្យ​ចាប់អារម្មណ៍ខ្លាំ​ង​ និងគួរ​ឲ្យ​ភ្ញាក់​ផ្អើលសម្រាប់​ប្រជាពលរដ្ឋ​ជា​ច្រើន​នៅ​ទីក្រុង​យេរូសាឡឹម​ខាង​កើត។

«ប្រជា​ពលរដ្ឋ​ប៉ាឡេស្ទីន​មើល​ទូរទស្សន៍​មិន​ដាក់​ភ្នែក​ទេ ​ហើយ​តាមដាន​ព័ត៌មាន​គ្រប់​នាទី»។

លោក Mahdi Abdul Hadi ជា​ប្រធាន​របស់​បណ្ឌិត​សភា​សង្គម​ប៉ាឡេស្ទីន​សម្រាប់​ការសិក្សា​កិច្ចការ​អន្តរជាតិនៅ​ទីក្រុង​យេរូសាឡឹម​ខាង​កើត ​ហើយ​ដែល​គេ​ចាត់​ទុក​ថា​ជា​អ្នកវិភាគ​នយោបាយនាំ​មុខ​គេនៅ​ក្នុង​តំបន់។ លោក​ថ្លែង​ថា​ ​ការងើប​បះបោរ​ឡើង​របស់​ក្រុម​យុវជន​អារ៉ាប់​ដែល​ស្វែង​រក​ឲ្យ​បាន​ការ​រស់​នៅ​ប្រសើរ​ឡើង​នោះ ​ហើយ​នឹង​អនាគត​មួយ​មាន​លទ្ធិ​ប្រជា​ធិបតេយ្យ​ច្រើន​ជាង​មុន​នោះ គឺ​តំណាង​ការផ្លាស់​ប្តូរ​ក្នុង​ជំនាន់​ក្រោយនៅ​មជ្ឈឹម​បូព៌ា។

«ការ​ផ្ទុះឡើង​នៅ​ទីនេះ ហើយ​គ្មាន​នរណា​អាចមាន​ផែនការ ថា​វា​នឹង​នាំ​យើង​ឆ្ពោះ​ទៅ​ណា​ទេ​ពីព្រោះ វាមិន​មែន​ជា​ទំនៀម​ទម្លាប់ ​ពីព្រោះ វាមិន​មែន​ជា​រឿង ដែល​ធ្លាប់​មាន​ពីមុន។​ រឿង​នេះមិន​មែន ជា​រឿង​ដែល​ក្រុម​វរជន​និង​អ្នក​ជំនួញធ្លាប់​បាន​គិត​នោះ​ទេ។ ក្រុម​យុវជន​ចង់​បាន​ភាព​ថ្លៃថ្នូរ​របស់​គេ។​ នេះ​ប្រហែល​ជា​របៀប​ថ្មី មួយ​សម្រាប់​ពណ៌នា​ពី​លទ្ធិ​ប្រជា​ធិបតេយ្យ»។

ប្រជាពលរដ្ឋ​ប៉ាឡេស្ទីន​ជា​ច្រើន ចាត់ទុក​លោក មូបារ៉ាក់​ជា​សម្ព័ន្ធមិត្ត​មួយ​រូប មកពី​តួនាទី​របស់​លោកក្នុង​ការចរចា​សន្តិភាព​ជាមួយ អ៊ីស្រាអែល ហើយ​នឹង​ក្នុង​ការស្វែង​រក​ការផ្សះផ្សារ​ក្នុង​បណ្តា​បក្ស​ប៉ាឡេស្ទីន​ដែល​ប្រកួត​ប្រជែង​គ្នា​នៅ​ West Bank ហើយ​នឹង​នៅ​ហ្កាហ្សាស្រ្ទីព។ លោក​Dimitri Diliani ជា​សមាជិក​មួយ​រូប​របស់​ក្រុមប្រឹក្សា​បដិវត្តន៍​ហ្វាតា​នៅ​យេរូសាឡឹមខាង​កើត។​ លោក​ថ្លែង​ថា​ប្រជា​ពលរដ្ឋ​ប៉ាឡេស្ទីន ​មាន​អា​រម្មណ៍​ច្របូក​ច្របល់​មិន​ស្រឡះ​ពី​ការដែល​កើត​មាន​ឡើង​នៅ​អេហ្ស៊ីប»។

«យើង​គោរព​មតិ​របស់​ប្រជាពលរដ្ឋ ហើយ​នឹង​ការព្រួយ​បារម្ភ ពិ​សេស​សេចក្តី​ត្រូវ​ការ​របស់​គេ​តែ ក្នុង​ពេល​ជា​មួយ​គ្នា​នោះ​ដែរ យើង​កោត​សរសើរ​ជំហរ​របស់​លោក​មូបារ៉ាក់ ក្នុង​ដំណើរ​ការ​សន្តិភាព​ការ​គាំទ្រ​របស់​លោក​ក្នុង​ដំណើរ​ការ​នេះ​ជា​ច្រើន​ឆ្នាំ​មក​ហើយ»។

ម៉ាមូឌ មុណា​ ជា​ជនជាតិ​ប៉ាឡេស្ទីនអាយុ២៨ឆ្នាំ ដែល​ធ្វើការ​នៅក្នុង​ហាង​លក់​សៀវភៅ​របស់​គ្រួសារ​ខ្លួន​នៅ​ទីក្រុង​យេរូសាឡឹម​ខាង​កើត។ ​លោក​សង្ឃឹម​ថា​ កម្លាំង​នៃ​ការផ្លាស់​ប្តូរ​នៅ​ក្នុង​ពិភព​អារ៉ាប់ និង​នាំឆ្ពោះ​ទៅ​រក​អនាគត​មួយ ប្រសើរ​ជាង​មុន​សម្រាប់​ប្រជា​ពលរដ្ឋ​នៅទូទាំង​តំបន់។

លោក ​Mahdi Abdul Hadi ថ្លែង​ថា ​ការបះបោរ​របស់​ប្រជា​ពលរដ្ឋ​នៅ​អេហ្ស៊ីប ជា​ការ​បណ្តាល​ចិត្ត​ឲ្យ​មាន​ការ​ទុកចិត្ត ក្នុង​បណ្តា​ក្រុម​យុវជន​ក្នុង​ការបញ្ចេញ​មតិ​ជា​សាធារណៈរបស់​គេ ក្រោយ​ពី​ខ្លាច​មិន​ហ៊ាន​បញ្ចេញ​គំនិត​របស់​ខ្លួន​មក។

«អ្វី​ជា​វិជ្ជមាន​នោះ គឺ​ការភ្ញាក់​ស្មារតី។ ​អ្វី​ជា​វិជ្ជមាន​គឺថា ​ប្រជា​ពលរដ្ឋ បាន​យល់​ដឹង​ពី​ការពិត។ ​ការ​ដែល​សំខាន់​នោះ គឺ​វប្បធម៌​ភ័យ​ខ្លាច​នោះ ​ស្លាប់បាត់​ទៅ​ហើយ។ គ្មាន​នរណាខ្លាច​ទៀត​ទេ ក្នុង​ការបញ្ចេញ​មតិ​របស់​ខ្លួន ​បញ្ចេញ​ជំហរ និង​ជំនឿ​របស់​ខ្លួន​នោះ ហើយ គេ​ទាំងអស់​គ្នា​សុខចិត្ត​ទទួល​កម្មផល​ក្នុង​រឿង​នេះ​ ពិសេស​ក្មេងស្រករ​ក្រោយ»។

លោក​ Abdul Hadi និយាយ​ថា លោក​មាន​ជំនឿ​ថា ​ការបះប្រឆាំង​នឹង​រដ្ឋ​អំណាច​ផ្តាច់​ការ និង​បើក​សម័យ​ថ្មី​នៃ​សាមគ្គីភាព​របស់​ប្រជាពលរដ្ឋ​ប៉ាឡេស្ទីន ហើយ​នឹង​ជួយ​រៀបចំ​ផ្លូវ​សម្រាប់​ជំនាន់​ក្រោយ​នៃ​មេដឹក​នាំ​អារ៉ាប់​ដ៏​ថ្មីស្រឡាង៕

ប្រែ​សម្រួលដោយ ​នៅ សារីម

XS
SM
MD
LG