ប្រទេសកម្ពុជារកចំណូលបានចំនួនជាង៥៣លានដុល្លារពីការលក់សំបុត្រឱ្យភ្ញៀវទេសចរចូលទស្សនារមនីយដ្ឋានអង្គរក្នុងអំឡុងពេល១១ខែក្នុងឆ្នាំ២០១៥នេះ។
អាជ្ញាធរជាតិអប្សរាបានបញ្ជាក់ក្នុងសេចក្តីប្រកាសព័ត៌មាននៅថ្ងៃអង្គារនេះថា ចំណូលដែលបានមកនេះ បានកើនឡើងលើសឆ្នាំមុនចំនួន១,១៥ភាគរយ។
ដោយឡែកសម្រាប់តែខែវិច្ឆិកាកន្លងមកនេះចំណូលដែលទទួលបានគឺមានការកើនឡើងរហូតដល់៥,៧១ភាគរយបើប្រៀបធៀបនឹងខែដូចគ្នានេះក្នុងឆ្នាំ២០១៤។
អាជ្ញាធរជាតិអប្សរាបានឱ្យដឹងទៀតថាចំនួនភ្ញៀវទេសចរដែលចូលទៅទស្សនាមានចំនួនជិតពីរលាននាក់ហើយក្នុងរយៈពេល១១ខែនេះ។
កាលពីដើមខែវិច្ឆិកា រដ្ឋាភិបាលកម្ពុជាសម្រេចដកយកសិទ្ធិគ្រប់គ្រងរមនីយដ្ឋានអង្គរចេញពីក្រុមហ៊ុនលោកឧកញ៉ាសុខ គង់មកគ្រប់គ្រងដោយរដ្ឋាភិបាលដោយចាប់ផ្តើមពីដើមឆ្នាំ២០១៦តទៅបន្ទាប់ពីមានការតវ៉ាយ៉ាងច្រើនពីសាធារណជន។
ក្រុមការងារមួយដែលដឹកនាំដោយក្រសួងសេដ្ឋកិច្ចនិងហិរញ្ញវត្ថុកំពុងរៀបចំឯកសារដើម្បីផ្ទេរសិទ្ធិគ្រប់គ្រងនិងបង្កើតក្រុមហ៊ុនរដ្ឋមួយប៉ុន្តែនៅមិនទាន់ដឹងថានឹងអាចរៀបចំរួចរាល់នៅពេលណានោះទេ៕
