ជាផ្នែកមួយនៃយុទ្ធនាការរបស់លោកដើម្បីឈរឈ្មោះជាប្រធានាធិបតីមួយអាណត្តិទៀត អតីតប្រធានាធិបតីសហរដ្ឋអាមេរិកលោក Donald Trump និងសម្ព័ន្ធមិត្តរបស់លោកបានបង្ហាញយ៉ាងច្បាស់អំពីចក្ខុវិស័យនៃការដឹកនាំជាប្រធានាធិបតីជាលើកទីពីររបស់លោក ដែលកំណត់ដោយការប្រើប្រាស់ការពង្រឹងការអនុវត្តច្បាប់សហព័ន្ធដើម្បីដាក់ពិន័យលើសត្រូវនយោបាយរបស់លោក និងការរៀបចំរដ្ឋាភិបាលសហព័ន្ធឡើងវិញតាមវិធីដែលអាចធ្វើឱ្យការអនុវត្តការសម្រេចចិត្តគោលនយោបាយរបស់លោកមានប្រសិទ្ធភាពកាន់តែខ្លាំងឡើង សូម្បីតែគោលនយោបាយដែលគេមើលឃើញថាជាការងាកចេញទាំងស្រុងពីបទដ្ឋានបច្ចុប្បន្នក៏ដោយ។
ខណៈដែលសមាជិកគណបក្សប្រជាធិបតេយ្យស្ទើរតែទាំងអស់មានក្ដីបារម្ភអំពីការដឹកនាំលើកទីពីររបស់លោក Trump ដោយបានព្រមានថា ការដឹកនាំនេះនឹងដូចទៅនឹង «ការដឹកនាំបែបផ្ដាច់ការ» ប្រតិកម្មក្នុងចំណោមសមាជិកគណបក្សសាធារណរដ្ឋចំពោះការដឹកនាំលើកទីពីររបស់លោក Trump នេះមានភាពខុសៗគ្នាយ៉ាងខ្លាំង។ សមាជិកគណបក្សសាធារណរដ្ឋខ្លះបានលើកឡើងអំពីក្ដីបារម្ភ ចំណែកឯសមាជិកគណបក្សសាធារណរដ្ឋខ្លះទៀតចាត់ទុកវោហារសាស្ត្ររបស់លោក Trump ថាមិនសូវសំខាន់ដោយនិយាយថាក្ដីបារម្ភអំពីរឿងនេះដូចជាជ្រុលហួសហេតុពេក។
ទោះជាយ៉ាងណាក៏ដោយ ភាពខុសប្លែកគ្នាចម្បងគឺថាសមាជិកគណបក្សសាធារណរដ្ឋភាគច្រើនដែលបានបង្ហាញក្ដីបារម្ភអំពីទំនោរផ្ដាច់ការរបស់លោក Trump គឺលែងជាសមាជិកសភាតទៅទៀតឬក៏បានប្រកាសអំពីការចូលនិវត្តន៍របស់ពួកគេ ដែលនេះបង្ហាញថា ការប្រឆាំងចំពោះគោលបំណងដែលបង្ហាញឡើងរបស់លោក Trump ប្រហែលជាមិនមែនជាគោលជំហរដែលអាចការពារបាននៅក្នុងគណបក្សសាធារណរដ្ឋសម័យបច្ចុប្បន្ននេះទេ។
ការសងសឹកនិងការតាមផ្ដន្ទាទោស
កាលពីពេលថ្មីៗនេះ លោក Trumpបានសន្យាចំពោះអ្នកគាំទ្ររបស់លោកថាលោកនឹងធ្វើ «ការផ្ដន្ទោទោស» ជំនួសពួកគេ ប្រសិនបើលោកអាចធ្វើជាប្រធានាធិបតីម្ដងទៀត ហើយលោកបានប្រើភាសាស្រដៀងទៅនឹងភាសាអាក្រក់បំផុតនៃរបបហ្វាស៊ីសនៅអឺរ៉ុបនៅទសវត្សរ៍ ១៩៣០ និងទសវត្សរ៍ ១៩៤០ ដោយលោកបានហៅគូប្រជែងនយោបាយរបស់លោកថា «មនុស្សចង្រៃ» និងបានព្រមានថាជនអន្តោប្រវេសន៍ «កំពុងបំពុលឈាម» របស់សហរដ្ឋអាមេរិក។
លោក Trump ក៏បានបង្ហាញអំពីចំណាប់អារម្មណ៍ផងដែរនៅក្នុងការចាត់ថ្នាក់ឡើងវិញនូវមន្ត្រីរដ្ឋការស៊ីវិលជាច្រើនរបស់រដ្ឋាភិបាលសហរដ្ឋអាមេរិកជាមន្ត្រីដែលមានឋានៈ «Schedule F» ដែលលោកអាចបញ្ឈប់តំណែងមន្ត្រីទាំងនេះពេលណាក៏បានប្រសិនបើលោកចង់។
សម្ព័ន្ធភាពអង្គការស្រាវជ្រាវគោលនយោបាយអភិរក្សនិយមដែលដឹកនាំដោយអង្គការ Heritage Foundation នាពេលបច្ចុប្បន្ននេះ «កំពុងពិនិត្យ» លើអ្នកគាំទ្រលោក Trump រាប់ពាន់នាក់ដែលចាប់អារម្មណ៍នៅក្នុងការបម្រើការនៅក្នុងរដ្ឋបាលលើកទីពីររបស់លោក និងដែលគេអាចរំពឹងថានឹងអនុវត្តតាមគោលបំណងរបស់លោកដោយស្មោះស្ម័គ្រ។
លោក Trump ក៏បានសន្យាផងដែរថានឹងចាត់វិធានការជាក់លាក់មួយចំនួន ដែលក្នុងនោះរួមមានទាំង «ការតាមផ្ដន្ទាទោស» លោកប្រធានាធិបតី Joe Biden និងក្រុមគ្រួសាររបស់លោក Biden ដោយប្រើ «រដ្ឋអាជ្ញាពិសេស» ផងដែរ។ ជាងនេះទៀត លោកបានបង្ហាញថា ប្រព័ន្ធផ្សព្វផ្សាយព័ត៌មានណាដែលរិះគន់លើលោកគួរតែបំបិទមាត់។
អ្នកគាំទ្រស្មោះស្ម័គ្របំផុតរបស់លោក Trump បានគាំទ្រការគំរាមទាំងនេះរបស់លោក។
នៅក្នុងកិច្ចសម្ភាសន៍កាលពីពេលថ្មីៗនេះជាមួយនឹងលោក Steve Bannon ទីប្រឹក្សាសេតវិមានសម័យលោក Trump លោក Kash Patel ដែលធ្លាប់ធ្វើជាមន្ត្រីក្រសួងការពារជាតិក្នុងរដ្ឋបាលលោក Trump បាននិយាយថា នៅក្នុងអាណត្តិទីពីររបស់លោក Trump «យើងនឹងស្វែងរកអ្នកចូលរួមក្នុងផែនការឃុបឃិតសម្ងាត់មិនត្រឹមតែនៅក្នុងជួររដ្ឋាភិបាលប៉ុណ្ណោះទេ ប៉ុន្តែថែមទាំងនៅក្នុងផ្នែកប្រព័ន្ធផ្សព្វផ្សាយទៀតផង។...ជាការពិត យើងនឹងតាមផ្ដន្ទាទោសអ្នកដែលធ្វើការនៅផ្នែកប្រព័ន្ធផ្សព្វផ្សាយដែលកុហកអំពីពលរដ្ឋអាមេរិកាំង ដែលជួយលោក Joe Biden ឱ្យលួចបន្លំនៅក្នុងការបោះឆ្នោតប្រធានាធិបតី។ យើងនឹងតាមផ្ដន្ទាទោសអ្នក មិនថាផ្នែកព្រហ្មទណ្ឌឬផ្នែករដ្ឋប្បវេណីនោះទេ យើងនឹងគិតគូរឱ្យឃើញអំពីរឿងនេះ»។
លោក Bannon បានបន្ថែមទៅនឹងការលើកឡើងរបស់លោក Patel ថា៖ «នេះមិនមែនគ្រាន់តែជាការនិយាយបែបវោហារសាស្ត្រនោះទេ។ យើងពិតជាមិនលេងសើចនោះឡើយ»។
មេដឹកនាំផ្ដាច់ការមួយថ្ងៃ?
នៅក្នុងកិច្ចសម្ភាសន៍មួយជាមួយលោក Sean Hannity នៃទូរទស្សន៍ Fox News កាលពីថ្ងៃទី ៥ ខែធ្នូកន្លងទៅនេះ លោក Trump មានឱកាសស្រាយក្ដីកង្វល់ដែលថាលោកនឹងមានឥរិយាបថដូចជនផ្ដាច់ការប្រសិនបើលោកជាប់ឆ្នោតជាប្រធានាធិបតីម្ដងទៀត។
លោក Hannity បានសួរថា៖ «ចូរបញ្ជាក់ឱ្យបានច្បាស់ ប្រសិនបើលោកត្រូវបានជ្រើសរើសជាប្រធានាធិបតីម្ដងទៀត តើលោកមានផែនការរំលោភអំណាច រំលោភច្បាប់ ប្រើរដ្ឋាភិបាលដើម្បីតាមផ្ដន្ទាទោសគេឯងឬទេ?»។
លោក Trump បានឆ្លើយតបដោយមិនផ្ដល់ចម្លើយចំពោះសំណួរនេះថា៖ «អ្នកចង់មានន័យថាដូចអ្វីដែលពួកគេកំពុងធ្វើនៅពេលឥឡូវនេះ?»។
ប៉ុន្មាននាទីក្រោយមក លោក Hannity បានព្យាយាមសួរម្ដងទៀតថា៖ «មិនថាក្រោមកាលៈទេសៈណានោះទេ តើលោកហ៊ានសន្យាជាមួយនឹងពលរដ្ឋអាមេរិកាំងនៅយប់នេះថាលោកនឹងមិនរំលោភអំណាចជាដាច់ខាតដើម្បីតាមផ្តន្ទាទោសនរណាម្នាក់ឬទេ?»។
លោក Trump បានឆ្លើយថា៖ «ខ្ញុំចូលចិត្ត [ការសួររបស់] លោក។ លោកសួរខ្ញុំថា «ខ្ញុំនឹងមិនធ្វើជាមេដឹកនាំផ្ដាច់ការទេ មែនទេ?» ខ្ញុំនិយាយថា «ទេ» ក្រៅពីថ្ងៃទីមួយដែលយើងនឹងបិទព្រំដែននិងខួងយកប្រេង។ បន្ទាប់មក ខ្ញុំនឹងលែងជាមេដឹកនាំផ្ដាច់ការទៀតហើយ យល់ឬក៏អត់?»។
យុទ្ធនាការឃោសនាបោះឆ្នោតរបស់លោក Trump មិនបានឆ្លើយតបចំពោះសំណើតាមអ៊ីមែលដែលសុំឱ្យមានការបញ្ជាក់ឱ្យបានច្បាស់អំពីការលើកឡើងរបស់លោក Trump នេះទេ។
គណបក្សសាធារណរដ្ឋចេញការព្រមាន
នៅក្នុងការជជែកដេញដោលបឋមរបស់បេក្ខជនឈរឈ្មោះជាបេក្ខជនប្រធានាធិបតីខាងគណបក្សសាធារណរដ្ឋកាលពីថ្ងៃទី ៦ ខែធ្នូកន្លងទៅនេះ អតីតអភិបាលរដ្ឋ New Jersey លោក Chris Christie បានបង្ហាញនូវរូបភាពដ៏អាក្រក់នៃអ្វីដែលលោកគិតថាជាការដឹកនាំមួយអាណត្តិទៀតរបស់លោក Trump។
លោក Christie បាននិយាយថា៖ «នេះជាបុរសកំណាចពោរពេញដោយកំហឹងដែលឥឡូវនេះចង់ធ្វើជាប្រធានាធិបតីម្ដងទៀតដោយសារតែលោកចង់តាមផ្ដន្ទាទោសលើនរណាដែលប្រឆាំងនឹងលោក នរណាដែលបានព្យាយាមធ្វើឱ្យលោកទទួលខុសត្រូវចំពោះទង្វើរបស់លោក ហើយរាល់គោលនយោបាយទាំងនេះដែលលោកបានលើកឡើងគឺអំពីការបន្តផែនការតាមផ្ដន្ទាទោស»។
លោក Christie បានបន្តថា៖ «តើខ្ញុំគិតថាលោក [Trump] និយាយលេងនៅពេលដែលលោកថាលោកជាមេដឹកនាំផ្ដាច់ការឬ? អ្វីដែលអ្នកត្រូវធ្វើគឺមើលលើប្រវត្តិសាស្ត្រ ហើយហេតុដូច្នេះហើយការមិនបាននិយាយប្រឆាំងនឹងលោក [Trump] ការរកលេសឱ្យលោក ការធ្វើពុតថាការណ៍ដែលលោកជាជនរងគ្រោះបានធ្វើឱ្យលោកកាន់តែហ៊ានឡើង...គឺថាខ្ញុំសូមនិយាយឱ្យបានច្បាស់ ទង្វើរបស់លោកគឺមិនអាចទទួលយកបាននោះទេ។ លោកមិនសក្ដិសមនឹងធ្វើជាប្រធានាធិបតីនោះឡើយ។ ចូរប្រុងប្រយ័ត្នឱ្យហើយទៅថាអ្នកនឹងទទួលបានអ្វីនៅពេលដែលលោក Trump កាន់អំណាចម្ដងទៀត។ លោកនឹងឱ្យអ្នកដឹងថាលោកនឹងដើរតួជាអ្នកផ្ដន្ទាទោសជំនួសអ្នក»។
លោក Trump មិនបានស្ថិតនៅលើឆាកជជែកដេញដោលនោះទេ ដោយលោកបានបដិសេធមិនចូលរួមនៅក្នុងការជជែកដេញដោលបឋមណាមួយ។
បេក្ខជន ៣ រូបទៀតខាងគណបក្សសាធារណរដ្ឋដែលមានវត្តមាននៅលើឆាកជជែកដេញដោលនៅពេលនោះគឺអតីតអភិបាលរដ្ឋ South Carolina អ្នកស្រី Nikki Haley អភិបាលរដ្ឋ Florida លោក Ron DeSantis និងពាណិជ្ជករលោក Vivek Ramaswamy។ បេក្ខជនទាំង ៣ រូបបានជៀសវាងធ្វើយ៉ាងណាមិនរិះគន់ខ្លាំងក្លាលើលោក Trump។ លោក Trump នៅតែនាំមុខនៅក្នុងការស្ទង់មតិលើអ្នកដែលទំនងជាអ្នកបោះឆ្នោតនៃការបោះឆ្នោបបឋម។
«ការមមើដើរចូលទៅក្នុងភាពផ្ដាច់ការ»
ក្ដីបារម្ភរបស់លោក Christie ត្រូវបានសមាជិកគណបក្សសាធារណរដ្ឋផ្សេងទៀតគាំទ្រដូចជាលោក Mitt Romney ដែលជាសមាជិកព្រឹទ្ធសភាតំណាងរដ្ឋ Utahនិងជាបេក្ខជនប្រធានាធិបតីឆ្នាំ ២០១២ ជាដើម ដែលលោកបានប្រាប់កាសែត Washington Post កាលពីពេលថ្មីៗនេះថា មូលដ្ឋានគាំទ្រលោក Trump ហាក់ដូចជាចង់ឱ្យលោកមានឥរិយាបថដូចជាជនអាជ្ញាធិបតេយ្យ។
លោក Rommey បាននិយាយថា៖ «មូលដ្ឋានគាំទ្រលោកចូលចិត្ដទំនោរដឹកនាំបែបអាជ្ញាធិបតេយ្យ។ ខ្ញុំគិតថាពួកគេចូលចិត្តគំនិតដែលថាលោកអាចប្រើយោធានៅក្នុងកិច្ចការក្នុងប្រទេស និងថាលោកនឹងសងសឹកនិងតាមផ្តន្ទាទោស។ ហេតុដូចនេះហើយបានជាលោកលើកឡើងអំពីរឿងនេះនិងនាំមុខដាច់គេក្នុងការក្លាយជាបេក្ខជនប្រធានាធិបតីខាងគណបក្សសាធារណរដ្ឋ»។
កាលពីខែកញ្ញា លោក Romney បានប្រកាសថាលោកនឹងមិនឈរឈ្មោះបោះឆ្នោតនៅឆ្នាំក្រោយនោះទេ។
អតីតសមាជិករដ្ឋសភាខាងគណបក្សសាធារណរដ្ឋតំណាងរដ្ឋ Wyoming អ្នកស្រី Liz Cheney ដែលបានរិះគន់មិនសំចៃមាត់លើលោក Trump និងធ្លាប់បម្រើការនៅក្នុងគណៈកម្មាធិការរដ្ឋសភាដែលស៊ើបអង្កេតលើការវាយប្រហារថ្ងៃទី ៦ ខែមករា ឆ្នាំ ២០២១ លើវិមានសភាសហរដ្ឋអាមេរិក បានប្រាប់ទូរទស្សន៍ CBS News កាលពីពេលថ្មីៗនេះថា អ្នកស្រីមើលឃើញយ៉ាងច្បាស់ថាការដឹកនាំលើកទីពីររបស់លោក Trump នឹងទៅជាយ៉ាងណា។
អ្នកស្រីបាននិយាយថា៖ «រឿងមួយដែលយើងឃើញកំពុងកើតឡើងនៅពេលបច្ចុប្បន្នគឺការមមើដើរចូលទៅក្នុងភាពផ្ដាច់ការនៅក្នុងសហរដ្ឋអាមេរិក»។
មិនមែនជាការគំរាមកំហែងធ្ងន់ធ្ងរទេ
អ្នកកាន់តំណែងបច្ចុប្បន្នខាងគណបក្សសាធារណរដ្ឋដែលគាំទ្រលោក Trump ជារឿយៗចាត់ទុកថាមិនសូវសំខាន់ចំពោះការលើកឡើងរបស់លោកដែលថាលោកនឹងប្រើឃ្នាស់អំណាចរដ្ឋាភិបាលដើម្បីដាក់ទោសអ្នករិះគន់លោក។
នៅក្នុងអំឡុងការជជែកដេញដោលកាលពីថ្ងៃទី ៦ ខែធ្នូ លោក DeSantis បានច្រានចោលក្ដីកង្វល់ដែលថាលោក Trump នឹងមានឥរិយាបថដូចជនផ្ដាច់ការនៅក្នុងការដឹកនាំលើកទីពីរប្រសិនបើលោក Trump ជាប់ឆ្នោត។
លោក DeSantis បាននិយាយថា៖ «ចូរមើលទៅ! ប្រព័ន្ធផ្សព្វផ្សាយកំពុងចាត់ទុកថាធំដុំខ្លាំងចំពោះអ្វីដែលលោក Trump បាននិយាយអំពីការលើកឡើងទាំងនេះមួយចំនួន។ ខ្ញុំចង់រំឭកប្រជាពលរដ្ឋថានោះមិនមែនជារបៀបដែលលោក Trump បានដឹកនាំនោះទេ»។
សមាជិកព្រឹទ្ធសភាខាងគណបក្សសាធារណរដ្ឋតំណាងរដ្ឋ South Carolina លោក Lindsey Graham បាននិយាយជាសាធារណៈថា លោកជឿថាការលើកឡើងរបស់លោក Trump ទៅកាន់លោក Hannity ចង់មានន័យបែប «កំប្លែងលេងសើច» ប៉ុណ្ណោះ។
នៅក្នុងកិច្ចសម្ភាសន៍មួយជាមួយនឹងបណ្ដាញព័ត៌មាន CNN កាលពីថ្ងៃទី ៣ ខែធ្នូ លោក Graham បានជំទាស់ទៅនឹងការអះអាងរបស់អ្នកស្រី Cheney អំពីរបៀបដែលលោក Trump នឹងដឹកនាំប្រសិនបើលោក Trump នឹងជាប់ឆ្នោតជាលើកទីពីរ ដោយបាននិយាយថា ការអះអាងទាំងនេះគឺកើតចេញពីគំនុំផ្ទាល់ខ្លួនរបស់អ្នកស្រីជាមួយនឹងលោក Trump។
លោក Graham បាននិយាយថា៖ «ព្រំដែនរបស់យើងគឺបាក់បែកខូចខាត។ មនុស្សតែម្នាក់គត់ដែលពិតជានឹងជួសជុលព្រំដែនបាក់បែកខូចខាតនោះគឺលោក Donald Trump។ នៅពេលលោកធ្វើជាប្រធានាធិបតី គ្មានបញ្ហាសង្គ្រាមកើតឡើងនៅអ៊ុយក្រែនទេ។ ក្រុមហាម៉ាស់ (Hamas) និងក្រុមភេរវកម្មផ្សេងទៀតខ្លាចលោក Trump»។
នៅពេលសួរឱ្យបញ្ចេញមតិអំពីការលើកឡើងរបស់លោក Trump ដែលថាលោកនឹងធ្វើជាមេដឹកនាំផ្ដាច់ការមួយថ្ងៃ សមាជិកព្រឹទ្ធសភាខាងគណបក្សសាធារណរដ្ឋតំណាងរដ្ឋ North Carolina លោក Thom Tillis បាននិយាយថា៖ «លោក [Trump] បាននិយាយថាលោកនឹងធ្វើរឿងពីរ គឺលោកនឹងបិទព្រំដែននិងខួងប្រេង។ នរណាក៏អាចនិយាយបានដែរថានេះជាការរំលោភអំណាច។ ខ្ញុំគិតថានោះគឺជាការប្រើប្រាស់អំណាចយ៉ាងត្រឹមត្រូវ ហើយលោកប្រធានាធិបតី Biden បានបរាជ័យនៅក្នុងរឿងនេះ»។
«ជនអត្តាធិបតេយ្យតែងប្រាប់អ្នកថាពួកគេជានរណា»
អ្នកស្រី Ruth Ben-Ghiat ដែលជាសាស្ត្រាចារ្យនៃសាកលវិទ្យាល័យ New York University និងជាអ្នកនិពន្ធសៀវភៅ «បុរសខ្លាំង៖ ពីសម័យលោក Mussolini ដល់បច្ចុប្បន្ន (Strongmen: From Mussolini to the Present)» បានរំឭកអំពីគ្រោះថ្នាក់នៃការមិនចាត់ទុកវោហារសាស្ត្ររបស់លោក Trump ថាម៉ឺងម៉ាត់នោះ។
អ្នកស្រីបានសរសេរនៅក្នុងអ៊ីមែលឆ្លើយឆ្លងជាមួយនឹង VOA ថា៖ «អ្វីៗទាំងអស់ដែលលោក Donald Trump និយាយគួរតែយកចិត្តទុកដាក់ឱ្យបានហ្មត់ចត់។ ជនអត្តាធិបតេយ្យតែងប្រាប់អ្នកថាពួកគេជានរណានិងអ្វីដែលពួកគេនឹងធ្វើ។ នៅក្នុងករណីនេះ លោក Trump កំពុងនិយាយយ៉ាងច្បាស់ថាលោកមានបំណងធ្វើជាមេដឹកនាំផ្ដាច់ការ។ នេះគឺគ្មានអ្វីគួរឱ្យភ្ញាក់ផ្អើលទេដោយសារតែលោកធ្លាប់បានញុះញង់ឱ្យមានការធ្វើរដ្ឋប្រហារដើម្បីបានកាន់អំណាចដោយខុសច្បាប់និងដោយសារតែការអួតសរសើរដោយបើកចំហរបស់លោកចំពោះក្រុមមេដឹកនាំដែលដូចលោកដូចជា [ប្រធានាធិបតីរុស្ស៊ីលោក Vladimir] Putin និង [ប្រធានាធិបតីចិន] លោក Xi [Jinping] ជាដើម»។
លោក Kurt Braddock សាស្ត្រាចារ្យជំនួយផ្នែកសារគមនាគមន៍នៃសាកលវិទ្យាល័យ American University ដែលសិក្សាស្រាវជ្រាវអំពីទំនាក់ទំនងរវាងភាសានយោបាយនិងអំពើហិង្សា បាននិយាយថា ការចាត់ទុកវោហារសាស្ត្ររបស់លោក Trump ថាមិនសូវសំខាន់ធ្វើឱ្យអ្វីៗភាគច្រើនដែលលោក Trump បាននិយាយក្លាយទៅជារឿង «ធម្មតា» នៅក្នុងចំណោមសាធារណជនទូទៅ។
លោក Braddock បានប្រាប់ VOA ថា៖ «ពួកគេបាននិយាយថាលោក [Trump] «គ្រាន់តែនិយាយលេងតែប៉ុណ្ណោះ» អស់រយៈពេល ៧ ឆ្នាំមកហើយ។ ហើយមិនថាលោក [Trump] និយាយលេងឬក៏មែននោះទេ គឺវាមិនសំខាន់នោះឡើយ។ [អ្វីដែលសំខាន់គឺថា] មនុស្សមួយចំនួនយល់ឃើញថាអ្វីដែលលោក Trump និយាយគឺជាការពិត»។
លោក Braddock បាននិយាយថា៖ «នៅពេលដែលមានអ្នកខ្លះដែលគោរពនរណាម្នាក់ខ្លាំងដូចទៅនឹងអ្នកខ្លះដែលគោរពលោក Trump នោះ យើងឃើញថាការធ្វើឱ្យភាសាបែបនេះក្លាយទៅជាធម្មតាគឺជំរុញឱ្យមានឥរិយាបថវិជ្ជមានអំពីអ្វីដែលភាសានេះចង់សំដៅលើ»។
លោកបានបន្ថែមថា៖ «ដូច្នេះ នៅពេលដែលលោក [Trump] និយាយលេងសើចអំពីការធ្វើជាមេដឹកនាំផ្ដាច់ការ ឬក៏និយាយលេងសើចអំពីអំពើហិង្សាលើសត្រូវនយោបាយ បើលោកកាន់តែនិយាយ នោះវានឹងកាន់តែក្លាយទៅជាផ្នែកមួយនៃពាក្យពេចន៍ធម្មតារបស់យើង»៕
ប្រែសម្រួលដោយលោក ភី សុភាដា
