សហរដ្ឋអាមេរិកកាលពីថ្ងៃព្រហស្បតិ៍បានបញ្ជាក់ថាការដោះដូរអ្នកទោសជាប្រវត្តិ សាស្ត្រជាមួយរុស្ស៊ីដែលរួមមានអ្នកកាសែតអាមេរិកាំងលោក Evan Gershkovich អ្នកស្រី Alsu Kurmasheva អតីតទាហានម៉ារីនអាមេរិកលោក Paul Whelan និងអ្នកមានទីលំនៅអចិន្ត្រៃយ៍នៅសហរដ្ឋអាមេរិកលោក Vladimir Kara-Murza។
ជារួម សហរដ្ឋអាមេរិកបានជួយដោះលែងបុគ្គលទាំងអស់ចំនួន១៦រូប រួមមាន៥រូបជាជនជាតិអាល្លឺម៉ង់ដែលត្រូវបានឃុំឃាំងដោយខុសឆ្គងនិងពលរដ្ឋរុស្ស៊ី៧នាក់ នៅក្នុងការដោះដូរជាមួយជនជាតិរុស្ស៊ី៨នាក់ដែលត្រូវបានឃុំខ្លួននៅក្នុងសហរដ្ឋអាមេរិក អាល្លឺម៉ង់ ប៉ូឡូញ ន័រវែសនិងស្លូវេនី។
នេះជាការដោះដូរអ្នកទោសដ៏ធំបំផុតមួយរវាងសហរដ្ឋអាមេរិកនិងប្រទេសរុស្ស៊ីចាប់តាំងពីសង្គ្រាមត្រជាក់មក។
ទីប្រឹក្សាសន្តិសុខជាតិសហរដ្ឋអាមេរិកលោក Jake Sullivan បានប្រាប់ពួកអ្នកកាសែតនៅសន្និសីទកាសែតថា«ការដោះដូរនៅថ្ងៃនេះនឹងក្លាយជាប្រវត្តិសាស្ត្រ។ មិនដែលមានចាប់តាំងពីសង្គ្រាមត្រជាក់មកដែលមានការដោះដូរចំនួនបុគ្គលរបៀបនេះទេ។ វាជាការបញ្ចប់នៃការចរចាជាច្រើនលើកប្រកបដោយភាពស្មុគ្រស្មាញ ការផ្ចិតផ្ចង់អស់ជាច្រើនខែ»។
លោក Sullivan បាននិយាយទៀតថាកិច្ចព្រមព្រៀងក៏កត់សម្គាល់ជាលើកទី១ដែលប្រទេសជាច្រើននិងសម្ព័ន្ធមិត្តបានធ្វើការជាមួយគ្នាដើម្បីជួយការដោះលែងបុគ្គលដែលចាប់ខ្លួនខុស។
អ្នកទោសអាមេរិកាំងដែលត្រូវបានឃុំខ្លួនយូរបំផុតគឺលោក Paul Whelan ជាអតីតទាហានម៉ារីនសហរដ្ឋអាមេរិកដែលត្រូវបានចាប់ខ្លួននៅទីក្រុងមូស្គូនៅឆ្នាំ២០១៨។ នៅឆ្នាំ២០២០ លោកត្រូវបានកាត់ទោសឱ្យជាប់ពន្ធនាគារ១៦ឆ្នាំក្នុងច្បាប់ព្រហ្មទណ្ឌលើបទចោទប្រកាន់ចារកម្មដែលលោកនិងរដ្ឋាភិបាលសហរដ្ឋអាមេរិកបដិសេធ៕
