របាយការណ៍មួយបានឲ្យដឹងថា ចំនួនប្រជាជននៅទូទាំងពិភពលោកដែលត្រូវចាកចេញពីផ្ទះសម្បែងរបស់ពួកគេដោយសារជម្លោះ និងគ្រោះមហន្តរាយធម្មជាតិមានចំនួន៤០លាន៨សែននាក់កាលពីឆ្នាំមុន ដែលនេះជាតួលេខខ្ពស់បំផុតមិនធ្លាប់មានពីមុនមក។
មជ្ឈមណ្ឌលតាមដានការផ្លាស់ប្ដូរទីលំនៅក្នុងស្រុករបស់ក្រុមប្រឹក្សាជនភៀសខ្លួនន័រវែស (IDMC) បានចេញផ្សាយកាលពីថ្ងៃពុធថា មនុស្សចំនួន២៧លាន៨សែននាក់បានផ្លាស់ប្ដូរទីលំនៅក្នុងស្រុកក្នុងឆ្នាំ២០១៥។
នៅក្នុងបទសម្ភាសន៍មួយជាមួយនឹង VOA លោក Karl Schembri ទីប្រឹក្សាទទួលបន្ទុកការិយាល័យនៅមជ្ឈិមបូព៌ានៃក្រុមប្រឹក្សាជនភៀសខ្លួនន័រវែស បានមានប្រសាសន៍ថា «វាពិតជាគួរឲ្យភ្ញាក់ផ្អើលណាស់»។
របាយការណ៍នោះបានរកឃើញថា ជាមធ្យមមនុស្សចំនួន៦ម៉ឺន៦ពាន់នាក់បានផ្លាស់ប្ដូរទីលំនៅជារៀងរាល់ថ្ងៃក្នុងឆ្នាំ២០១៥ ដែលតួលេខកាលពីឆ្នាំមុនស្មើនឹងចំនួនប្រជាជនក្នុងទីក្រុងញូវយ៉ក ទីក្រុងឡុងដ៏ ទីក្រុងប៉ារីស និងទីក្រុងគែរបូកសរុបចូលគ្នា។
លោក Jan Egeland អគ្គលេខាធិការនៃក្រុមប្រឹក្សានេះបានមានប្រសាសន៍ថា «ពិភពលោកកំពុងតែស្ថិតក្នុងវិបត្តិផ្លាស់ប្ដូរទីលំនៅ ដែលកើនឡើងពីមួយឆ្នាំទៅមួយឆ្នាំ ហើយបច្ចុប្បន្ននេះ កន្លែងជាច្រើនពោរពេញដោយជម្លោះ និងឬជួបប្រទះនឹងគ្រោះមហន្តរាយ»។
មនុស្សចំនួន៦ភាគរយក្នុងចំណោមមនុស្សចំនួន៨លាន៦សែននាក់ដែលបានផ្លាស់ប្ដូរទីលំនៅដោយសារជម្លោះ គឺស្ថិតនៅក្នុងប្រទេសមួយចំនួនដូចជា ប្រទេសយេមែន ប្រទេសស៊ីរី និងប្រទេសអ៊ីរ៉ាក់៕
