អ្នកនាង Raye ដែលជាតារាចម្រៀងនិងអ្នកនិពន្ធបទចម្រៀង គឺជាអ្នកទទួលជ័យលាភីធំជាងគេកាលពីថ្ងៃសៅរ៍ ទី២ ខែមីនា ក្នុងពិធីប្រគល់ពានរង្វាន់ BRIT Awards ដែលជាពិធីធំបំផុតមួយនៅក្នុងវិស័យតន្រ្តីនៅអង់គ្លេស ដោយអ្នកនាងបានជាប់កំណត់ត្រាជាអ្នកទទួលបានពានង្វាន់ច្រើនគេជាងបង្អស់ក្នុងកម្មវិធីប្រចាំឆ្នាំមួយនេះ។
អ្នកនាង Raye បានឈ្នះពានរង្វាន់ចំនួនប្រាំមួយ រួមមានពានរង្វាន់សិល្បករប្រចាំឆ្នាំ ពានរង្វាន់អាល់ប៊ុមចម្រៀងប្រចាំឆ្នាំក្រោមចំណងជើងថា «My 21st Century Blue» និងពានរង្វាន់បទចម្រៀងប្រចាំឆ្នាំក្រោមចំណងជើងថា «Escapism»។
សិល្បការនីវ័យ ២៦ ឆ្នាំរូបនេះក៏ទទួលបានជោគជ័យនៅក្នុងផ្នែកតន្រ្តី R&B និងបានជាប់ឈ្មោះជាសិល្បករថ្មីដ៏ល្អបំផុត។ ការជាប់ជាបេក្ខភាពលើផ្នែកផ្សេងៗចំនួនប្រាំពីររបស់អ្នកនាង Raye បានបំបែកកំណត់ត្រាការជាប់បេក្ខភាពច្រើនបំផុតសម្រាប់សិល្បករទោលនៅក្នុងពេលមួយឆ្នាំ នេះបើយោងតាមក្រុមអ្នករៀបចំ British Phonographic Industry (BPI) ដែលជាក្រុមអ្នករៀបចំពិធីប្រចាំឆ្នាំនេះ។
អ្នកនាង Raye ដែលបានចែកផ្លូវជាមួយផលិតកម្មរបស់អ្នកនាង កាលពីឆ្នាំ ២០២១ ដើម្បីមកធ្វើការជាសិល្បករឯករាជ្យ បន្ទាប់ពីអ្នកនាងបាននិយាយថា ផលិតកម្មបានឃាត់ទុកអាល់ប៊ុមចម្រៀងដំបូងរបស់អ្នកនាងនោះ បានធ្វើពិធីអបអរ នៅពេលអ្នកនាងបានឈ្នះពានរង្វាន់អ្នកនិពន្ធបទម្រៀងប្រចាំឆ្នាំ BRITs Songwriter of the Year។ អ្នកនាងគឺជាស្រ្តីដំបូងគេដែលបានឈ្នះពានរង្វាន់នេះ ចាប់តាំងពីពានរង្វាន់នេះត្រូវបានបង្កើតឡើងកាលពីឆ្នាំ ២០២២។
ក្នុងអំឡុងពេលទទួលពានរង្វាន់អាល់ប៊ុមចម្រៀងប្រចាំឆ្នាំ អ្នកនាង Raye មានភាពរំជួលចិត្តនិងស្រក់ទឹកភ្នែក។ អ្នកនាងបាននិយាយក្នុងសម្តីដើមថា៖ «អ្នកមិនដឹងថា ពានរង្វាន់នេះមានន័យយ៉ាងណាចំពោះខ្ញុំនោះទេ»។ អ្នកនាងបានថ្លែងដូចនេះ ស្របពេលដែលនៅឈរជិតជីដូន។ អ្នកនាងក៏បានថ្លែងអំណរគុណចំពោះ «ការបន់ស្រន់» របស់ជីដូនអ្នកនាងផងដែរ។
អ្នកនាងបានបន្តថា៖ «ខ្ញុំមានមោទនភាពយ៉ាងខ្លាំងចំពោះអាល់ប៊ុមចម្រៀងនេះ។ ខ្ញុំស្រឡាញ់តន្រ្តី។ អ្វីដែលខ្ញុំចង់បានគឺការក្លាយជាសិល្បករ ហើយឥឡូវនេះ ខ្ញុំជាសិល្បករម្នាក់ដែលឈ្នះពានរង្វាន់អាល់ប៊ុមចម្រៀងប្រចាំឆ្នាំ»។
ក្រុមចម្រៀង Jungle បានឈ្នះពានរង្វាន់ក្រុមចម្រៀងប្រចាំឆ្នាំ ស្របពេលក្រុមចម្រៀងរ៉ុក Bring Me the Horizon បានឈ្នះពានរង្វាន់នៅក្នុងផ្នែកតន្រ្តី Alternative/rock ដោយយកឈ្នះលើក្រុមចម្រៀង Blur និងក្រុមចម្រៀង The Rolling Stones។
ក្រុមចម្រៀង Blur បានជាប់បេក្ខភាពចំនួនបី ប៉ុន្តែមិនបានឈ្នះពានរង្វាន់ណាមួយនោះទេ។
តារាចម្រៀង Dua Lipa ដែលបានជាប់បេក្ខភាពលើផ្នែកចំនួនបី បានឈ្នះពានរង្វាន់ផ្នែកចម្រៀងប៉ុប។
ក្រុមអ្នករៀបចំ British Phonographic Industry បាននិយាយថា ជាងពាក់កណ្តាល ឬ ៥៥ភាគរយនៃការតែងតាំងបេក្ខភាពគឺមានរួមបញ្ចូលស្រ្តី ដែលជាសិល្បករទោល ឬជាផ្នែកនៃក្រុមចម្រៀងស្រ្តីសុទ្ធ៕
ប្រែសម្រួលដោយលោក ណឹម សុភ័ក្រ្តបញ្ញា
វេទិកាបញ្ចេញមតិ