ប្រធានាធិបតីរុស្ស៊ីលោក Vladimir Putin បានធ្វើដំណើរទៅដល់ទីក្រុងប៉េកាំងនៃប្រទេសចិននៅថ្ងៃអង្គារនេះដើម្បីជួបជាមួយនឹងប្រធានាធិបតីចិនលោក Xi Jinping ក្នុងដំណើរទស្សនកិច្ចដែលគេតាមដានមើលយ៉ាងទូលំទូលាយមួយដែលមានបំណងបង្ហាញទំនុកចិត្តនិងភាពជាដៃគូ «គ្មានដែនកំណត់» រវាងប្រទេសទាំងពីរ បើទោះបីជាសង្គ្រាមនៅអ៊ុយក្រែននៅបន្តក៏ដោយ។ នេះបើយោងតាមសេចក្ដីរាយការណ៍របស់ទីភ្នាក់ងារសារព័ត៌មាន Reuters។
នៅក្នុងដំណើរទស្សនកិច្ចទៅបរទេសលើកទីពីរដែលគេដឹងឮនេះតាំងពីពេលដែលតុលាការព្រហ្មទណ្ឌអន្តរជាតិ (ICC) បានចេញដីកាចាប់ខ្លួនរូបលោកកាលពីខែមីនាមក លោក Putin និងមន្ត្រីហែហមរបស់លោកបានធ្វើដំណើរទៅដល់អាកាសយានដ្ឋានអន្តរជាតិទីក្រុងប៉េកាំងនៅព្រឹកថ្ងៃអង្គារនេះ។ នេះបើយោងតាមវីដេអូរបស់ទីភ្នាក់ងារសារព័ត៌មាន Reuters។
លោក Putin ត្រូវបានទទួលស្វាគមន៍ដោយរដ្ឋមន្ត្រីពាណិជ្ជកម្មចិនលោក Wang Wentao។
ទស្សនកិច្ចលើកនេះក៏ជាទស្សនកិច្ចផ្លូវការដំបូងបង្អស់របស់លោក Putin ទៅក្រៅអតីតសហភាពសូវៀតផងដែរនៅក្នុងឆ្នាំនេះ បន្ទាប់ពីលោកបានធ្វើទស្សនកិច្ចទៅកាន់ប្រទេសកៀហ្ស៊ីស៊ីស្ថាន (Kyrgyzstan ) ដែលជាអតីតសាធារណរដ្ឋមួយរបស់សហភាពសូវៀតកាលពីដើមខែនេះ។
តុលាការ ICC ដែលបានចោទប្រកាន់លោក Putin ថាបានចាប់បង្ខំបញ្ជូនកុមារដោយខុសច្បាប់ពីអ៊ុយក្រែនទៅរុស្ស៊ី តម្រូវឱ្យសមាជិកទាំង ១២៣ ប្រទេសនៃតុលាការនេះចាប់ខ្លួនលោក Putin និងផ្ទេរលោកទៅកាន់ទីក្រុងឡាអេនៃប្រទេសហូឡង់ដើម្បីបើកសវនាការកាត់ទោស ប្រសិនបើលោកធ្វើដំណើរទៅដល់ទឹកដីនៃប្រទេសជាសមាជិកទាំងនោះ។ ទាំងប្រទេសកៀហ្ស៊ីស៊ីស្ថាននិងប្រទេសចិនសុទ្ធតែមិនមែនជាសមាជិករបស់តុលាការ ICC។ តុលាការនេះត្រូវបានបង្កើតឡើងដើម្បីកាត់ទោសឧក្រិដ្ឋកម្មសង្គ្រាម។
លោក Xi បានជួបជាមួយនឹងលោក Putin ដែលជា «មិត្តសំឡាញ់» របស់លោកនៅក្នុងទីក្រុងមូស្គូនៃប្រទេសរុស្ស៊ីក្នុងពេលតែប៉ុន្មានថ្ងៃក្រោយមកប៉ុណ្ណោះបន្ទាប់ពីតុលាការ ICC បានចេញដីកាចាប់ខ្លួនលោក Putin។ នៅពេលនោះ លោក Xi បានអញ្ជើញលោក Putin ឱ្យចូលរួមនៅក្នុងវេទិកាក្រវាត់ផ្លូវពាណិជ្ជកម្ម (BRI) លើកទី ៣ នៅក្នុងទីក្រុងប៉េកាំង ដែលជាវេទិកាកិច្ចសហប្រតិបត្តិការអន្តរជាតិដែលផ្ដួចផ្ដើមដោយលោក Xi។
លោក Putin គ្រោងនឹងចូលរួមនៅក្នុងពិធីបើកជាផ្លូវការនៃវេទិកានេះដែលរៀបចំដោយលោក Xi និងគ្រោងពិភាក្សាជាមួយនឹងមេដឹកនាំនៃប្រទេសវៀតណាម ថៃ ម៉ុងហ្គោលី និងឡាវនៅថ្ងៃអង្គារនេះ។ នេះបើយោងតាមសេចក្ដីរាយការណ៍របស់ប្រព័ន្ធផ្សព្វផ្សាយរុស្ស៊ី៕
លោក Putin ទៅជួបលោក Xi នៅចិនដើម្បីបង្ហាញភាពជាដៃគូ «គ្មានដែនកំណត់»
- Reuters
ទីក្រុងប៉េកាំង ប្រទេសចិន —
