ប្រធានាធិបតីរុស្ស៊ីលោក Vladimir Putin បានធ្វើជាម្ចាស់ផ្ទះធ្វើការចរចានៅថ្ងៃពុធនេះជាមួយមេដឹកនាំកូរ៉េខាងជើង Kim Jong Un នៅក្នុងតំបន់ភាគខាងកើតប្រទេសរុស្ស៊ីនៅពេលមានការព្រមានពីសហរដ្ឋអាមេរិកនិងកូរ៉េខាងត្បូងប្រឆាំងនឹងលទ្ធភាពនៃការផ្ទេរអាវុធ។
លោក Putin និងលោក Kim មុនដំបូងបានដើរមើលកន្លែងបាញ់បង្ហោះយានអវកាសនៅក្រុង Vostochny ជាទីកន្លែងដែលពួកអ្នកយកព័ត៌មានបានសួរថាតើរុស្ស៊ីនឹងជួយកូរ៉េខាងជើងស្ថាបនាផ្កាយរណបឬទេ?
បើតាមបណ្តាញសារព័ត៌មានរដ្ឋរុស្ស៊ីបានរាយការណ៍ថា លោក Putin បាននិយាយថា «នេះជាមូលហេតុដែលយើងមកទីនេះ។ មេដឹកនាំសាធារណរដ្ឋប្រជាមានិតកូរ៉េ ឬ DPRK បង្ហាញការចាប់អារម្មណ៍យ៉ាងខ្លាំងដល់វិស្វកម្មកាំជ្រួចរ៉ុក្កែត ពួកគេក៏កំពុងព្យាយាមបង្កើតកម្មវិធីអវកាសដែរ»។
នៅពេលដែលលោក Kim ទៅបំពេញទស្សនកិច្ចនៅប្រទេសរុស្ស៊ី កូរ៉េខាងជើងនៅថ្ងៃពុធនេះបានបាញ់កាំជ្រួចមីស៊ីលបាល្លីស្ទិកវង់ប្រតិបត្តិការខ្លី២គ្រាប់ចូលក្នុងសមុទ្រទល់មុខឆ្នេរសមុទ្រខាងកើតរបស់ខ្លួន។ យោធាកូរ៉េខាងត្បូងបាននិយាយថាកាំជ្រួចមីស៊ីលនោះត្រូវបានបាញ់បង្ហោះចេញពីទីកន្លែងមួយនៅជិតរដ្ឋធានីព្យុងយ៉ាងហើយបានហោះចម្ងាយប្រហែល៦៥០គីឡូម៉ែត្រ។
មុនការចរចា ពួកមន្ត្រីកូរ៉េខាងត្បូងបាននិយាយថាពួកគេបានតាមមើលយ៉ាងដិតដល់ជំនួបលើកដំបូងរវាងលោក Kim និងលោក Putin នៅក្នុងរយៈពេល៤ឆ្នាំនេះ។
តាមសេចក្តីរាយការណ៍ថា លោក Kim និងលោក Putin នឹងពិភាក្សាអំពីការផ្គត់ផ្គង់របស់កូរ៉េខាងជើងដល់រុស្ស៊ីនូវអាវុធកាន់តែច្រើនឡើងដែលត្រូវប្រើប្រាស់នៅក្នុងសង្គ្រាមប្រឆាំងអ៊ុយក្រែននិងកិច្ចប្រតិបត្តិការយោធាផ្សេងទៀត ស្របពេលដែលលោក Kim ទំនងស្វែងរករុស្ស៊ីផ្តល់ឱ្យកូរ៉េខាងជើងនូវបច្ចេកវិទ្យាជឿនលឿនសម្រាប់ផ្កាយរណបនិងនាវាមុជទឹកប្រើថាមពលនុយក្លែអ៊ែររបស់ខ្លួននិងជំនួយម្ហូបអាហារ។
នៅក្នុងទីក្រុងមូស្គូ អ្នកនាំពាក្យវិមានក្រឹមឡាំងលោក Dmitry Peskov បាននិយាយកាលពីថ្ងៃអង្គារម្សិលមិញថា ដំណើរទស្សនកិច្ចរបស់លោក Kimទៅកាន់ប្រទេសរុស្ស៊ីជា«ដំណើរទស្សនកិច្ចពេញលេញ»។
សហរដ្ឋអាមេរិកនិងកូរ៉េខាងត្បូងបានបន្តព្រមានដល់កូរ៉េខាងជើងកុំឱ្យផ្តល់គ្រាប់រំសេវដល់ប្រទេសរុស្ស៊ីដែលត្រូវប្រើប្រាស់នៅក្នុងសង្គ្រាមប្រទេសអ៊ុយក្រែន៕
លោក Lee Juhyun បានផ្តល់សេចក្តីរាយការណ៍នេះ។ ព័ត៌មានខ្លះនៃសេចក្តីរាយ ការណ៍នេះដកស្រង់ពីទីភ្នាក់ងារសារព័ត៌មាន AP និង Reuters។
