កាលពីថ្ងៃសុក្រកន្លងទៅនេះ ពានរង្វាន់ Pulitzer ផ្នែកការសរសើរពិសេស ត្រូវបានប្រគល់ជូននាង Darnella Frazier ដែលបានថតវីដេអូអំពីសកម្មភាពដែលមន្ត្រីប៉ូលិសឈ្មោះ Derek Chauvin ប្រើជង្គង់សង្កត់កលោក George Floyd រហូតដល់ស្លាប់ នៅក្នុងទីក្រុង Minneapolis រដ្ឋ Minnesota សហរដ្ឋអាមេរិក។
សម្រាប់ពានរង្វាន់ Pulitzer ផ្នែកសេវាសាធារណៈត្រូវបានប្រគល់ជូនទីភ្នាក់ងារព័ត៌មាន The New York Times សម្រាប់ការផ្សព្វផ្សាយព័ត៌មានអំពីការឆ្លងរាតត្បាតជាសាកលនៃជំងឺកូវីដ១៩។ រីឯពានរង្វាន់ Pulitzer ផ្នែកព័ត៌មានទាន់ហេតុការណ៍ ត្រូវបានប្រគល់ជូនទីភ្នាក់ងារព័ត៌មាន Star Tribune ប្រចាំទីក្រុង Minneapolis សម្រាប់ការរាយការណ៍ក្រោយហេតុការណ៍នៃការស្លាប់របស់លោក Floyd។ ចំណែកឯពានរង្វាន់ផ្នែកថតរូបចំនួនពីរវិញ ត្រូវបានប្រគល់ជូនទីភ្នាក់ងារព័ត៌មាន The Associated Press។
ឆ្នាំ ២០២០ គឺជាឆ្នាំដ៏កម្រមួយនៅក្នុងវិស័យសារព័ត៌មាន ដោយសារតែរឿងរ៉ាវស្ទើរតែទាំងអស់ដែលបានកើតឡើងមានការពាក់ព័ន្ធនឹងជំងឺកូវីដ១៩។
ការប្រកាសអំពីជ័យលាភីពានរង្វាន់នេះ ដំបូងគ្រោងធ្វើឡើងនៅថ្ងៃទី ១៩ ខែមេសា ប៉ុន្តែក្រុមប្រឹក្សាភិបាលពានរង្វាន់ Pulitzer បានពន្យារពេលរហូតដល់ខែមិថុនា ដើម្បីទុកពេលឲ្យសមាជិកទាំង ១៨ នាក់របស់ខ្លួនធ្វើការជជែកដេញដោលដោយផ្ទាល់ជាជាងធ្វើឡើងតាមអនឡាញ។
នេះគឺជាលើកទីពីរហើយដែលពិធីប្រគល់ពានរង្វាន់នេះត្រូវបានពន្យារពេលដោយសារតែការរាតត្បាតជាសាកលនៃជំងឺកូវីដ១៩។ ការប្រកាសពានរង្វាន់នេះកាលពីឆ្នាំមុនត្រូវបានពន្យារពេលពីរសប្ដាហ៍ដើម្បីទុកពេលបន្ថែមទៀតឲ្យសមាជិកក្រុមប្រឹក្សាភិបាលដែលរវល់រាយការណ៍ព័ត៌មានអំពីការរាតត្បាតជាសាកលនៃជំងឺកូវីដ១៩ នៅក្នុងការវាយតម្លៃលើបេក្ខជនដែលជាប់ដល់ជុំចុងក្រោយទាំងអស់។
ពានរង្វាន់ Pulitzer ក្នុងវិស័យសារព័ត៌មាន ត្រូវបានប្រគល់ជាលើកដំបូងក្នុងឆ្នាំ ១៩១៧ ហើយត្រូវបានចាត់ទុកថាជាពានរង្វាន់កិត្តិយសខ្ពស់បំផុតនៅក្នុងវិស័យសារព័ត៌មាននៅក្នុងសហរដ្ឋអាមេរិក។
ពិធីប្រគល់ពានរង្វាន់ដោយមានទទួលទានអាហារថ្ងៃត្រង់នៅសាកលវិទ្យាល័យ Columbia ក្នុងទីក្រុង New York ដែលតែងតែធ្វើឡើងនៅខែឧសភា ក៏ត្រូវបានពន្យារពេលផងដែរ៕
ប្រែសម្រួលដោយអ្នកស្រី ហុង ចិន្ដា
