ក្រុមអង្គការសង្គមស៊ីវិលក្នុងប្រទេសកម្ពុជា បានបន្តយុទ្ធនាការរបស់ពួកគេដូចការគ្រោងទុកក្នុងការបង្ហោះប៉េងប៉ោងនិងបង្ហាញសារដែលសរសេរថា «និយាយថាទេ!ច្បាប់សហជីព ច្បាប់សមាគម និងអង្គការ» ហើយពួកគេក៏ត្រៀមផងដែរដើម្បីដើរហែរក្បួននៅលើវិថីធំៗចំនួនបួន ដើម្បីផ្សព្វផ្សាយពីគោលបំណងរបស់ពួកក្នុងការមិនឲ្យអនុម័តច្បាប់នេះ។
ការបន្តយុទ្ធនាការរបស់ពួកគេនៅថ្ងៃនេះ ធ្វើឡើងក្រោយពីការជួបជុំរបស់ពួកគេកាលពីថ្ងៃអាទិត្យនៅមុខរដ្ឋសភាជាតិ ដើម្បីសម្តែងការមិនពេញចិត្តចំពោះសេចក្តីព្រាងច្បាប់ដែលមានការរឹតបន្តឹងលើសិទ្ធិសេរីភាពក្នុងការធ្វើប្រតិបតិ្តការសកម្មភាពបម្រើប្រយោជន៍ពលរដ្ឋខ្មែរទូទៅ។
លោក អំ សំអាតប្រធានបច្ចេកទេសស៊ើបអង្កេតនៃអង្គការសិទ្ធិមនុស្សលីកាដូបានប្រាប់វីអូអេនៅថ្ងៃនេះថា បុគ្គលិកនៃអង្គការសិទ្ធិមនុស្សលីកាដូទាំងនៅក្នុងរាជធានីភ្នំពេញ និងតាមបណ្តាខេត្តបានចាប់ផ្តើមយុទ្ធនាការនេះ ទៅតាមគម្រោងដែលបានរៀបចំ ហើយថា ក្រុមសកម្មជនសិទ្ធិមនុស្ស និងអង្គការសង្គមស៊ីវិលជាដៃគូឯទៀតនឹងធ្វើការដើរហែរក្បួននៅថ្ងៃស្អែកនេះ។
«បាទនៅតាមការិយាល័យអង្គការលីកាដូទាំងភ្នំពេញទាំងបណ្តាខេត្ត គឺមានការបង្ហោះ ហើយមិនតែលីកាដូទេមានអង្គការដៃគូនៅតាមបណ្តាខេត្ត និងរាជធានីភ្នំពេញហ្នឹងក៏ចូលរួមនៅក្នុងបង្ហោះប៉េងប៉ោងហ្នឹងដែរ អញ្ចឹងមានអង្គការច្រើនណាស់ដែលបាននិងបង្ហោះប៉េងប៉ោងដូចការគ្រោងទុកនៅព្រឹកមិញទាំងជាតិនិងអន្តរជាតិ»។
លោកបានឲ្យដឹងដែរថា អ្នកដឹកនាំនិងតំណាងអង្គការសង្គមស៊ីវិលពុំបានសុំការអនុញ្ញាតពីសាលារាជធានីភ្នំពេញសម្រាប់ការហែរក្បួនដោយសន្តិវិធីនេះទេ ដោយលោកពន្យល់ថា សាលាក្រុងនឹងមុខជាមិនផ្តល់ការអនុញ្ញាតនោះឡើយ។
ឆ្លើយតបទៅនឹងការដើរហែរក្បួននេះ លោកឡុង ឌីម៉ង់អ្នកនាំពាក្យសាលារាជធានីភ្នំពេញឲ្យដឹងថាសាលាក្រុងនឹងចាត់រាល់វិធានការនានាដើម្បីទប់ស្កាត់ និងបង្ក្រាបមិនឲ្យការហែរក្បួនដែលមានចេតនាប្រឆាំងនឹងការអនុម័តច្បាប់ស្តីពីសមាគមនិងអង្គការមិនមែនរដ្ឋាភិបាលនេះ។
«អញ្ចឹងយើងឃើញហើយរូបភាពនេះប្រហែលជារូបភាពដែលមានការចាត់តាំងមួយ។ អញ្ចឹងទេការស្នើរៀបចំធ្វើបាតុកម្ម ការសម្តែងមតិ ការហែរក្បួនដែលមិនមានការអនុញ្ញាតច្បាស់ទេ គឺថាយើងនឹងប្រើវិធានការនានាទាំងអស់ដើម្បីទប់ស្កាត់ ដើម្បីបង្ក្រាបការងារទាំងអស់ដែលមិនមានការសុំច្បាប់ ហើយធ្វើឲ្យប៉ះពាល់ដល់បញ្ហាសន្តិសុខ និងសណ្តាប់ធ្នាប់ក្នុងសង្គមនេះ»។
ដោយឡែកនៅឯរដ្ឋសភាជាតិឯណោះវិញ លោកសម រង្សីមេដឹកគណបក្សសង្គ្រោះជាតិ និងជាប្រធានសំឡេភាគតិចនៅក្នុងសភាបានថ្លែងប្រាប់អ្នកសារព័ត៌មានថា លោកបានជួបសន្ទនាជាមួយលោកនាយករដ្ឋមន្ត្រីហ៊ុន សែន ដែលបានប្រាប់លោកថា សូមកុំឲ្យក្រុមអង្គការសង្គមស៊ីវិលព្រួយបារម្ភខ្លាំងទាក់ទងនឹងការបង្កើតច្បាប់នេះនៅក្នុងការចុះបញ្ជីការឡើងវិញ។
«សម្តេចហ៊ុន សែនបានបញ្ជាក់ប្រាប់ខ្ញុំថាសូមឲ្យអង្គការសង្គមស៊ីវិលទាំងអស់កុំព្រួយបារម្ភហួសហេតុ។ អង្គការសង្គមស៊ីវិលដែលកំពុងតែដំណើរការហើយ គឺអត់ចាំបាច់ទៅចុះឈ្មោះឡើងវិញនឹងមានការទទួលស្គាល់ជាស្វ័យប្រវត្តិៗ»។
លោកបញ្ជាក់ដែរថាសភាជាតិនឹងពិនិត្យលើសំណើឲ្យលុបចោលសេចក្តីព្រាងច្បាប់នេះដែរ ក្រៅពីចុះបញ្ជីការឡើងវិញនេះ។
«ជាការបញ្ជាក់បំភ្លឺលើចំណុចមួយ ប៉ុន្តែមានចំណុចដទៃទៀតដែលអង្គការសង្គមស៊ីវិលកំពុងតែទាមទារឲ្យលុបចោលថាមិនចាំបាច់ទេ នោះក៏យើងត្រូវតាមដានសំណើរបស់អង្គការដែលពាក់ព័ន្ធទាំងអស់»។
ជាមួយគ្នានេះដែរ លោក William E. Todd ឯកអគ្គរដ្ឋទូតសហរដ្ឋអាមេរិកប្រចាំនៅប្រទេសកម្ពុជាបានសរសេរនៅក្នុងគេហទំព័រទស្សនៈផ្ទាល់របស់លោកថា តំណាងរាស្រ្តនៃគណបក្សទាំងពីរដែលជាសមាជិកនៅក្នុងគណៈកម្មការបីរបស់រដ្ឋសភា រួមមានគណៈកម្មការមហាផ្ទៃ កិច្ចការបរទេស និងនីតិកម្ម ធ្វើការរួមគ្នាដើម្បីធានាឲ្យប្រាកដថាច្បាប់នេះនឹងមិនរឹតត្បិត ឬគាបសង្កត់លើសិទ្ធិសេរីភាពនៃការបញ្ចេញមតិនឹងការប្រមូលផ្តុំ ប្រសិនបើត្រូវបានអនុម័តដោយុរដ្ឋសភាជាតិ។
ការតវ៉ាទាមទារឲ្យលុបចោលសេចក្តីព្រាងច្បាប់នេះ បានកើតឡើងជាបន្តបន្ទាប់នៅក្នុងខែមិថុនានេះ ខណៈពេលសេចក្តីព្រាងច្បាប់ដ៏ចម្រូងចម្រាស់នេះ ត្រូវបានសម្រេចទទួលមកពិភាក្សាដោយគណៈកម្មាធិការអចិន្ត្រៃយ៍នៃរដ្ឋសភានាពេលថ្មីៗនេះ៕
